کراچی کے لانڈھی ایکسپورٹ پروسسنگ زون میں واقع فیکٹری میں لگنے والی آگ شدت اختیار کر گئی ہے، جبکہ اسلام آباد کی مارگلہ پہاڑیوں پر بھی دو مختلف مقامات پر آگ بھڑک اٹھی ہے۔
کراچی میں فیکٹری میں لگنے والی آگ کو تیسرے درجے کی آگ قرار دیا گیا ہے، جہاں کئی گھنٹوں سے فائرفائٹرز آگ پر قابو پانے کی کوششوں میں مصروف ہیں۔
ریسکیو حکام کے مطابق آگ بجھانے کیلئے 14 فائر ٹینڈرز اور ایک اسنارکل استعمال کیا جا رہا ہے، تاہم آگ کی شدت کے باعث امدادی کارروائیوں میں مشکلات پیش آ رہی ہیں۔
عینی شاہدین کے مطابق فیکٹری سے دھوئیں کے گہرے بادل اٹھتے دکھائی دیے جبکہ علاقے میں خوف و ہراس پھیل گیا۔
تاحال کسی جانی نقصان کی تصدیق نہیں ہوئی، تاہم حکام نے احتیاطی اقدامات کے طور پر قریبی عمارتوں کو بھی الرٹ کر دیا ہے۔
دوسری جانب اسلام آباد میں مارگلہ کی پہاڑیوں پر دو مختلف مقامات پر آگ بھڑک اٹھی، جس نے شدید گرمی اور خشک موسم کے باعث تیزی سے پھیلنا شروع کر دیا۔
رپورٹس کے مطابق آگ مارگلہ کی پہاڑی منگھیال کے علاقے میں لگی ہوئی ہے اور سیاہ دھواں دور دور تک دیکھا جا سکتا ہے۔
مقامی افراد کا کہنا ہے کہ آگ کی شدت میں مسلسل اضافہ ہو رہا ہے جبکہ اب تک سی ڈی اے کے فائرفائٹرز اور اسلام آباد وائلڈ لائف مینجمنٹ بورڈ کا عملہ متاثرہ مقام تک نہیں پہنچ سکا۔
ماہرین نے خدشہ ظاہر کیا ہے کہ اگر بروقت کارروائی نہ کی گئی تو قیمتی جنگلات اور جنگلی حیات کو شدید نقصان پہنچ سکتا ہے۔
ماحولیاتی ماہرین کے مطابق گرمی کی شدت، خشک موسم اور تیز ہوائیں جنگلاتی آگ کو مزید خطرناک بنا رہی ہیں، جبکہ شہریوں کو متاثرہ علاقوں سے دور رہنے کی ہدایت بھی جاری کی گئی ہے۔
کراچی فیکٹری اور مارگلہ پہاڑیوں میں آگ بے قابو، ریسکیو آپریشن جاری
