انٹرنیشنل کرکٹ کونسل (آئی سی سی) نے حمل اور زچگی کے بعد کرکٹ میں واپسی سے متعلق نئے رہنما اصول متعارف کرا دیے ہیں۔
انگلینڈ میں جاری ویمنز ٹی ٹوئنٹی ورلڈ کپ کے دوران جاری کیے گئے ان رہنما اصولوں کا مقصد کھلاڑیوں، کرکٹ بورڈز، کوچز اور طبی عملے کو ایسی عملی رہنمائی فراہم کرنا ہے جس سے ماؤں کے لیے دوبارہ اعلیٰ سطح کی کرکٹ کھیلنا آسان ہو سکے۔
آئی سی سی کا کہنا ہے کہ خواتین کھلاڑیوں کی صحت اور فلاح و بہبود اس کی اولین ترجیحات میں شامل ہے، اور یہ اقدام خواتین کرکٹ کی ترقی کے لیے جاری پالیسیوں کا اہم حصہ ہے نئی گائیڈ لائنز میں رکن ممالک کو مقامی قوانین کے مطابق اپنی پالیسیاں بنانے میں رہنمائی فراہم کی گئی ہے، جبکہ کھلاڑیوں کو جسمانی اور ذہنی طور پر دوبارہ کھیل کے لیے تیار ہو نے میں مدد دی جائے گی اس مقصد کے لیے 6 مراحل پر مشتمل ایک فریم ورک متعارف کرایا گیا ہے، جس میں تیاری، طبی جائزہ، بحالی، جسمانی ری کنڈیشننگ، کھیل میں واپسی اور مسلسل نگرانی شامل ہیں، یہ نظام بچے کی پیدائش کے بعد ابتدائی بحالی سے لے کر مکمل طور پر کرکٹ میں واپسی تک رہنمائی فراہم کرے گا۔
آئی سی سی کی میڈیکل ایڈوائزری کمیٹی کی رکن اور آسٹریلوی ٹیم کی ڈاکٹر فلپا اِنج کے مطابق یہ اقدام اس سوچ کو فروغ دیتا ہے کہ بچے کی پیدائش کسی خاتون کرکٹر کے کیریئر کا اختتام نہیں ہونی چاہیے ان ہدایات میں جسمانی بحالی، ذہنی صحت، مرحلہ وار ٹریننگ، کرکٹ کے لیے مخصوص فٹنس اور مسلسل طبی نگرانی جیسے اہم پہلو شامل ہیں رہنما اصولوں میں بچوں کی دیکھ بھال سے متعلق مشورے، کھیل کے مقامات پر فیڈنگ کی مناسب سہولیات، لچکدار ٹریننگ ماحول اور سفری معاونت کی تجاویز بھی شامل کی گئی ہیں۔
واضح رہے کہ ویسٹ انڈیز کی آفی فلیچر اور پاکستان کی سابق کپتان بسمہ معروف سمیت کئی کھلاڑی زچگی کے بعد بین الاقوامی کرکٹ میں کامیاب واپسی کر چکی ہیں جس سے اس اقدام کی اہمیت مزید بڑھ گئی ہے۔
ویسٹ انڈیز کی کرکٹر آفی فلیچر اس اقدام کو خواتین کرکٹ کے لیے مثبت پیش رفت قرار دیا، کہ نئی پالیسیاں کھلاڑیوں کو خاندان اور کیریئر دونوں کو ساتھ لے کر چلنے کا اعتماد فراہم کریں گی، جبکہ مضبوط خاندانی اور پیشہ ورانہ سپورٹ کے ساتھ واپسی ممکن ہے، آئی سی سی ترجمان کے مطابق خوا تین کرکٹ کی تیزی سے ترقی کے پیش نظر یہ ضروری ہے کہ کھلاڑیوں کے لیے ایسا ماحول فراہم کیا جائے جو ان کی زندگی کے ہر مرحلے میں معاون ہو۔
