Category: کھیل

‎پاکستان سپر لیگ (PSL) کے گیارہویں ایڈیشن کے فائنل میں حیدرآباد کنگز مین نے زبردست فائٹ بیک کرتے ہوئے میچ کا پانسہ پلٹ دیا۔ ایک معمولی ہدف کا دفاع کرتے ہوئے، کنگز مین کے باؤلرز نے آغاز ہی میں پشاور زلمی کو شدید دباؤ میں ڈال دیا۔
پشاور زلمی کی اننگز آغاز ہی میں لڑکھڑا گئی اور محض 33 رنز پر اس کی 3 اہم وکٹیں گر گئیں۔ ان ابتدائی کامیابیوں نے حیدرآباد کنگز مین کو میچ میں واپس لا کھڑا کیا ہے۔ کنگز مین کے باؤلرز نے نپی تلی باؤلنگ کے ذریعے رنز کی رفتار کو بریک لگا دی ہے اور میچ پر اپنی گرفت مضبوط کر لی ہے۔
اب پشاور زلمی کو ہدف کے تعاقب کے لیے ایک مشکل چیلنج کا سامنا ہے، جہاں انہیں اپنی اننگز کو سنبھالنے اور جیت کی امیدیں برقرار رکھنے کے لیے ایک بڑی شراکت داری کی ضرورت ہے۔

‎پی ایس ایل 11 کے فائنل میں قذافی اسٹیڈیم لاہور میں کھیلے جا رہے اہم مقابلے میں حیدرآباد کنگزمین نے پشاور زلمی کو جیت کے لیے 130 رنز کا ہدف دے دیا ہے۔
‎میچ کے آغاز میں زلمی کے کپتان نے ٹاس جیت کر پہلے فیلڈنگ کا فیصلہ کیا، جو ابتدا میں درست ثابت ہوا۔ اگرچہ کنگزمین نے پاور پلے میں جارحانہ کھیل پیش کیا اور دو وکٹوں کے نقصان پر 69 رنز بنا کر مضبوط آغاز کیا، لیکن اس کے بعد بیٹنگ لائن سنبھل نہ سکی۔
‎صرف 4 رنز کے اضافے سے مزید چار وکٹیں گرنے کے بعد ٹیم دباؤ میں آ گئی اور وکٹوں کی جھڑی لگ گئی۔ پاور پلے کے بعد بیٹنگ مکمل طور پر لڑکھڑا گئی اور پوری ٹیم 18ویں اوور میں آؤٹ ہو گئی۔
‎کپتان لیبوشن 20 رنز بنا کر نمایاں رہے جبکہ معاذ صداقت 11، عثمان خان 8 اور عرفان خان صرف ایک رن بنا سکے۔ گلین میکسویل کھاتہ کھولے بغیر آؤٹ ہوئے جبکہ کوشال پریرا بھی زیادہ دیر وکٹ پر نہ ٹھہر سکے۔
‎دوسری جانب صائم ایوب نے ذمہ دارانہ بیٹنگ کرتے ہوئے ٹیم کو سہارا دینے کی کوشش کی اور 54 رنز کی اننگز کھیلی، تاہم ان کے آؤٹ ہونے کے بعد پوری ٹیم زیادہ دیر نہ ٹک سکی۔
‎پشاور زلمی کی جانب سے ایرون ہارڈی نے شاندار بولنگ کا مظاہرہ کرتے ہوئے 4 وکٹیں حاصل کیں، جبکہ ناہید رانا نے 2 اور محمد باسط و سفیان مقیم نے ایک، ایک کھلاڑی کو آؤٹ کیا۔

نئی دہلی: بھارتی کرکٹ ٹیم کے معروف فاسٹ بولر بھونیشور کمار نہ صرف اپنی شاندار باؤلنگ بلکہ اپنی دلچسپ محبت کی کہانی کے باعث بھی خبروں میں آ گئے ہیں۔ حال ہی میں آئی پی ایل میں 200 وکٹوں کا تاریخی سنگ میل عبور کرنے والے بھونیشور کمار کی ذاتی زندگی کا ایک دلچسپ واقعہ سوشل میڈیا پر توجہ حاصل کر رہا ہے۔

رپورٹس کے مطابق، شادی سے قبل ان کی اہلیہ نوپور ناگرنے انہیں ایک ایسا سوال پوچھا جس نے خود اسٹار کرکٹر کو بھی حیران کر دیا۔ نوپور نے بھونیشور سے پوچھا: “کرکٹ تو ٹھیک ہے، لیکن آپ مستقبل میں جاب کیا کریں گے؟” اس غیر متوقع سوال پر بھونیشور کمار کچھ لمحوں کے لیے ہکا بکا رہ گئے۔بھونیشور کمار نے ایک انٹرویو میں بتایا کہ اس وقت وہ رنجی ٹرافی کھیل رہے تھے اور ہندوستان کے لیے کھیلنے کا خواب رکھتے تھے۔ انہوں نے بڑی مشکل سے نوپور کو قائل کیا کہ کرکٹ ہی ان کا پیشہ اور مستقبل ہے۔ دلچسپ بات یہ ہے کہ نوپور اس وقت ایک سافٹ ویئر انجینئر کے طور پر کام کر رہی تھیں، اس لیے وہ ایک مستحکم کیریئر کے بارے میں سنجیدہ تھیں۔

یہ محبت کی کہانی بچپن سے شروع ہوئی۔ دونوں ایک ہی محلے میں پلے بڑھے اور کم عمری میں ہی ایک دوسرے کو جاننے لگے۔ وقت کے ساتھ یہ دوستی محبت میں بدل گئی۔ نوپور نے انکشاف کیا کہ بھونیشور نے انہیں تین بار پرپوز کیا پہلے میسج، پھر فون کال، اور آخر میں آمنے سامنے،کچھ عرصے تک یہ رشتہ گھر والوں سے پوشیدہ رکھا گیا، تاہم بعد میں دونوں خاندانوں نے اس رشتے کو قبول کر لیا۔ بالآخر 23 نومبر 2017 کو میرٹھ میں دونوں شادی کے بندھن میں بندھ گئے۔

سری لنکا کرکٹ میں بڑی انتظامی تبدیلی، صدر شمی سلوا نے اپنے عہدے سے استعفیٰ دے دیا ہے۔

سری لنکا کرکٹ کی جانب سے جاری کردہ اعلامیے کے مطابق صدر شمی سلوا کے ساتھ ادارے کی ایگزیکٹو کمیٹی نے بھی اجتماعی طور پر استعفیٰ دے دیا ہے۔ اعلامیے میں بتایا گیا ہے کہ شمی سلوا اور ایگزیکٹو کمیٹی کے اراکین نے اپنے استعفوں سے متعلق باقاعدہ طور پر سری لنکا کے وزیرِ کھیل سنیل کمارا گاماگے کو آگاہ کر دیا ہے۔
ذرائع کے مطابق اس فیصلے کے بعد سری لنکا کرکٹ کے انتظامی ڈھانچے میں فوری تبدیلی کا امکان ہے اور ادارے کی ذمہ داریاں عارضی طور پر ایک عبوری انتظامیہ کے سپرد کی جائیں گی جو روزمرہ امور اور کرکٹ معاملات کو سنبھالے گی۔

دوسری جانب سری لنکن میڈیا رپورٹس میں دعویٰ کیا گیا ہے کہ شمی سلوا اور ایگزیکٹو کمیٹی کے مستعفی ہونے کے بعد بینکر ایرن وکرامارتنے کو سری لنکا کرکٹ کی قیادت سنبھالنے کے لیے مضبوط امیدوار کے طور پر دیکھا جا رہا ہے۔ تاہم اس حوالے سے حتمی فیصلہ حکومتی اور کرکٹ حکام کی مشاورت کے بعد کیا جائے گا۔

وفاقی وزیر داخلہ محسن نقوی نے پی ایس ایل 11 فائنل میں شائقین کی شرکت سے متعلق اہم بیان دیا ہے

وفاقی وزیر داخلہ محسن نقوی نے سماجی رابطے کی ویب سائٹ ایکس (ٹوئٹر) پر اپنے بیان میں کہا ہے کہ انہوں نے وزیراعظم شہباز شریف سے کرکٹ شائقین کو اسٹیڈیم میں آنے کی اجازت دینے کی درخواست کی تھی۔ انہوں نے بتایا کہ وزیراعظم بھی شائقین کو اجازت دینے کے خواہاں تھے، تاہم ملک میں جاری کفایت شعاری مہم اور ایندھن کے کم استعمال کی پالیسی کے باعث اس معاملے پر احتیاط کی جا رہی تھی۔محسن نقوی کے مطابق فرنچائز مالکان کی درخواست پر وزیراعظم نے پی ایس ایل 11 کے فائنل میں شائقین کو اسٹیڈیم آنے کی خصوصی اجازت دے دی، جس پر انہوں نے وزیراعظم کا شکریہ ادا کیا اور شائقین کے لیے اس سہولت کو خوش آئند قرار دیا۔