گلگت،برفانی تودہ گرنے سے فرانسیسی کوہ پیما جان کی بازی ہار گیا

گلگت بلتستان کے ضلع گانچھے کی خوبصورت وادی ہوشے میں واقع 7,282 میٹر بلند بلتستان پیک سر کرنے کی بین الاقوامی مہم اس وقت سانحے کا شکار ہو گئی جب برفانی تودہ گرنے سے ایک فرانسیسی کوہ پیما جان کی بازی ہار گیا۔

پولیس حکام کے مطابق 40 سالہ فرانسیسی کوہ پیما پیئر گیلوم تین رکنی بین الاقوامی مہم کا حصہ تھا، جو بلتستان پیک کی چوٹی سر کرنے کی کوشش کر رہی تھی۔ ابتدائی اطلاعات کے مطابق چڑھائی کے دوران اچانک برف اور چٹانوں کا تودہ کوہ پیما پر آ گرا، جس کے نتیجے میں وہ موقع پر ہی جاں بحق ہو گیا۔حادثے کے فوری بعد متعلقہ اداروں نے سرچ اور ریسکیو آپریشن شروع کر دیا۔ امدادی ٹیمیں دشوار گزار اور برف پوش علاقے میں زخمی کوہ پیماؤں تک رسائی حاصل کرنے اور انہیں محفوظ مقام پر منتقل کرنے کے لیے سرگرم عمل ہیں۔گلگت بلتستان پولیس کے ڈپٹی انسپکٹر جنرل (ڈی آئی جی) طفیل احمد میر نے واقعے کی تصدیق کرتے ہوئے بتایا کہ امدادی کارروائیاں جاری ہیں اور تمام متعلقہ ادارے صورتحال پر مسلسل نظر رکھے ہوئے ہیں۔پولیس کے مطابق جاں بحق کوہ پیما کی شناخت فرانسیسی شہری پیئر گیلوم کے طور پر ہوئی ہے، جبکہ دیگر زخمیوں کی حالت اور حادثے سے متعلق مزید تفصیلات جمع کی جا رہی ہیں۔

حکام کا کہنا ہے کہ علاقے کی دشوار جغرافیائی صورتحال اور غیر یقینی موسمی حالات کے باعث ریسکیو آپریشن انتہائی احتیاط اور پیشہ ورانہ مہارت کے ساتھ انجام دیا جا رہا ہے۔ واقعے نے ایک بار پھر دنیا کی بلند اور خطرناک چوٹیوں پر کوہ پیمائی کے دوران درپیش خطرات کو اجاگر کر دیا ہے