لاہور: پاکستان کرکٹ بورڈ (پی سی بی) نے قومی کرکٹرز کو مختلف بین الاقوامی ٹی ٹوئنٹی لیگز میں شرکت کے لیے این او سیز جاری کر دیے ہیں۔
پی سی بی ذرائع کے مطابق محمد حارث، شاداب خان، محمد نعیم، عبداللہ شفیق اور فرحان یوسف سمیت متعدد کھلاڑیوں کو بیرونِ ملک لیگز کھیلنے کی اجازت دے دی گئی ہے۔اس کے علاوہ شمائل حسین، مہران ممتاز، عثمان خان، علی شبیر، محمد فاروق، محمد عمران، محمد باسط اور خلیل احمد کو بھی این او سی جاری کر دیا گیا ہے۔ذرائع کے مطابق مجموعی طور پر 13 پاکستانی کرکٹرز کو گلوبل سپر لیگ 2026 میں شرکت کے لیے این او سیز دیے گئے ہیں، جبکہ معاذ صداقت کو کیریبین پریمیئر لیگ (سی پی ایل) میں شرکت کے لیے بھی پی سی بی کی جانب سے این او سی جاری کیا گیا ہے۔
پی سی بی کا کہنا ہے کہ این او سیز کا اجرا بورڈ کی پالیسی اور قومی و ڈومیسٹک مصروفیات کو مدنظر رکھتے ہوئے کیا گیا ہے، تاکہ کھلاڑی بین الاقوامی لیگز میں شرکت کے ساتھ ساتھ قومی ذمہ داریوں کو بھی احسن انداز میں نبھا سکیں۔