Category: جرائم و حادثات

گوجرخان (قمرشہزاد) گوجرخان پولیس نے جرائم پیشہ عناصر کے خلاف ایک بار پھر اپنی برتری ثابت کر دی۔ اے ایس پی سید دانیال حسن کی زیرِ نگرانی اور ایس ایچ او تھانہ گوجرخان مرزا طیب ظہیر بیگ کی قیادت میں پولیس ٹیم نے سرور شہید کالج کے قریب بینظیر انکم سپورٹ آفس کے باہر دن دیہاڑے ہونے والی سنگین ڈکیتی کی واردات کی گھتیاں سلجھا دیں۔ اے ایس آئی ثاقب اور ان کی ٹیم نے جدید سائنٹیفک ٹیکنالوجی اور پیشہ ورانہ مہارت کا استعمال کرتے ہوئے محض چند روز میں اصل ملزمان کا گھیرا تنگ کیا اور شرقی علاقے کمانیدریال سے حیدر نامی ملزم کو دبوچ لیا۔

دورانِ تفتیش گرفتار ملزم حیدر نے ہوشربا سنسنی خیز انکشافات کیے ہیں، جس کے بعد اس کے ہمراہی ساتھیوں اویس اور دیگر سہولت کاروں کی گرفتاری کے لیے پولیس نے جال بچھا دیا ہے۔ ایس ایچ او مرزا طیب ظہیر بیگ کا اس حوالے سے کہنا ہے کہ ملزم کے انکشافات کی روشنی میں مزید سنسنی خیز گرفتاریاں متوقع ہیں۔ انہوں نے واضح کیا کہ گرفتار ملزم اور اس کے ساتھی ضلعی سطح پر سنگین جرائم میں ریکارڈ یافتہ ہیں اور ضلع راولپنڈی کے متعدد تھانوں میں ان کے خلاف مقدمات درج ہیں۔ بیوہ اور بے سہارا خواتین کے حق پر ڈاکہ ڈالنے والے اس گروہ کی گرفتاری پر عوامی سماجی حلقوں نے اے ایس پی سید دانیال حسن اور ایس ایچ او مرزا طیب ظہیر بیگ اور ٹیم کو زبردست خراجِ تحسین پیش کرتے ہوئے مطالبہ کیا ہے کہ ان درندہ صفت عناصر کو نشانِ عبرت بنایا جائے تاکہ مستقبل میں کسی کو ایسی جسارت کی ہمت نہ ہو سکے۔ ملزم کو شناخت پریڈ کے لیے اڈیالہ جیل منتقل کر دیا گیا ہے جبکہ لوٹی گئی رقم کی برآمدگی کے لیے تحرک جاری ہے۔

بھارت کی ریاست مدھیہ پردیش میں ایک تاجر کے قتل کا معاملہ ڈرامائی موڑ اختیار کر گیا، جہاں ابتدائی طور پر ڈکیتی قرار دی جانے والی واردات درحقیقت گھریلو سازش نکلی۔ پولیس نے مقتول کی بیوی اور اس کے مبینہ عاشق کو گرفتار کر لیا۔

بھارتی میڈیا رپورٹس کے مطابق 28 سالہ دیوکرشن پروہت کو 7 اپریل کی رات ان کے گھر میں تیز دھار ہتھیار سے قتل کیا گیا۔ واقعے کے فوراً بعد مقتول کی اہلیہ پریانکا پروہت نے پولیس کو بیان دیا کہ نامعلوم افراد گھر میں داخل ہوئے، ساڑھے 3 لاکھ روپے کے زیورات لوٹے اور مزاحمت پر اس کے شوہر کو قتل کر دیا،تاہم پولیس کو ابتدائی تفتیش کے دوران ہی بیان میں تضادات محسوس ہوئے۔ گھر کی تلاشی کے دوران وہی زیورات برآمد ہو گئے جنہیں مبینہ طور پر لوٹا گیا تھا، جبکہ موبائل فون کے ریکارڈ نے پریانکا پروہت اور کملیش پروہت کے درمیان قریبی رابطوں کا انکشاف کیا۔پولیس کے مطابق پریانکا اپنے مبینہ عاشق کملیش پروہت کے ساتھ مل کر شوہر کو راستے سے ہٹانا چاہتی تھی۔ اس مقصد کے لیے سریندر بھاٹی نامی شخص کو ایک لاکھ روپے کے عوض قتل کی ذمہ داری سونپی گئی۔

تحقیقات میں یہ بھی سامنے آیا کہ واردات کی رات گھر کا دروازہ جان بوجھ کر کھلا چھوڑا گیا تاکہ ملزم آسانی سے اندر داخل ہو سکے۔ بعد ازاں کمرے کو الٹ پلٹ کر ڈکیتی کا تاثر دیا گیا جبکہ پریانکا نے خود کو بھی متاثرہ ظاہر کرنے کی کوشش کی۔مسلسل تفتیش کے بعد پریانکا پروہت نے اپنے شوہر کے قتل میں ملوث ہونے کا اعتراف کر لیا۔ پولیس نے پریانکا اور کملیش کو گرفتار کر لیا ہے جبکہ مرکزی ملزم سریندر بھاٹی تاحال مفرور ہے، جس کی تلاش جاری ہے۔دوسری جانب مقتول کے اہلِ خانہ نے انکشاف کیا ہے کہ پریانکا اکثر اپنے شوہر کو رنگت کے حوالے سے تضحیک کا نشانہ بناتی تھی اور اسے نازیبا القابات سے مخاطب کرتی تھی، جو کہ گھریلو تنازعات کی ایک ممکنہ وجہ بھی ہو سکتی ہے۔پولیس حکام کے مطابق مزید تفتیش جاری ہے اور مفرور ملزم کی گرفتاری کے لیے چھاپے مارے جا رہے ہیں۔

میرپورخاص میں میڈیکل طالبہ کی پُراسرار خودکشی کے واقعے میں اہم پیشرفت ہوگئی۔ کالج پرنسپل، ان کی اہلیہ سمیت 5 افراد کیخلاف مقدمہ درج کرلیا گیا۔

میرپور خاص میں میڈیکل طالبہ کی پراسرار خودکشی کے مقدمے میں کالج پرنسپل تنویر عالم، ان کی اہلیہ پروفیسر فرزانہ سمیت 5 افراد کیخلاف مقدمہ درج کرلیا گیا، جس میں ہراسانی اور خودکشی پر مجبور کرنے کی دفعات شامل ہیں۔پولیس کا کہنا ہے کہ مقدمے میں فارمیسی لیکچرر عابد لغاری اور 2 طالب علم بھی نامزد کیے گئے ہیں، مقدمہ متوفیہ طالبہ کے ماموں کی مدعیت میں درج کیا گیا ہے۔مقدمے کے متن میں کہا گیا ہے کہ لیکچرر اور 2 طالب علم طالبہ کو بلیک میل کرتے تھے، معاملے پر کالج پرنسپل اور ان کی پروفیسر اہلیہ سے کئی بار شکایت کی گئی، تاہم انہوں نے کارروائی کے بجائے طالبہ پر شکایت واپس لینے کیلئے دباؤ ڈالا۔متن کے مطابق پرنسپل اور ان کی پروفیسر اہلیہ نے شکایت واپس نہ لینے پر طالبہ کا داخلہ رد کرنے کی دھمکی دی اور ہراساں کیا۔

‎کراچی سے لاہور جانے والی شالیمار ایکسپریس کو شہدادپور کے قریب حادثہ پیش آیا جس کے نتیجے میں ٹرین کی تین بوگیاں پٹری سے اتر گئیں۔ اس واقعے نے مسافروں میں خوف و ہراس پھیلا دیا تاہم خوش قسمتی سے کسی قسم کے جانی نقصان کی اطلاع نہیں ملی۔
‎ریلوے حکام کے مطابق حادثے میں وی وی آئی پی کچن لاؤنج، ایک اے سی بزنس کلاس اور ایک اے سی اسٹینڈرڈ بوگی شامل ہیں جو پٹری سے اتر گئیں۔ حکام کا کہنا ہے کہ ٹرین میں موجود مسافروں کو فوری طور پر محفوظ مقامات پر منتقل کر دیا گیا۔
‎حادثے کے فوراً بعد امدادی ٹیمیں موقع پر پہنچ گئیں اور صورتحال کو قابو میں لے لیا گیا۔ ریلوے حکام کے مطابق متاثرہ بوگیوں کو ہٹانے اور ریلوے ٹریک کی بحالی کا کام تیزی سے جاری ہے تاکہ ٹرینوں کی آمدورفت جلد بحال کی جا سکے۔
‎ابتدائی رپورٹس کے مطابق حادثے کی وجوہات ابھی سامنے نہیں آ سکیں، تاہم ریلوے انتظامیہ نے واقعے کی مکمل تحقیقات شروع کر دی ہیں۔ ماہرین کا کہنا ہے کہ ٹریک کی حالت، رفتار یا تکنیکی خرابی جیسے عوامل کو مدنظر رکھتے ہوئے جائزہ لیا جائے گا۔
‎حکام نے یقین دہانی کرائی ہے کہ تحقیقات مکمل ہونے کے بعد ذمہ داروں کے خلاف کارروائی کی جائے گی اور مستقبل میں ایسے واقعات سے بچنے کے لیے حفاظتی اقدامات مزید سخت کیے جائیں گے۔

گوجرخان (قمرشہزاد) گورنمنٹ گرلز ہائی سکول ڈھونگ کے باہر میٹرک کا امتحان دے کر نکلنے والی طالبات پر فائرنگ کے ہولناک واقعے سے علاقہ مکینوں میں تشویش کی لہر دوڑ گئی۔ زرائع کے مطابق گاؤں کے ایک اوباش نوجوان مزمل حسین عرف جگا نے امتحان سے فارغ ہو کر گھر جانے والی طالبات کا راستہ روک کر انہیں ہراساں کرنے اور بات کرنے کی کوشش کی۔

طالبات کی جانب سے سخت ردعمل اور ڈانٹ ڈپٹ پر ملزم مشتعل ہو گیا اور 30 بور پستول نکال کر اندھا دھند فائرنگ شروع کر دی۔ فائرنگ کے نتیجے میں امتحانی مرکز کے باہر بھگدڑ مچ گئی اور طالبات جان بچانے کے لیے چیخ و پکار کرتی ادھر ادھر بھاگنے لگیں۔ اسی اثنا میں سکول کے ملازم ناصر حسین نے بے مثال بہادری کا مظاہرہ کیا اور اپنی جان کی پرواہ نہ کرتے ہوئے مسلح ملزم پر جھپٹ پڑا۔ ملزم نے ناصر حسین پر بھی فائرنگ کی کوشش کی تاہم ناصر حسین نے ہمت نہ ہاری اور جان جوکھوں میں ڈال کر ملزم کو قابو کر کے اس سے اسلحہ چھین لیا۔

واقعے کی اطلاع ملتے ہی تھانہ جاتلی پولیس کی نفری فوری طور پر موقع پر پہنچ گئی اور ملزم مزمل حسین ولد محمد اسلم کو اسلحہ سمیت اپنی تحویل میں لے کر تفتیش کا آغاز کر دیا۔ خوش قسمتی سے واقعے میں تمام طالبات محفوظ رہیں، تاہم امتحانی مرکز پر ناقص سکیورٹی انتظامات نے والدین اور اہل علاقہ میں شدید تشویش پیدا کر دی ہے۔ عوامی حلقوں نے ناصر حسین کی جرات کو بھرپور خراجِ تحسین پیش کیا ہے۔

ساندہ میں خاتون پر تشدد کا واقعہ، مقدمہ درج، تمام ملزمان گرفتار کر لئے گئے

ڈی آئی جی آپریشنز نے واقعہ کا نوٹس لیتے ہوئے ایس پی اقبال ٹاؤن کو فوری کارروائی کا حکم دیا،پولیس نے مرکزی ملزم آصف کے ساتھ اس کے بہنوئی امجد اور احمد کو بھی گرفتار کر لیا،واقعہ میں ملوث تمام ملزمان کو حراست میں لے کر مزید قانونی کارروائی جاری ہے،ملزمان کے خلاف مقدمہ نمبر 644/26 درج کر کے تفتیش کا آغاز کر دیا گیا، ترجمان ڈی آئی جی آپریشنز کا کہنا ہے کہ متاثرہ خاتون کو ہر ممکن قانونی تحفظ فراہم کیا جا رہا ہے،خواتین پر تشدد کے واقعات ہرگز برداشت نہیں، زیرو ٹالرنس پالیسی پر عملدرآمد یقینی بنایا جائے گا،متاثرہ خاتون کا میڈیکل کروا کر شواہد کی بنیاد پر کیس کو مزید مضبوط بنایا جا رہا ہے، عورتوں پر تشدد کرنے والے عناصر کسی رعایت کے مستحق نہیں،