Blog

‎ایرانی وزیر خارجہ کی جانب سے جنگ بندی کی باقی مدت کے لیے آبنائے ہرمز تمام بحری جہازوں کے لیے کھولنے کے اعلان کے بعد عالمی سطح پر تیل کی قیمتوں میں نمایاں کمی ریکارڈ کی گئی ہے۔
‎عالمی مارکیٹ میں ڈبلیو ٹی آئی خام تیل کی قیمت 11.17 فیصد کمی کے بعد 83.52 ڈالر فی بیرل ہو گئی ہے۔
‎اسی طرح برینٹ خام تیل کی قیمت بھی 11.32 فیصد کمی کے بعد 88.07 ڈالر فی بیرل تک آ گئی ہے۔
‎یہ کمی اس اعلان کے بعد سامنے آئی ہے جس میں تجارتی بحری راستوں کی بحالی کو یقینی بنایا گیا، جس سے عالمی منڈی میں سپلائی سے متعلق خدشات کم ہو گئے۔

‎ذرائع کے مطابق پاکستان کا ایک اور آئل ٹینکر کویت سے آبنائے ہرمز کی جانب روانہ ہو چکا ہے۔ بتایا گیا ہے کہ "خیرپور” نامی جہاز کل آبنائے ہرمز سے گزرے گا۔
‎ذرائع کا کہنا ہے کہ خیرپور اور شالامار نامی دونوں پاکستانی جہاز اتوار کے روز آبنائے ہرمز میں داخل ہوئے تھے۔ ان میں سے شالامار جہاز اس وقت خلیج عمان سے گزر رہا ہے۔
‎یہ پیش رفت ایک ایسے وقت میں سامنے آئی ہے جب خطے میں سیکیورٹی صورتحال پر گہری نظر رکھی جا رہی ہے اور اہم بحری راستوں کی نگرانی میں اضافہ کیا گیا ہے۔

‎میرین ٹریکنگ کمپنی کپلر (Kpler) کے مطابق خلیج سے آنے والے تین ایرانی آئل ٹینکرز امریکی پابندیوں اور ناکا بندی کے باوجود آبنائے ہرمز عبور کر گئے ہیں۔
‎غیر ملکی خبررساں ایجنسی کی رپورٹ کے مطابق ان تینوں جہازوں پر مجموعی طور پر تقریباً 50 لاکھ بیرل خام تیل لوڈ تھا۔ ڈیپ سی، سونیا آئی اور ڈیونا نامی یہ ٹینکرز ایران کے خارک جزیرے سے روانہ ہوئے اور بدھ کے روز آبنائے ہرمز سے گزرے۔
‎رپورٹ کے مطابق 10 اپریل کو اسٹارلا نامی ٹینکر کے بعد یہ پہلا موقع ہے کہ کوئی ایرانی تیل بردار جہاز خام تیل لے کر اس اہم گزرگاہ سے گزرا ہے۔
‎میرین ڈیٹا کے مطابق ان جہازوں کے اے آئی ایس ٹرانسپونڈرز بند تھے، جس کے باعث ان کی موجودہ لوکیشن کے حوالے سے محدود معلومات دستیاب ہیں۔ ان کی آخری سگنلنگ تقریباً ایک ماہ قبل آبنائے ملاکا میں ریکارڈ کی گئی تھی۔
‎تاہم کپلر نے سیٹلائٹ تصاویر کے ذریعے ان جہازوں کی نقل و حرکت کو ٹریک کرتے ہوئے تصدیق کی کہ یہ تینوں ٹینکرز آبنائے ہرمز عبور کر چکے ہیں۔
‎ان جہازوں کی حتمی منزل تاحال واضح نہیں، تاہم ماضی میں یہ ٹینکرز عموماً سنگاپور کے قریب تیل منتقل کرتے رہے ہیں، جہاں بعض اوقات جہاز سے جہاز میں تیل منتقلی کے بعد اسے دیگر ٹینکرز کے ذریعے چین بھیجا جاتا ہے۔

‎پیٹرولیم ڈویژن کے حکام نے انکشاف کیا ہے کہ ملک میں پیٹرولیم مصنوعات کا موجودہ ذخیرہ ایک ماہ کی ضروریات پوری کرنے کے لیے کافی ہے، تاہم مشرقِ وسطیٰ میں بڑھتی ہوئی کشیدگی کے باعث سپلائی متاثر ہونے کا خدشہ موجود ہے۔
‎سینیٹر منظور کاکڑ کی زیر صدارت سینیٹ کی قائمہ کمیٹی برائے پیٹرولیم کے اجلاس میں حکام نے تیل و گیس کی صورتحال، درآمدی معاہدوں اور علاقائی حالات پر تفصیلی بریفنگ دی۔ اجلاس میں بتایا گیا کہ پاکستان کی توانائی ضروریات کا بڑا حصہ خلیجی ممالک سے پورا ہوتا ہے، اس لیے خطے میں کسی بھی قسم کی کشیدگی براہ راست سپلائی کو متاثر کر سکتی ہے۔
‎حکام کے مطابق مشرقِ وسطیٰ عالمی تجارت کے لیے انتہائی اہمیت رکھتا ہے اور چین کی تقریباً 45 فیصد پیٹرولیم مصنوعات بھی اسی راستے سے گزرتی ہیں، جس سے اس خطے کی اسٹریٹیجک اہمیت مزید واضح ہوتی ہے۔
‎بریفنگ میں بتایا گیا کہ ملک میں گیس کی موجودہ صورتحال نسبتاً بہتر ہے اور گیس کنوؤں سے براہ راست قومی گرڈ میں گیس کی شمولیت کو یقینی بنایا جا رہا ہے۔ تاہم قطر سے مکمل گیس سپلائی کی بحالی میں مزید دو سے تین سال لگ سکتے ہیں۔
‎مزید یہ بھی بتایا گیا کہ قیمتوں میں اضافے کے باوجود پیٹرولیم مصنوعات کے استعمال میں کمی کے بجائے اضافہ دیکھا گیا ہے، جو توانائی کی بڑھتی ہوئی طلب کی نشاندہی کرتا ہے۔ حکام نے واضح کیا کہ آر ایل این جی طویل المدتی معاہدوں کے تحت درآمد کی جا رہی ہے تاکہ سپلائی میں تسلسل برقرار رکھا جا سکے۔

‎لبنان کے جنوبی شہر صور میں جنگ بندی سے عین قبل اسرائیلی حملوں میں کم از کم 13 افراد ہلاک اور 35 زخمی ہو گئے۔
‎سرکاری میڈیا نیشنل نیوز ایجنسی کے مطابق یہ حملے گزشتہ رات کیے گئے، جن کے نتیجے میں متعدد عمارتیں تباہ ہوئیں اور کئی افراد ملبے تلے دب گئے۔ ریسکیو ٹیمیں آج صبح تک لاپتا افراد کی تلاش میں مصروف رہیں اور کم از کم 15 افراد کو تاحال لاپتا قرار دیا جا رہا ہے۔
‎اے ایف پی کے مطابق یہ حملے اسرائیل اور لبنان کے درمیان طے پانے والی 10 روزہ جنگ بندی کے نفاذ سے کچھ ہی دیر قبل، آدھی رات سے پہلے کیے گئے۔
‎مقامی سرکاری ذرائع کا کہنا ہے کہ حملوں کے وقت علاقے میں شدید بمباری ہوئی جس کے باعث جانی نقصان میں اضافہ ہوا اور ریسکیو کارروائیاں بھی متاثر ہوئیں۔