Author: Aqsa Younas Rana

‎اسلام آباد: وزیراعظم شہباز شریف نے پاکستان ٹیلی کمیونیکیشن متنازع بل 2026 پر عوامی، پارلیمانی اور مختلف شعبوں کی جانب سے سامنے آنے والے تحفظات کے بعد اہم قدم اٹھاتے ہوئے بل پر نظرثانی کے لیے 11 رکنی اعلیٰ سطح کی کمیٹی تشکیل دے دی ہے۔ وزیراعظم نے کمیٹی کو ہدایت کی ہے کہ وہ صرف تین روز کے اندر اپنی حتمی سفارشات تیار کرکے رپورٹ پیش کرے۔
‎سرکاری اعلامیے کے مطابق کمیٹی کی سربراہی وفاقی وزیر قانون کریں گے، جبکہ اس میں سینیٹر شیری رحمان، وفاقی وزیر آئی ٹی، اٹارنی جنرل پاکستان، سیکریٹری آئی ٹی اور ممتاز قانونی ماہرین کو بھی شامل کیا گیا ہے۔ کمیٹی کو اختیار دیا گیا ہے کہ اگر ضرورت محسوس ہو تو مزید بیرونی ماہرین کو بھی مشاورتی عمل میں شامل کیا جا سکے۔
‎کمیٹی مجوزہ ٹیلی کمیونیکیشن قانون کے تمام اہم پہلوؤں کا تفصیلی جائزہ لے گی، خاص طور پر ٹیلی کام سیکٹر، نجی ملکیتی حقوق اور مجوزہ رائٹ آف وے فریم ورک سے متعلق شقوں کا قانونی اور آئینی تناظر میں جائزہ لیا جائے گا۔
‎اس کے علاوہ نجی املاک اور ہاؤسنگ سوسائٹیز تک ٹیلی کام انفراسٹرکچر، انٹرنیٹ لائنز اور موبائل ٹاورز کی تنصیب کے لیے رسائی سے متعلق قوانین کا بھی باریک بینی سے مطالعہ کیا جائے گا تاکہ شہریوں کے جائیداد کے حقوق اور جدید ٹیلی کمیونیکیشن سہولیات کے درمیان متوازن اور منصفانہ نظام وضع کیا جا سکے۔
‎کمیٹی ہاؤسنگ سوسائٹیز کے لیے خودکار منظوری کے مجوزہ طریقہ کار، معاوضے، فیسوں، کرایوں اور دیگر مالی معاملات کا بھی جائزہ لے گی۔ اس کے ساتھ ساتھ بل میں شامل جرمانوں، تنازعات کے حل کے طریقہ کار اور دیگر قانونی شقوں میں بہتری کے لیے سفارشات بھی مرتب کی جائیں گی۔
ٹیلی کام کمپنیوں کو شہریوں کی جائیدادوں تک آزادانہ رسائی کا متنازع قانون کا جائزہ لینے والی کمیٹی کا وفاقی وزیر قانون اعظم نذیر تارڑ کی زیر صدارت ان کیمرا اجلاس ختم ہوگیا۔
وفاقی وزیر قانون اعظم نذیر تارڑ نے کہا نجی جائیداد پر قبضے یا زبردستی ٹاورز لگانے کا کوئی ارادہ نہیں، یقین دلاتا ہوں کہ بل سے کسی کی ذاتی ملکیت یا پرائیویسی متاثر نہیں ہوگی۔
ان کا کہنا ہے کہ عوامی خدشات دور کرنے کیلئے قانون میں مزید وضاحت شامل کی جائے گی، مالک کی اجازت کے بغیر نجی املاک پر ٹاور نہیں لگے گا، اعتراضات جمہوری عمل کا حصہ ہیں، معاملہ جلد حل ہوجائے گا۔
اعظم نذیر تارڑ نے کہا کہ بل کی چند شقوں پر اعتراضات ہیں، مشاورت کا عمل جاری ہے، ڈیجیٹل ترقی اور کنیکٹیویٹی کیلئے قانون سازی ناگزیر ہے، آئی ٹی، براڈ بینڈ اور اے آئی کی ترقی کیلئے رکاوٹیں دور کرنا لازمی ہے۔

‎اسلام آباد: وزیراعظم شہباز شریف نے یوم عاشورہ کے موقع پر 9 اور 10 محرم الحرام کو ملک بھر میں سرکاری تعطیلات کی منظوری دے دی ہے۔ اس فیصلے کے تحت دونوں دن تمام وفاقی سرکاری دفاتر اور ادارے بند رہیں گے جبکہ ملک بھر میں یوم عاشورہ کے سلسلے میں مذہبی اجتماعات اور جلوس منعقد کیے جائیں گے۔
‎سرکاری اعلامیے کے مطابق 9 اور 10 محرم الحرام کے دوران حضرت امام حسینؓ اور شہدائے کربلا کی عظیم قربانیوں کی یاد میں مجالس عزا اور ماتمی جلوسوں کا انعقاد کیا جائے گا، جن میں لاکھوں عزادار شرکت کریں گے۔
‎دوسری جانب سندھ حکومت نے بھی 9 اور 10 محرم الحرام کے موقع پر عام تعطیلات کا نوٹیفکیشن جاری کر دیا ہے۔ نوٹیفکیشن کے مطابق 25 اور 26 جون کو صوبے بھر میں تمام سرکاری دفاتر، خودمختار ادارے اور سرکاری تنظیمیں بند رہیں گی۔
‎محرم الحرام کے دوران امن و امان کو یقینی بنانے کے لیے وفاقی اور صوبائی حکومتوں نے سکیورٹی کے خصوصی انتظامات کرنے کی ہدایت جاری کر دی ہے۔ پولیس، رینجرز اور دیگر قانون نافذ کرنے والے ادارے جلوسوں اور مجالس کی سکیورٹی پر مامور ہوں گے جبکہ حساس مقامات پر اضافی نفری تعینات کی جائے گی۔
‎انتظامیہ کی جانب سے مختلف شہروں میں ٹریفک پلان بھی مرتب کیا جا رہا ہے تاکہ جلوسوں کے راستوں پر ٹریفک کی روانی برقرار رہے اور شہریوں کو متبادل راستوں سے متعلق بروقت آگاہ کیا جا سکے۔
‎یوم عاشورہ اسلامی تاریخ کا ایک اہم دن ہے، جس پر پاکستان سمیت دنیا بھر کے مسلمان نواسۂ رسول حضرت امام حسینؓ اور ان کے جانثار ساتھیوں کی قربانیوں کو خراج عقیدت پیش کرتے ہیں۔ اس موقع پر ملک بھر میں مذہبی احترام اور عقیدت کے ساتھ مختلف تقریبات اور دعائیہ اجتماعات بھی منعقد کیے جائیں گے۔

‎سپریم کورٹ نے اسکول میں 10 سالہ طالبہ سے زیادتی کے مقدمے میں سزا یافتہ مجرم کی سزائے موت کو عمر قید میں تبدیل کر دیا، تاہم تین لاکھ روپے جرمانہ، چھ ماہ اضافی قید اور متاثرہ بچی کو ایک لاکھ روپے معاوضہ ادا کرنے کا حکم برقرار رکھا ہے۔
‎جسٹس صلاح الدین پنہور کی جانب سے جاری کیے گئے تحریری فیصلے میں عدالت نے قرار دیا کہ تعلیمی اداروں اور ان کے اطراف طالبات کا تحفظ ریاست کی بنیادی آئینی ذمہ داری ہے۔ عدالت نے وفاقی اور صوبائی حکومتوں کو بچوں اور خواتین کے تحفظ کے لیے مؤثر اقدامات کرنے کی ہدایت بھی جاری کی۔
‎سپریم کورٹ نے تمام صوبائی انسپکٹر جنرلز اور آئی جی اسلام آباد کو حکم دیا کہ اسکولوں، کالجوں اور جامعات کے باہر پولیس گشت میں اضافہ کیا جائے اور طالبات کی حفاظت کو یقینی بنانے کے لیے فوری اور مؤثر اقدامات کیے جائیں۔
‎عدالت نے یہ بھی ہدایت کی کہ خواتین اور بچوں کو ہراساں کرنے یا ان کے خلاف جرائم کی شکایات موصول ہونے پر پولیس کسی قسم کی تاخیر کے بغیر قانونی کارروائی کرے تاکہ متاثرین کو بروقت انصاف فراہم کیا جا سکے۔
‎فیصلے میں وفاقی اور صوبائی حکومتوں کو سندھ میڈیکل لیگل ایکٹ 2023 کی طرز پر جدید میڈیکل لیگل سروسز قائم کرنے کی بھی ہدایت دی گئی، تاکہ جنسی جرائم کے مقدمات میں شواہد کو محفوظ بنانے اور متاثرین کو فوری طبی سہولیات فراہم کرنے کا نظام مزید بہتر بنایا جا سکے۔
‎عدالتی فیصلے کے مطابق یہ واقعہ شیخوپورہ کے ایک اسکول میں پیش آیا تھا، جہاں اسکول کے سویپر نے 10 سالہ طالبہ کو جنسی زیادتی کا نشانہ بنایا۔ میڈیکل رپورٹ میں بچی کے جسم پر تشدد کے نشانات اور زیادتی کی تصدیق ہوئی تھی۔
‎سپریم کورٹ نے اپنے فیصلے میں واضح کیا کہ فرانزک لیبارٹری کی رپورٹ میں سیمن نہ ملنا اس مقدمے کو ختم کرنے کی بنیاد نہیں بن سکتا۔ عدالت نے یہ بھی قرار دیا کہ ایف آئی آر درج ہونے میں تین دن کی تاخیر سے ملزم کو شک کا فائدہ نہیں دیا جا سکتا، کیونکہ ہر مقدمے کے حالات مختلف ہوتے ہیں۔
‎فیصلے میں عدالت نے نشاندہی کی کہ واقعے کے بعد اسکول انتظامیہ نے معاملہ چھپانے کی کوشش کی، متاثرہ بچی کو اسکول کے اندر ہی طبی امداد دی گئی اور بروقت اطلاع نہیں دی گئی۔ عدالت نے قرار دیا کہ انتظامیہ کی خاموشی یا غفلت کا نقصان متاثرہ بچی اور اس کی بیوہ والدہ کو نہیں پہنچایا جا سکتا۔
‎سپریم کورٹ نے یہ بھی کہا کہ ملزم کا یہ دعویٰ کہ اسے اسکول گیٹ پر ہونے والے جھگڑے کی وجہ سے جھوٹے مقدمے میں پھنسایا گیا، شواہد کی روشنی میں ثابت نہیں ہو سکا۔