کراچی میں عیدالاضحیٰ کی آمد کے ساتھ ہی قربانی کے جانوروں کی چوری کے واقعات میں اضافہ ہونے لگا۔ شہر کے علاقے گلستانِ جوہر بلاک 8 میں نامعلوم ملزمان 25 بکرے چوری کرکے فرار ہوگئے۔
رپورٹ کے مطابق واقعہ جمعہ اور ہفتہ کی درمیانی شب پیش آیا، جہاں پلاٹ پر بندھے قربانی کے بکرے چور سوزوکی میں لاد کر لے گئے۔ عینی شاہدین کے مطابق ملزمان موٹر سائیکل اور کار پر سوار ہو کر آئے تھے۔بکروں کے مالک محمد اسامہ خان نے بتایا کہ چوری ہونے والے بکروں کی مجموعی مالیت 19 لاکھ روپے سے زائد ہے۔ ان کا کہنا تھا کہ وہ بکرے عید قرباں پر فروخت کے لیے لائے تھے۔واقعے کی رپورٹ ملیر کینٹ تھانے میں درج کرادی گئی ہے، جبکہ پولیس نے تفتیش شروع کردی ہے۔ پولیس حکام کے مطابق علاقے میں نصب سی سی ٹی وی کیمروں کی فوٹیج اور ویڈیوز کی مدد سے ملزمان کی شناخت اور گرفتاری کی کوششیں جاری ہیں۔
شہریوں نے قربانی کے جانوروں کی بڑھتی ہوئی چوری پر تشویش کا اظہار کرتے ہوئے مطالبہ کیا ہے کہ مویشی منڈیوں اور رہائشی علاقوں میں سیکیورٹی مزید سخت کی جائے تاکہ ایسے واقعات کی روک تھام ممکن بنائی جاسکے۔