سکیورٹیز اینڈ ایکسچینج کمیشن آف پاکستان (ایس ای سی پی) نے رواں سال فروری سے اپریل تک کمپنی رجسٹریشن کے اعداد و شمار جاری کر دیے ہیں، جن کے مطابق ملک میں تین ماہ کے دوران 10 ہزار 511 نئی کمپنیاں رجسٹر ہوئیں۔
ایس ای سی پی کے مطابق گزشتہ سال اسی عرصے میں رجسٹرڈ ہونے والی کمپنیوں کی تعداد 8 ہزار 693 تھی، جس کے مقابلے میں اس سال نمایاں اضافہ ریکارڈ کیا گیا ہے۔
اعلامیے میں بتایا گیا کہ صرف اپریل 2026 کے دوران 4 ہزار 82 نئی کمپنیاں رجسٹر ہوئیں، جبکہ 22 سے زائد ممالک کے سرمایہ کاروں نے بھی پاکستان میں کاروباری ادارے قائم کیے۔
ایس ای سی پی کے مطابق غیر ملکی سرمایہ کاروں کی کمپنیوں کے مجموعی سرمایہ میں 218 فیصد اضافہ دیکھا گیا۔
اعداد و شمار کے مطابق غیر ملکی سرمایہ کاروں کا ادا شدہ سرمایہ 88 کروڑ 20 لاکھ روپے تک پہنچ گیا، جبکہ گزشتہ سال یہی سرمایہ 27 کروڑ 70 لاکھ روپے تھا۔
اعلامیے میں کہا گیا ہے کہ پاکستان میں تجارت، خدمات، انفارمیشن ٹیکنالوجی، تعمیرات اور معدنیات کے شعبوں میں سب سے زیادہ کمپنیاں رجسٹر کی گئیں۔
ایس ای سی پی نے بتایا کہ کمپنیوں کی ریگولیٹری کمپلائنس میں بھی نمایاں بہتری آئی ہے اور اس میں 61 فیصد اضافہ ریکارڈ کیا گیا۔
اسی طرح رواں تین ماہ کے دوران 61 ہزار 960 کمپنیوں نے اپنے سالانہ ریٹرنز جمع کرائے، جبکہ گزشتہ سال اسی عرصے میں یہ تعداد 38 ہزار 326 تھی۔
کمیشن کے مطابق نان لسٹڈ کمپنیوں کے شیئر سرٹیفکیٹس کو ڈیجیٹلائز کرنے کا عمل بھی شروع کر دیا گیا ہے، جس سے شیئر ہولڈنگ تنازعات کے خاتمے میں مدد ملے گی۔
اس مقصد کیلئے اسلام آباد، کراچی، لاہور، سیالکوٹ اور فیصل آباد میں خصوصی سہولت مراکز قائم کیے جائیں گے۔
ایس ای سی پی نے مزید کہا کہ مستقبل میں کمپنی رجسٹریشن کے نظام کو مزید خودکار بنایا جائے گا اور کمپنی نام ریزرویشن کیلئے مصنوعی ذہانت یعنی اے آئی ٹیکنالوجی کا استعمال بھی متعارف کرایا جائے گا۔
پاکستان میں تین ماہ میں 10 ہزار سے زائد نئی کمپنیاں رجسٹرڈ
