Blog

‎میٹا کمپنی اپنے سی ای او اور فیس بک کے بانی مارک زکربرگ کا اے آئی کلون تیار کرنے کی منصوبہ بندی کر رہی ہے، جو مستقبل میں ملازمین سے براہ راست بات چیت کرے گا اور انہیں فیڈ بیک فراہم کرے گا۔
غیر ملکی میڈیا رپورٹس کے مطابق اس اے آئی اوتار کو زکربرگ کی اصل آواز، لہجے، اندازِ گفتگو اور بات چیت کے طریقے کی مکمل تربیت دی جا رہی ہے تاکہ وہ حقیقی شخصیت کے قریب تر نظر آئے۔ اس ٹیکنالوجی کا مقصد کمپنی کے ملازمین اور قیادت کے درمیان رابطے کو مزید مؤثر بنانا ہے، خاص طور پر ان افراد کے لیے جو براہ راست زکربرگ تک رسائی نہیں رکھتے۔
رپورٹ کے مطابق یہ منصوبہ ابھی ابتدائی مراحل میں ہے، تاہم اگر یہ کامیاب ہو جاتا ہے تو میٹا اپنے پلیٹ فارم پر موجود دیگر تخلیق کاروں کو بھی اپنے اے آئی اوتار بنانے کی اجازت دے سکتی ہے۔ اس سے قبل 2024 میں کمپنی نے ایک لائیو ڈیمو کے ذریعے اے آئی شخصیات کے استعمال کا مظاہرہ بھی کیا تھا۔
دوسری جانب ایک رپورٹ میں یہ بھی بتایا گیا کہ مارک زکربرگ اپنے لیے ایک ذاتی اے آئی ایجنٹ بھی تیار کر رہے ہیں، جو ان کے روزمرہ کاموں میں مدد فراہم کرے گا۔ یہ پراجیکٹ ملازمین سے بات چیت کے لیے بنائے جانے والے اے آئی اوتار سے الگ ہوگا۔

‎سورج کی توانائی کو ماحول دوست ذریعہ سمجھا جاتا ہے، مگر رات کے وقت سولر پینلز کی کارکردگی ختم ہو جاتی ہے۔ اب سائنسدانوں نے ایک نئی تحقیق کے ذریعے ایسا طریقہ سامنے لایا ہے جس سے رات میں بھی شمسی توانائی سے بجلی حاصل کی جا سکتی ہے۔
‎جرنل ایڈوانسڈ انرجی میٹریلز میں شائع تحقیق کے مطابق چینی سائنسدانوں نے لکڑی کی اندرونی ساخت کو تبدیل کر کے اسے مسام دار اسفنج جیسا بنا دیا، جو سورج کی روشنی کو جذب کر کے حرارت کی صورت میں ذخیرہ کر سکتا ہے۔
‎اس خاص لکڑی کو اس انداز میں تیار کیا گیا ہے کہ یہ دن کے وقت سورج کی توانائی کو جذب کر کے محفوظ رکھتی ہے اور رات کے وقت اس حرارت کو خارج کر کے بجلی پیدا کرنے میں مدد دیتی ہے۔
‎ماہرین کے مطابق اس طریقہ کار سے سولر توانائی کی سب سے بڑی کمزوری یعنی رات کے وقت بجلی کی عدم دستیابی پر قابو پایا جا سکتا ہے۔ اس وقت عام طور پر بیٹریوں کے ذریعے دن کی بجلی کو ذخیرہ کیا جاتا ہے، مگر وہ مہنگی ثابت ہوتی ہیں۔
‎تحقیق میں بالسا ووڈ استعمال کی گئی جس کی قدرتی ساخت میں تبدیلیاں کر کے اسے روشنی جذب کرنے کے قابل بنایا گیا۔ اس کے اندر سیاہ فاسفورسین کی باریک تہیں، نینو ذرات اور دیگر مواد شامل کیے گئے تاکہ توانائی کے ذخیرے اور اخراج کا عمل ممکن ہو سکے۔
‎مزید یہ کہ لکڑی میں stearic ایسڈ شامل کیا گیا جو حرارت کو ذخیرہ اور خارج کرنے میں مدد دیتا ہے۔ تجربات کے دوران اس لکڑی نے 91.2 فیصد سورج کی روشنی کو حرارت میں تبدیل کیا اور رات کے وقت بھی بجلی پیدا کرنے میں کامیابی حاصل کی۔

ملک بھر میں سونے کی قیمتوں میں مسلسل اضافے کے بعد کمی ریکارڈ کی گئی ہے جس سے خریداروں کو کچھ ریلیف ملا ہے۔
آل پاکستان جیمز اینڈ جیولرز ایسوسی ایشن کے مطابق فی تولہ سونے کی قیمت میں 3300 روپے کمی ہوئی ہے، جس کے بعد نئی قیمت 5 لاکھ ایک ہزار 562 روپے ہو گئی ہے۔
اسی طرح 10 گرام سونے کی قیمت میں بھی 2829 روپے کمی ریکارڈ کی گئی ہے، جس کے بعد اس کی قیمت 4 لاکھ 30 ہزار 8 روپے ہو گئی ہے۔
دوسری جانب عالمی مارکیٹ میں بھی سونے کی قیمت میں کمی دیکھی گئی ہے جہاں فی اونس سونا 33 ڈالر سستا ہو کر 4792 ڈالر تک آ گیا ہے۔
ماہرین کے مطابق عالمی سطح پر قیمتوں میں اتار چڑھاؤ کا براہ راست اثر مقامی مارکیٹ پر پڑتا ہے، جس کی وجہ سے سونے کی قیمتوں میں یہ کمی دیکھنے میں آئی ہے۔

‎امریکی صدر ڈونلڈ ٹرمپ نے دعویٰ کیا ہے کہ ایران امریکی مدد سے سمندری بارودی سرنگیں صاف کر رہا ہے۔ٹرمپ نے اپنے سوشل میڈیا پلیٹ فارم پر بیان میں کہا کہ ایران امریکاکے تعاون سے تمام سمندری بارودی سرنگیں ہٹا چکا ہے یا ہٹا رہا ہے۔
ایک اور بیان میں ٹرمپ نے نیٹو کو تنقید کا نشانہ بناتے ہوئے اسے کاغذی شیر قرار دیا اور کہا کہ آبنائے ہرمز کا معاملہ ختم ہونے کے بعد نیٹو نے مدد کی پیشکش کی، تاہم انہیں کہا گیا کہ اگر تیل بھرنے کے لیے جہاز لانے ہیں تو آئیں، ورنہ دور رہیں۔
‎ٹرمپ نے سعودی عرب، متحدہ عرب امارات اور قطر کا بھی شکریہ ادا کیا اور کہا کہ انہوں نے بہادری سے مدد فراہم کی۔
‎ادھر ایران کی جانب سے آبنائے ہرمز کھولنے کے اعلان کے بعد ٹرمپ نے ایک اور بیان میں کہا کہ یہ گزرگاہ مکمل طور پر کھلی ہے اور جہاز رانی کے لیے تیار ہے۔
‎انہوں نے مزید کہا کہ ایران کے خلاف بحری ناکہ بندی برقرار رہے گی جب تک معاملات مکمل طور پر حل نہیں ہو جاتے۔
‎ٹرمپ کے مطابق ایران کے ساتھ مذاکرات تیزی سے آگے بڑھ رہے ہیں اور بیشتر نکات پہلے ہی طے پا چکے ہیں۔

‎امریکی صدر ڈونلڈ ٹرمپ نے آبنائے ہرمز مکمل طور پر کھولنے کے اعلان پر ایران کا شکریہ ادا کیا ہے۔
ٹرمپ نے ٹروتھ سوشل پر اپنے بیان میں کہا کہ ایران نے آبنائے ہرمز کو مکمل طور پر کھولنے کا اعلان کیا ہے، جس پر وہ ایران کے شکر گزار ہیں۔
واضح رہے کہ ایران نے لبنان میں جنگ بندی کے بعد آبنائے ہرمز کو تجارتی بحری جہازوں کے لیے کھولنے کا اعلان کیا تھا۔
ایرانی وزیر خارجہ عباس عراقچی نے سوشل میڈیا پر جاری بیان میں کہا کہ جنگ بندی کے تناظر میں آبنائے ہرمز سے تمام تجارتی جہازوں کی آمد و رفت جنگ بندی کی باقی مدت کے لیے مکمل طور پر بحال کی جا رہی ہے۔
انہوں نے مزید کہا کہ یہ آمد و رفت ایک مربوط اور پہلے سے طے شدہ راستے کے مطابق ہوگی، جس کا اعلان پورٹس اینڈ میری ٹائم آرگنائزیشن آف ایران کی جانب سے کیا جا چکا ہے۔

‎ترکیے کے صدر رجب طیب اردوان نے کہا ہے کہ وزیراعظم شہباز شریف کی کوششوں سے خطے میں جنگ رک گئی اور اس جنگ بندی کو امن کے ایک اہم موقع کے طور پر دیکھنا چاہیے۔
‎انطالیہ ڈپلومیسی فورم سے خطاب کرتے ہوئے ترک صدر نے کہا کہ ترکیے خطے میں امن کے لیے اپنی کوششیں جاری رکھے گا اور آبنائے ہرمز کو تجارتی جہازوں کے لیے مکمل طور پر کھول دینا چاہیے۔
‎انہوں نے زور دیا کہ سفارت کاری کے ذریعے ہر مسئلے کا حل ممکن ہے اور ترکیے عالمی رہنماؤں کے اجلاس سمیت مشرق وسطیٰ میں دیرپا امن کے لیے مذاکرات کی میزبانی کے لیے تیار ہے۔
‎اردوان کا کہنا تھا کہ دنیا میں طاقت کا توازن تبدیل ہو رہا ہے اور غزہ میں جاری صورتحال عالمی نظام کے کردار کو ظاہر کرتی ہے۔
‎انہوں نے عالمی برادری پر زور دیا کہ وہ اسرائیل کی توسیع پسندانہ پالیسیوں کے خلاف مؤثر مؤقف اپنائے، کیونکہ ان پالیسیوں کے باعث عالمی سطح پر عدم استحکام پیدا ہو رہا ہے۔

‎الجزیرہ نیوز کے مطابق شام کی فضاء میں پاکستانی اور اسرائیلی لڑاکا طیاروں کے درمیان آمنا سامنا ہوا ہے۔
‎رپورٹ کے مطابق اس موقع پر پاکستانی پائلٹ کی جانب سے اسرائیلی طیارے کو خبردار کیا گیا کہ وہ بین الاقوامی حدود کی خلاف ورزی کر رہا ہے اور فوری طور پر پیچھے ہٹ جائے۔
‎اطلاعات کے مطابق پاکستانی پائلٹ نے وارننگ دیتے ہوئے کہا کہ مزید آگے بڑھنے کی صورت میں سخت کارروائی کی جائے گی۔
‎یہ پیش رفت خطے میں جاری کشیدگی کے دوران سامنے آئی ہے، جس کے باعث فضائی صورتحال پر بھی گہری نظر رکھی جا رہی ہے۔