Category: جرائم و حادثات

ملزم دیوار پھلانگ کر گھر داخل ہوا، چاقو کے زور پر کپڑے اتارے زبردستی زیادتی کی اور ویڈیو وائرل کر دی متاثرہ کا پولیس کو بیان
معاملے کی احساسیت کو مدنظر رکھتے ہوئے پولیس نے متاثرہ کی مدعیت میں سنگین دفعات کے تحت مقدمہ درج کر کے تمام زاویوں سے تفتیش کا آغاز
گوجرخان (قمر شہزاد) تھانہ گوجرخان کی حدود میں خاتون کو مبینہ طور پر برہنہ ویڈیو بنا کر بلیک میل کرنے اور زیادتی کا نشانہ بنانے کا تشویش ناک واقعہ سامنے آیا ہے۔ پولیس نے متاثرہ خاتون کی درخواست پر مقدمہ درج کرکے مختلف زاویوں سے تحقیقات کا باقاعدہ آغاز کر دیا ہے۔

پولیس کو دی جانے والی درخواست میں (الف) نامی متاثرہ خاتون نے موقف اختیار کیا ہے کہ وہ اپنے والدین کے ہمراہ گھر پر مقیم ہوتی ہے۔ مورخہ 30/04/2026 کو وہ گھر پر اکیلی موجود تھی، جبکہ اس کے والد کام پر گئے ہوئے تھے اور والدہ گاؤں میں فوتگی پر تعزیت کے لیے گئی ہوئی تھیں۔ اور گھر کے مرکزی گیٹ کو باہر سے تالا لگا ہوا تھا۔خاتون کے مطابق، اس دوران ان کے تایا کا بیٹا، جس کا گھر متاثرہ کے گھر کے بالکل ساتھ جڑا ہوا ہے، دیوار پھلانگ کر اندر داخل ہو گیا۔ ملزم نے برآمدے میں بیٹھی خاتون کو دبوچ لیا اور چاقو دکھا کر جان سے مارنے کی دھمکی دی، جس کے باعث وہ خوف زدہ ہو کر خاموش ہو گئی۔ ملزم اسے زبردستی کمرے میں لے گیا، جہاں اس نے مبینہ طور پر خاتون کے زبردستی کپڑے اتارے، اپنے موبائل فون سے نازیبا ویڈیو بنائی اور اسے زبردستی اپنی ہوس کا نشانہ بنا ڈالا۔متاثرہ خاتون نے پولیس کو بتایا کہ واقعے کے بعد ملزم نے دھمکی دی کہ اگر گھر والوں کو کچھ بتایا تو وہ ویڈیو سوشل میڈیا پر وائرل کر دے گا، جس کے خوف سے میں اپنی عزت بچانے کی خاطر خاموش رہی۔ تاہم، کچھ دنوں بعد ایک نامعلوم نمبر سے میرے نمبر پر ویڈیو ٹائم لگا کر بھیجی گئی۔ شک ہونے پر میں نے اپنے بھائی کے موبائل کے ذریعے اس ویڈیو کو محفوظ کر لیا۔ اب مذکورہ نازیبا ویڈیو وائرل ہو چکی ہے، جس کے بعد میں نے ہمت کا مظاہرہ کرتے ہوئے اپنے والد کو تمام صورتحال سے آگاہ کیا۔

متاثرہ خاتون نے پولیس سے استدعا کرتے ہوئے کہا کہ تایا زاد کے خلاف نازیبا ویڈیو بنانے، بلیک میل کرنے، زیادتی اور ویڈیو وائرل کرنے کے جرم میں سخت قانونی کارروائی کی جائے۔ پولیس نے متاثرہ خاتون کی مدعیت میں سنگین دفعات کے تحت مقدمہ درج کر کے تفتیش شروع کر دی گئی ہے۔ پولیس حکام کے مطابق، واقعے کی حساسیت کو مدنظر رکھتے ہوئے تمام پہلوؤں اور تکنیکی شواہد بشمول سائبر کرائمز کے زاویوں سے تحقیقات کی جا رہی ہیں، اور اصل حقائق تفتیش کے مکمل ہونے کے بعد ہی سامنے لائے جائیں گے تاکہ قانون کے مطابق سخت کارروائی عمل میں لائی جا سکے۔

ڈی آئی جی آپریشنز لاہورکی ہدایت پر فیملی پارکس میں خواتین اور بچوں کو محفوظ ماحول فراہم کرنے کے لیے ڈولفن فورس نے کارروائیاں تیز کر دیں۔ ترجمان ڈولفن کے مطابق فیملی پارکس کو منشیات کے استعمال کے لیے محفوظ مقام سمجھنے والوں کے خلاف بھرپور کریک ڈاؤن جاری ہے۔

ترجمان کا کہنا ہے کہ ڈولفن فرینڈلی پٹرولنگ یونٹ نے تفریحی مقامات پر کارروائی کرتے ہوئے منشیات استعمال کرنے والے چار افراد کو گرفتار کر لیا، جن میں دو خواتین اور دو مرد شامل ہیں۔ ملزمان کو پارک میں پٹرولنگ کے دوران حراست میں لیا گیا۔پولیس کے مطابق گرفتار افراد خواتین کی موجودگی کی آڑ میں فیملی پارک میں آئس اور شراب کا استعمال کر رہے تھے۔ کارروائی کے دوران ملزمان کے قبضے سے آئس اور شراب بھی برآمد کر لی گئی۔گرفتار ملزمان کی شناخت عدنان، نعمان، روبینہ اور نسرین کے ناموں سے ہوئی ہے۔ انہیں قانونی کارروائی کے لیے تھانہ ریس کورس کے حوالے کر دیا گیا ہے۔

ایس پی ڈولفن بلال احمد نے کہا کہ شہریوں کو محفوظ اور پرامن ماحول کی فراہمی پولیس کی اولین ترجیح ہے، جبکہ پارکوں اور عوامی مقامات پر کسی بھی قسم کی غیر قانونی سرگرمی کی ہرگز اجازت نہیں دی جائے گی۔ انہوں نے مزید کہا کہ منشیات فروشوں اور نشہ آور اشیا استعمال کرنے والوں کے خلاف زیرو ٹالرنس پالیسی کے تحت بلاامتیاز کارروائیاں جاری رہیں گی۔

راولپنڈی میں سیوریج نالے میں ڈوب جانے والے 7 سالہ بچے وصال کی لاش تیسرے روز جاری رہنے والے سرچ آپریشن کے دوران برآمد کر لی گئی۔

ریسکیو ذرائع کے مطابق بچے کی تلاش کے لیے مسلسل تین روز تک آپریشن جاری رکھا گیا، جس میں بھاری مشینری اور ریسکیو ٹیموں نے حصہ لیا۔ طویل کوششوں کے بعد بچے کی لاش نالے سے نکال لی گئی۔ریسکیو حکام کا کہنا ہے کہ 7 سالہ وصال بارش کے بعد آئی جے پی روڈ کے کچہ اسٹاپ کے قریب اپنے دوستوں کے ساتھ نہا رہا تھا کہ اچانک پاؤں پھسلنے سے سیوریج نالے میں جا گرا اور تیز بہاؤ کے باعث بہہ گیا۔

واقعے کی سی سی ٹی وی فوٹیج بھی منظرِ عام پر آئی تھی، جس میں بچے کو نالے میں گرتے اور دیگر بچوں کو اس کے پیچھے دوڑتے ہوئے دیکھا جا سکتا ہے۔ فوٹیج سے یہ بھی ظاہر ہوا کہ نالے کے اطراف کسی قسم کی فینسنگ یا حفاظتی دیوار موجود نہیں تھی۔واقعے کے بعد شہریوں نے حفاظتی انتظامات کے فقدان پر تشویش کا اظہار کرتے ہوئے متعلقہ حکام سے مطالبہ کیا ہے کہ کھلے نالوں کے اطراف حفاظتی باڑ اور دیواریں تعمیر کی جائیں تاکہ مستقبل میں ایسے افسوسناک واقعات سے بچا جا سکے۔

‎رحیم یار خان: پنجاب کے علاقے آباد پور میں ایک دل دہلا دینے والا واقعہ سامنے آیا ہے، جہاں ایک لڑکی کو مبینہ زیادتی کے بعد قتل کیے جانے کا الزام سامنے آیا ہے۔ پولیس نے مقدمہ درج کر کے مرکزی ملزم کو گرفتار کر لیا ہے جبکہ دیگر ملزمان کی تلاش جاری ہے۔
‎پولیس کے مطابق مقدمہ مقتولہ کی والدہ کی مدعیت میں درج کیا گیا ہے۔ ایف آئی آر میں الزام عائد کیا گیا ہے کہ انس نامی نوجوان نے آن لائن ملازمت دلانے کا جھانسہ دے کر لڑکی کو اپنے ساتھ امام نگر گاؤں لے گیا، جہاں مبینہ طور پر اسے نشہ آور چیز پلائی گئی اور بعد ازاں زیادتی کا نشانہ بنایا گیا۔
‎مقدمے کے متن کے مطابق متاثرہ لڑکی کے ساتھ مبینہ زیادتی کے بعد اسے گاڑی کے نیچے کچل کر قتل کر دیا گیا۔ والدہ نے الزام لگایا ہے کہ اس واقعے میں مرکزی ملزم کے ساتھ دیگر افراد بھی ملوث تھے۔
‎پولیس حکام کا کہنا ہے کہ کارروائی کرتے ہوئے مرکزی ملزم انس کو گرفتار کر لیا گیا ہے جبکہ دیگر نامزد اور مشتبہ ملزمان کی گرفتاری کے لیے مختلف مقامات پر چھاپے مارے جا رہے ہیں۔ تفتیشی ٹیم تمام پہلوؤں کا باریک بینی سے جائزہ لے رہی ہے تاکہ واقعے کے حقائق سامنے لائے جا سکیں۔
‎ڈسٹرکٹ پولیس آفیسر کے مطابق کیس کی مکمل تحقیقات جاری ہیں اور پوسٹ مارٹم رپورٹ، فارنزک شواہد اور دیگر سائنسی ثبوتوں کی روشنی میں واقعے کی نوعیت اور ذمہ داران کا تعین کیا جائے گا۔ انہوں نے کہا کہ کسی بھی نتیجے پر پہنچنے سے قبل تمام شواہد کا مکمل جائزہ لیا جائے گا۔
‎پولیس کا کہنا ہے کہ متاثرہ خاندان کو انصاف فراہم کرنے کے لیے قانونی کارروائی تیزی سے آگے بڑھائی جا رہی ہے اور تحقیقات میں سامنے آنے والے ہر پہلو کو مقدمے کا حصہ بنایا جائے گا۔ حکام کے مطابق اگر مزید افراد کے ملوث ہونے کے شواہد ملے تو ان کے خلاف بھی قانون کے مطابق کارروائی کی جائے گی۔

‎چھانگا مانگا کے علاقے ویرسنگھ والا میں افسوسناک حادثے کے دوران چار کمسن بچے تالاب میں ڈوب کر جاں بحق ہوگئے۔
‎ریسکیو 1122 کے مطابق واقعے کی اطلاع ملتے ہی امدادی ٹیمیں موقع پر پہنچ گئیں اور کارروائی کے بعد چاروں بچوں کی لاشیں تالاب سے نکال لیں۔ جاں بحق بچوں کی عمریں 9 سے 11 سال کے درمیان بتائی گئی ہیں۔
‎علاقہ مکینوں کے مطابق بچے ٹوبہ ٹیک سنگھ سے گرمیوں کی چھٹیاں گزارنے اپنے ننھیال آئے ہوئے تھے۔ واقعے کے وقت ان کے والدین قریبی جنگل میں لکڑیاں لینے گئے ہوئے تھے۔
‎عینی شاہدین کا کہنا ہے کہ ایک بچہ کھیلتے ہوئے اچانک تالاب میں گر گیا۔ اسے بچانے کی کوشش میں دیگر تین بچے بھی پانی میں اتر گئے، تاہم تالاب کی گہرائی 8 سے 10 فٹ ہونے کے باعث چاروں بچے ڈوب گئے۔
‎ریسکیو حکام کے مطابق واقعے کے بعد لاشوں کو ضروری کارروائی کے لیے اسپتال منتقل کر دیا گیا ہے، جبکہ حادثے سے علاقے میں سوگ کی فضا چھا گئی ہے۔