Baaghi TV

Author: ممتاز حیدر

  • قصور یوم عاشورہ کے موقع پر سکیورٹی کے سخت انتظامات مکمل

    قصور یوم عاشورہ کے موقع پر سکیورٹی کے سخت انتظامات مکمل

    قصور ( طارق نوید سندھو سے ) پولیس نےیوم عاشورہ کے موقع پر 24 جلوس اور 20 مجالس کیلئے فول پروف سکیورٹی پلان تشکیل دے دیا

    یوم عاشورہ پر 2500 کے قریب پولیس افسران اور اہلکار سکیورٹی کے فرائض منصبی سر انجام دیں گے۔01 ایس پی، 09 ڈی ایس پی، 31 انسپکٹر، 328 اپر سپارڈینٹس، 177 ہیڈکا نسٹیبل، 1400 کانسٹیبل و لیڈی سٹاف شامل ہیں،ریزرو پنجاب کانسٹیبلری، ایلیٹ فورس، دفتری و کلیریکل سٹاف، وولنٹیئرز، سول ڈیفنس کے اہلکار بھی ڈیوٹی سرانجام دیں گے،تین لیئر ڈیوٹی کو یقینی بنایا جائے گا، ضلع بھر کے داخلی اور خارجی راستوں پرسخت چیکنگ کی جائے گی۔ترجمان قصور پولیس کے مطابق شہر کے مرکزی جلوس کی سیف سٹی کیمروں جبکہ دیگر جلوسوں کی 320 سی سی ٹی ویی کیمروں سے نگرانی کی جائے گی۔مجالس اور جلوسوں کے دوران چھتوں پر مسلح پولیس اہلکار ڈیوٹیاں سرانجام دیں گے۔جلوس کے راستے میں آنے والے تمام چھوٹے بڑے راستوں اور گلیوں کو خاردار تاریں اور قناعتیں لگا کربند کیا جائیگا۔جلوس شروع ہونے سے قبل جلوس کے روٹ کی اسپیشل چیکنگ کی جائے گی اور جلوس کے روٹ کوبم ڈسپوزل سکواڈکلیئر کرےگی۔مجلس اور جلوس میں شامل ہونے والے عزاداروں کو واک تھرو گیٹ اور میٹل ڈیٹیکٹر سے چیک کیا جائے گا۔شہری اپنے اردگرد مشکوک افراد پر کڑی نظر رکھیں، کسی بھی مشکوک سرگرمی کی صورت میں 15 پر کال کریں.قصور پولیس یوم عاشورہ پر اپنے پیشہ ورانہ فرائض بھر پور ذمہ داری اور جذبہ حب الوطنی سے سرانجام دے گی

  • کھڈیاں خاص،بلیک میلنگ،نازیبا ویڈیو،جنسی سیکنڈل کا ماسٹر مائنڈ کون؟

    کھڈیاں خاص،بلیک میلنگ،نازیبا ویڈیو،جنسی سیکنڈل کا ماسٹر مائنڈ کون؟

    رپورٹ،طارق نوید سندھو،بیوروچیف باغی ٹی وی قصور
    ضلع قصور کے علاقے کھڈیاں خاص کے نواحی گاؤں قبر کوٹ میں مبینہ طور پر بلیک میلنگ، ہنی ٹریپ اور نازیبا ویڈیوز بنانے کا ایک بڑا سکینڈل سامنے آنے کا دعویٰ کیا گیا ہے، جس کے بعد علاقے میں تشویش کی لہر دوڑ گئی ہے۔

    دستیاب اطلاعات کے مطابق قبر کوٹ کے علاقے میں چار سے پانچ نوجوان گزشتہ کئی برسوں سے لڑکیوں کو مختلف حربوں کے ذریعے اپنے جال میں پھنساتے رہے اور بعد ازاں ان کی آڈیوز، تصاویر اور ویڈیوز بنا کر مبینہ طور پر بلیک میل کرتے رہے۔ ذرائع کا کہنا ہے کہ متاثرہ لڑکیوں کی تعداد درجنوں میں ہو سکتی ہے جبکہ ہزاروں تصاویر اور ویڈیوز کے ذریعے دباؤ ڈالنے کے الزامات بھی سامنے آئے ہیں۔میڈیا رپورٹس کے مطابق متاثرہ افراد میں شامل ایک لڑکی نے شناخت ظاہر نہ کرنے کی شرط پر بتایا کہ ملزمان پہلے سوشل رابطوں یا دوستی کے ذریعے اعتماد حاصل کرتے، پھر گفتگو کی ریکارڈنگ کرتے تھے۔ بعد ازاں اسی مواد کو استعمال کرتے ہوئے مبینہ طور پر لڑکیوں کو ہراساں اور بلیک میل کیا جاتا تھا۔

    ذرائع کے مطابق ملزمان میں محمد صدیق، محمد افتخار اور دیگر افراد شامل ہیں۔ الزام ہے کہ ایک ملزم محمد صدیق نے اپنے گھر میں کیمرے نصب کر رکھے تھے جبکہ موبائل فون کے ذریعے اسکرین ریکارڈنگ کرکے بھی مواد جمع کیا جاتا رہا۔مقامی افراد کا کہنا ہے کہ کئی خاندان عزت اور سماجی دباؤ کے باعث خاموش رہے، جس کے نتیجے میں یہ معاملہ طویل عرصے تک منظر عام پر نہ آ سکا۔

  • آزادکشمیر کے اینٹری پوائنٹس بند ہونے کا شرپسند عناصر کا جھوٹا پروپیگنڈا دم توڑ گیا

    آزادکشمیر کے اینٹری پوائنٹس بند ہونے کا شرپسند عناصر کا جھوٹا پروپیگنڈا دم توڑ گیا

    آزادکشمیر کے اینٹری پوائنٹس بند ہونے کا شرپسند عناصر کا جھوٹا پروپیگنڈا دم توڑ گیا

    آزادکشمیرسے پاکستان کے اینٹری پوائنٹس مکمل فعال،گاڑیوں اورعوام کی آمدورفت معمول کے مطابق جاری ہے،مانسہرہ کےعلاقہ برارکوٹ کی چوکی سے آزاد کشمیر اور کے پی کے عوام کی بلا روک ٹوک نقل وحرکت دیکھی جاسکتی ہے،پولیس چوکی برارکوٹ کے انچارج کے مطابق؛ضروری دستاویزی اور سیکیورٹی چیکنگ کے بعد دونوں اطراف کے شہریوں کو نقل وحرکت کی مکمل آزادی ہےمال بردار گاڑیوں بھی حسب معمول اشیائے خورونوش کی ترسیل میں مصروف ہیں،دوسری جانب ڈپٹی کمشنرمظفرآباد منیرقریشی کا کہنا ہے کہ؛ مظفرآباد میں اشیائے خورونوش کی نہ تو کوئی کمی ہے اور نہ ہی ان کی ترسیل میں کوئی رکاوٹ ہے،ایس ایس پی مظفرآباد ریاض مغل کے مطابق: اینٹری پوائنٹس پر تعینات نفری صرف معمول کی سیکیورٹی چیکنگ کیلئے ہے،عوام یا گاڑیوں کی آمدورفت پر کوئی پابندی نہیں ،اس موقع پر ڈرائیورز اور اشیائے خورونوش کی ترسیل سے منسلک تاجروں نے بھی سپلائی کی بلاتعطل آمدورفت پر مکمل اطمینان کا اظہارکیا۔

  • وینزویلا میں زلزلے سے تباہی،ہلاکتیں 167 ہو گئیں

    وینزویلا میں زلزلے سے تباہی،ہلاکتیں 167 ہو گئیں

    کراکس: وینزویلا میں پے در پے آنے والے طاقتور زلزلوں نے بڑے پیمانے پر تباہی مچا دی، جبکہ حکام اور ماہرین نے ہزاروں افراد کے جاں بحق ہونے کا خدشہ ظاہر کیا ہے۔

    امریکی جیولوجیکل سروے (USGS) کے مطابق وینزویلا میں پہلے 7.1 شدت کا زلزلہ ریکارڈ کیا گیا، جس کے چند ہی منٹ بعد 7.5 شدت کا ایک اور طاقتور زلزلہ آیا۔ مقامی وقت کے مطابق شام 6 بجے آنے والے ان شدید جھٹکوں سے عمارتیں لرز اٹھیں اور متعدد علاقوں میں خوف و ہراس پھیل گیا۔رپورٹس کے مطابق دارالحکومت کراکس سمیت ملک کے مختلف شہروں میں درجنوں عمارتیں منہدم ہو گئی ہیں، جبکہ بڑی تعداد میں افراد کے ملبے تلے دبے ہونے کا خدشہ ظاہر کیا جا رہا ہے۔ امدادی ٹیمیں متاثرہ علاقوں میں سرچ اینڈ ریسکیو آپریشن میں مصروف ہیں۔وینزویلا کی قائم مقام صدر ڈیلسی روڈریگز نے زلزلے کو قومی سانحہ قرار دیتے ہوئے کہا ہے کہ قدرتی آفت کے نتیجے میں کئی رہائشی اور تجارتی عمارتیں تباہ ہو گئی ہیں۔ انہوں نے بتایا کہ کراکس کے مرکزی مائی کیٹیا ایئرپورٹ کو بھی شدید نقصان پہنچا ہے۔

    حکام کے مطابق اب تک 167 افراد کی ہلاکت اور 970 سے زائد افراد کے زخمی ہونے کی تصدیق ہو چکی ہے، تاہم ہلاکتوں میں مزید اضافے کا خدشہ ہے کیونکہ متعدد علاقے اب بھی متاثر ہیں اور ریسکیو کارروائیاں جاری ہیں۔حکومت نے ملک بھر میں ہنگامی صورتحال نافذ کرتے ہوئے بڑے پیمانے پر امدادی سرگرمیوں کا آغاز کر دیا ہے۔ فوج، سول ڈیفنس اور طبی ٹیموں کو متاثرہ علاقوں میں تعینات کر دیا گیا ہے۔دوسری جانب امریکا کی ریاست کیلیفورنیا کے شمالی علاقوں میں بھی 5.6 شدت کا زلزلہ محسوس کیا گیا، جس کے بعد تقریباً 10 لاکھ افراد کے لیے الرٹ جاری کر دیا گیا ہے۔ تاہم ابتدائی اطلاعات کے مطابق وہاں کسی بڑے جانی نقصان کی اطلاع نہیں ملی۔امریکی جیولوجیکل سروے نے خبردار کیا ہے کہ وینزویلا میں آنے والے تباہ کن زلزلوں کے باعث اموات کی تعداد 10 ہزار سے ایک لاکھ تک پہنچنے کا خدشہ موجود ہے۔

    امریکی صدر ڈونلڈ ٹرمپ نے وینزویلا کی صورتحال پر تشویش کا اظہار کرتے ہوئے کہا ہے کہ ابتدائی رپورٹس حوصلہ افزا نہیں ہیں اور بڑی تعداد میں جانی نقصان ہوا ہے۔ انہوں نے متعلقہ امریکی اداروں کو فوری انسانی امداد فراہم کرنے کی ہدایت بھی جاری کر دی ہے۔

    ماہرین کے مطابق آنے والے دنوں میں آفٹر شاکس کا سلسلہ جاری رہ سکتا ہے، جس کے باعث متاثرہ علاقوں میں مزید احتیاطی اقدامات کی ضرورت ہے۔

  • افغان طالبان رجیم کی جانب سے فتنہ الخوارج کی پشت پناہی کا عالمی اعتراف

    افغان طالبان رجیم کی جانب سے فتنہ الخوارج کی پشت پناہی کا عالمی اعتراف

    افغان طالبان رجیم کی جانب سے فتنہ الخوارج کی پشت پناہی کا عالمی اعتراف سامنے آیا ہے

    پاکستان کیخلاف دہشتگردی میں فتنہ الخوارج کو افغان طالبان رجیم کی سرپرستی حاصل ہے،افغانستان میں برطانیہ کے خصوصی نمائندے رچرڈ لنڈسے نےافغان ٹی وی کو انٹرویو دیا ہے جس میں کہا ہے کہ فتنہ الخوارج دہشت گرد گروہ ،اسےافغانستان سے حمایت مل رہی ہے،فتنہ الخوارج کے قبائلی سرحدی علاقے میں خاندانی روابط اور حمایت بھی موجود ہے، کابل اورقندھارمیں طالبان رجیم کو فتنہ الخوارج کیخلاف فیصلہ کن اقدامات کی ضرورت ہے،فتنہ الخوارج کی سپورٹ سے متعلق سوال افغان طالبان سے پوچھنا چاہیے ، افغانستان میں فتنہ الخوارج کیلئے تربیتی کیمپس موجود ہیں، ہتھیاراستعمال ہو رہے ہیں اورمالی مدد فراہم کی جارہی ہے،پاکستان میں سکیورٹی آپریشنزسے بچنے والےدہشتگردوں کیلئے افغانستان محفوظ پناہ گاہ بنا ہوا ہے،فتنہ الخوارج کی جانب سے خطے میں عدم استحکام پر پاکستان کا فوجی ردعمل سامنے آرہا ہے،

    دفاعی تجزیہ کار وں کا کہنا ہے کہ افغانستان میں دہشتگردگروہوں کی موجودگی اورنیٹ ورکس خطے کی سکیورٹی کیلئے خطرہ ہیں،دہشتگردوں کی مالی معاونت، تربیت واسلحہ فراہمی کا نتیجہ آپریشن غضب للحق کی صورت میں سامنے آتا ہے،

  • مسلم ممالک کے اتحاد کے لیے طاقتور بلاک کی ضرورت، ایرانی صدر مسعود پزشکیان

    مسلم ممالک کے اتحاد کے لیے طاقتور بلاک کی ضرورت، ایرانی صدر مسعود پزشکیان

    ایرانی صدر مسعود پزشکیان نے اسلامی ممالک کے درمیان اتحاد و یکجہتی کو فروغ دینے کے لیے ایک مضبوط اور مؤثر مسلم بلاک کے قیام کی تجویز پیش کرتے ہوئے کہا ہے کہ ایسا پلیٹ فارم مشترکہ چیلنجز سے نمٹنے، علاقائی بحرانوں کے حل اور خطے میں امن و استحکام کے فروغ میں اہم کردار ادا کر سکتا ہے۔

    ایرانی میڈیا کے مطابق صدر مسعود پزشکیان نے اسلام آباد میں فیلڈ مارشل عاصم منیر سے ملاقات کے دوران پاکستان کی حکومت، عوام اور عسکری قیادت کی خطے میں امن کے قیام اور ثالثی کے لیے کی جانے والی تعمیری کوششوں کو سراہا۔ انہوں نے کہا کہ پاکستان کے سفارتی اقدامات مسلم ممالک کے درمیان یکجہتی اور تعاون کے حوالے سے اس کے مضبوط مؤقف کی عکاسی کرتے ہیں۔ایرانی صدر نے کہا کہ ایران اور پاکستان کے تعلقات سیاسی، اقتصادی اور اسٹریٹجک شعبوں میں تعاون کے ایک نئے مرحلے میں داخل ہو رہے ہیں۔ ان کا کہنا تھا کہ اسلامی دنیا بے پناہ سیاسی، اقتصادی اور انسانی صلاحیتوں کی حامل ہے، لہٰذا مسلم ممالک کے درمیان زیادہ سے زیادہ ہم آہنگی علاقائی مسائل کے حل اور درپیش مشکلات سے نمٹنے کی صلاحیت کو مزید مضبوط بنا سکتی ہے۔

    ملاقات کے دوران فیلڈ مارشل عاصم منیر نے ایرانی صدر کو حالیہ مذاکرات اور ایک اہم معاہدے پر دستخط کے حوالے سے آگاہ کیا اور ایران کی اعلیٰ قیادت، بالخصوص صدر مسعود پزشکیان کی حمایت کو سراہا۔فیلڈ مارشل عاصم منیر نے عالم اسلام میں امن کے قیام کی اہمیت پر زور دیتے ہوئے کہا کہ پاکستان اس اصول پر یقین رکھتا ہے کہ کسی بھی مسلمان قوم کو مشکلات اور مصائب کا شکار نہیں ہونا چاہیے۔ انہوں نے مزید کہا کہ ایران نے ثابت قدمی کا مظاہرہ کرتے ہوئے اسرائیل کو ایک اہم پیغام دیا ہے اور اپنے حقوق کے دفاع میں کامیابی حاصل کی ہے۔ملاقات میں دونوں ممالک کے درمیان باہمی تعاون، علاقائی امن اور مسلم دنیا کے اتحاد کے فروغ سے متعلق امور پر بھی تبادلہ خیال کیا گیا۔

  • پاکستان کو تنہا کرنے کے خواب دیکھنے والوں کو ناکامی اور رسوائی کا سامنا کرنا پڑا، اسحاق ڈار

    پاکستان کو تنہا کرنے کے خواب دیکھنے والوں کو ناکامی اور رسوائی کا سامنا کرنا پڑا، اسحاق ڈار

    نائب وزیرِ اعظم اور وزیرِ خارجہ اسحاق ڈار نے کہا ہے کہ پاکستان ایک امن پسند ملک ہے اور اسے عالمی سطح پر ایک اہم اور ذمہ دار ریاست کے طور پر تسلیم کیا جا رہا ہے۔ پاکستان کو تنہا کرنے کے خواب دیکھنے والوں کو ناکامی اور رسوائی کا سامنا کرنا پڑا، جبکہ آج دنیا کا ہر ملک پاکستان کی اہمیت اور کردار سے واقف ہے۔

    لاہور میں میڈیا سے گفتگو کرتے ہوئے اسحاق ڈار نے کہا کہ اگر کسی نے پاکستان کی جانب بری نظر سے دیکھنے کی کوشش کی تو ملک اپنے دفاع کی بھرپور صلاحیت رکھتا ہے۔ انہوں نے کہا کہ پاکستان آج خطے اور دنیا میں امن کے فروغ کے لیے فعال کردار ادا کر رہا ہے اور عالمی سطح پر ’’پیس میکر‘‘ کے طور پر اپنی شناخت بنا چکا ہے۔وزیرِ خارجہ نے کہا کہ امریکا اور ایران کے درمیان کشیدگی کے دوران پاکستان نے امن کے قیام کے لیے مثبت کردار ادا کیا اور اللہ تعالیٰ نے پاکستان کو اس حوالے سے ایک اہم ذمہ داری نبھانے کا موقع دیا۔ ان کا کہنا تھا کہ وزیرِ اعظم شہباز شریف کی قیادت میں حکومت نے سفارتی محاذ پر مؤثر اقدامات کیے، جس کے نتیجے میں پاکستان کا نام دنیا بھر میں عزت اور وقار کے ساتھ لیا جا رہا ہے۔

    اسحاق ڈار نے کہا کہ فیلڈ مارشل سید عاصم منیر نے بھی امن کے قیام اور علاقائی استحکام کے لیے انتھک کوششیں کیں، جس کے باعث پاکستان کو عالمی سطح پر ایک امن دوست ملک کے طور پر دیکھا جا رہا ہے۔ انہوں نے کہا کہ پاکستان نے ثالثی اور سفارتی رابطوں کے ذریعے خطے میں امن کے فروغ میں اہم کردار ادا کیا ہے۔
    انہوں نے اس تاثر کو بھی مسترد کیا کہ کسی قسم کی خفیہ ڈیل کی گئی ہے اور کہا کہ تمام معاملات باقاعدہ معاہدوں اور اصولوں کے تحت طے پائے ہیں۔ ان کے بقول پاکستان کا ان معاملات میں کوئی ذاتی مفاد نہیں بلکہ اس کا مقصد صرف خطے میں امن اور استحکام کو یقینی بنانا ہے۔نائب وزیرِ اعظم نے مزید کہا کہ اللہ تعالیٰ نے پاکستان کو دنیا میں ایک منفرد مقام عطا کیا ہے اور حالیہ عرصے میں ملک کو جو عزت و وقار حاصل ہوا ہے، اس پر پوری قوم شکر گزار ہے۔ انہوں نے زور دیا کہ پاکستان ایک ذمہ دار ایٹمی قوت ہے اور اس کی قیادت امن، استحکام اور بین الاقوامی تعاون کے فروغ کے لیے مسلسل کوششیں کر رہی ہے

  • سرگودھا: 7 سالہ منتہا زہرہ زیادتی و قتل کیس، لواحقین کادیگر ملزمان کیخلاف کاروائی کا مطالبہ

    سرگودھا: 7 سالہ منتہا زہرہ زیادتی و قتل کیس، لواحقین کادیگر ملزمان کیخلاف کاروائی کا مطالبہ

    سرگودھا میں زیادتی کے بعد قتل کی جانے والی 7 سالہ بچی منتہا زہرہ کے اہلِ خانہ نے پولیس تفتیش پر تحفظات کا اظہار کرتے ہوئے وزیراعلیٰ پنجاب مریم نواز سے انصاف کی فراہمی اور واقعے میں ملوث تمام افراد کے خلاف کارروائی کا مطالبہ کیا ہے۔

    مقتولہ کے لواحقین کا کہنا ہے کہ سی سی ٹی وی فوٹیج کی مدد سے بچی کی لاش عمارت کی تیسری منزل سے برآمد ہوئی، جبکہ واقعے کے وقت متعلقہ دکان میں پانچ افراد موجود تھے، اس لیے تمام افراد سے مکمل اور غیرجانبدارانہ تفتیش کی جائے تاکہ کوئی بھی ملزم قانون کی گرفت سے نہ بچ سکے۔اہلِ خانہ کے مطابق 7 سالہ منتہا زہرہ کریانہ کی دکان پر سامان خریدنے گئی تھی، جہاں مبینہ طور پر اسے جنسی زیادتی کا نشانہ بنانے کے بعد بے دردی سے قتل کر دیا گیا۔ پولیس کے مطابق مقدمے کا مرکزی ملزم ارسلان گزشتہ روز ایک مبینہ پولیس مقابلے میں ہلاک ہو گیا تھا، جبکہ مزید چار افراد کو حراست میں لے کر تفتیش جاری ہے۔

    دوسری جانب سرگودھا انتظامیہ نے واقعے کے بعد ملزم کی دکان کے باہر قائم شٹر، فٹ پاتھ اور تشہیری بورڈ کو مسمار کر دیا ہے۔ واقعے کے خلاف شہریوں میں شدید غم و غصہ پایا جاتا ہے اور متعدد افراد نے دکان کے باہر احتجاج کرتے ہوئے پتھراؤ بھی کیا۔مرکزی ملزم ارسلان کی والدہ نے بھی میڈیا سے گفتگو میں مطالبہ کیا ہے کہ اگر ان کے بیٹے کے ساتھ دیگر افراد بھی اس جرم میں ملوث ہیں تو انہیں بھی قانون کے مطابق سخت سزا دی جائے۔ انہوں نے دعویٰ کیا کہ دکان کے مالک اور مقتولہ کے والد کے درمیان پہلے سے تنازع موجود تھا، جس کی بھی تحقیقات ہونی چاہئیں تاکہ اصل حقائق سامنے آسکیں اور کوئی ملزم بچ نہ سکے۔

    پوسٹ مارٹم رپورٹ میں واقعے کی ہولناکی مزید واضح ہو گئی ہے۔ رپورٹ کے مطابق بچی کو قتل سے قبل بدترین تشدد کا نشانہ بنایا گیا۔ اس کے چہرے سمیت جسم کے مختلف حصوں پر تشدد کے سات نشانات پائے گئے۔ رپورٹ میں بتایا گیا ہے کہ بچی کے چہرے اور ماتھے کی ہڈیاں ٹوٹی ہوئی تھیں جبکہ سر کے دائیں جانب بھی زخم موجود تھے۔ طبی معائنے کے مطابق بچی کی موت شہ رگ کٹنے کے باعث واقع ہوئی جبکہ اس سے جنسی زیادتی کی بھی تصدیق ہوئی ہے۔

    ادھر مرکزی ملزم ارسلان کی تدفین کے حوالے سے بھی غیرمعمولی صورتحال سامنے آئی۔ ذرائع کے مطابق جب پوسٹ مارٹم کے بعد ملزم کی لاش آبائی علاقے منور ٹاؤن پہنچائی گئی تو مقامی افراد نے اس کا جنازہ پڑھنے اور مقامی قبرستان میں تدفین کی اجازت دینے سے انکار کر دیا۔ بعد ازاں لاش کو حیدر آباد ٹاؤن منتقل کیا گیا جہاں تدفین کے انتظامات کیے گئے۔

    واضح رہے کہ تین روز قبل سرگودھا کے علاقے کارخانہ بازار بلاک 8 میں 7 سالہ منتہا زہرہ کے ساتھ مبینہ طور پر زیادتی کے بعد اس کا گلا کاٹ کر قتل کر دیا گیا تھا۔ افسوسناک واقعے نے پورے شہر کو سوگوار کر دیا ہے جبکہ عوام کی جانب سے مطالبہ کیا جا رہا ہے کہ واقعے میں ملوث تمام کرداروں کو بے نقاب کر کے عبرتناک سزا دی جائے۔

  • دہشت گرد بیٹے سے والد کا لاتعلقی کا اعلان

    دہشت گرد بیٹے سے والد کا لاتعلقی کا اعلان

    سرادرگہ کے رہائشی گلاپ خان نے اپنے دہشت گرد بیٹے اسد اللہ سے مکمل لاتعلقی کا اعلان کرتے ہوئے کہا ہے کہ ان کا بیٹا گزشتہ ایک سال سے ایک دہشت گرد تنظیم کے ساتھ وابستہ ہے اور اس نے ایسا راستہ اختیار کیا ہے جس سے خاندان کا کوئی تعلق نہیں۔

    گلاپ خان نے بتایا کہ وہ خود اپنے بیٹے کے پاس گئے اور اسے دو ٹوک الفاظ میں آگاہ کیا کہ آج کے بعد نہ وہ اس کے والد ہیں اور نہ ہی اس کی والدہ سے اس کا کوئی تعلق باقی رہا ہے۔انہوں نے کہا، ’’میں نے اپنے بیٹے سے صاف کہہ دیا ہے کہ جن لوگوں کے ساتھ تم نے راستہ اختیار کیا ہے، اب وہی تمہارے والدین ہیں۔ ہمارا تم سے ہر قسم کا تعلق ختم ہو چکا ہے۔‘‘گلاپ خان کا کہنا تھا کہ دہشت گردی کا راستہ اختیار کرنے والے عناصر نہ صرف اپنے خاندان بلکہ پورے معاشرے کے لیے نقصان دہ ثابت ہوتے ہیں۔ انہوں نے نوجوانوں پر زور دیا کہ وہ شدت پسند اور دہشت گرد تنظیموں کے جھانسے میں آنے سے گریز کریں اور ملک و قوم کی ترقی کے لیے مثبت کردار ادا کریں۔

    مقامی حلقوں کے مطابق گلاپ خان کے اس اعلان کو دہشت گردی اور انتہاپسندی کے خلاف ایک واضح پیغام قرار دیا جا رہا ہے، جس سے یہ ظاہر ہوتا ہے کہ معاشرہ دہشت گرد عناصر اور ان کے نظریات کو مسترد کر رہا ہے۔

  • چیف سیکرٹری اور آئی جی پولیس آزاد کشمیر کی پریس کانفرنس،کالعدم کمیٹی کا بیانیہ مسترد

    چیف سیکرٹری اور آئی جی پولیس آزاد کشمیر کی پریس کانفرنس،کالعدم کمیٹی کا بیانیہ مسترد

    مظفرآباد: چیف سیکرٹری آزاد کشمیر اور آئی جی پولیس آزاد کشمیر کی مشترکہ پریس کانفرنس کو عوامی حلقوں کی جانب سے بھرپور پذیرائی حاصل ہوئی ہے۔ شہریوں نے اعلیٰ حکام کی جانب سے پیش کیے گئے شواہد اور حقائق کو سراہتے ہوئے کہا ہے کہ پریس کانفرنس نے کالعدم کمیٹی کے مبینہ گمراہ کن بیانیے کو بے نقاب کر دیا ہے۔

    عوامی نمائندوں اور مختلف شعبہ ہائے زندگی سے تعلق رکھنے والے افراد کا کہنا ہے کہ راولاکوٹ ہسپتال کے واقعے میں پہل کالعدم کمیٹی کی جانب سے کی گئی، تاہم بعد ازاں جوابی کارروائی کو بنیاد بنا کر حقائق کے برعکس پروپیگنڈا کیا گیا۔ شہریوں کے مطابق پریس کانفرنس میں پیش کیے گئے شواہد نے صورتحال کو واضح کر دیا اور عوام کو اصل حقائق سے آگاہ کیا۔شہریوں نے اس بات پر بھی تشویش کا اظہار کیا کہ بعض انتشار پسند عناصر نوجوانوں کو ورغلا کر انہیں ریاستی اداروں کے خلاف استعمال کرنے کی کوشش کر رہے ہیں۔ ان کا کہنا تھا کہ نوجوانوں کے ہاتھوں میں ڈنڈے تھما کر اشتعال انگیزی اور بدامنی کو فروغ دینا کسی صورت قابل قبول نہیں۔

    عوامی حلقوں نے الحاقِ پاکستان کے خلاف کسی بھی مطالبے یا بیانیے کو مسترد کرتے ہوئے کہا کہ پاکستان سے وابستگی کشمیری عوام کے ایمان، نظریے اور اجتماعی شناخت کا بنیادی حصہ ہے۔ انہوں نے اس مؤقف کو ریاستی مفاد اور عوامی امنگوں کے مطابق قرار دیا۔شہریوں کا کہنا تھا کہ قانونی اور آئینی معاملات کو طاقت یا تشدد کے ذریعے حل نہیں کیا جا سکتا، اس لیے عوام کو چاہیے کہ وہ شرپسند عناصر اور انتشار پھیلانے والی کمیٹیوں سے دور رہیں اور قانون کے دائرے میں رہتے ہوئے اپنے مسائل کے حل کے لیے کوشش کریں۔عوام نے ریاستی معاملات پر کھل کر مؤقف اختیار کرنے اور حقائق قوم کے سامنے لانے پر چیف سیکرٹری اور آئی جی پولیس آزاد کشمیر کا شکریہ ادا کیا۔ ان کا کہنا تھا کہ موجودہ حالات میں ریاستی اداروں اور عوام کے درمیان مکمل ہم آہنگی موجود ہے اور آزاد کشمیر کے عوام ریاستی استحکام، امن اور قانون کی بالادستی کے ساتھ کھڑے ہیں۔

    شہریوں نے اس عزم کا اظہار کیا کہ آزاد کشمیر میں امن و امان، قومی یکجہتی اور ریاستی اداروں کے وقار کے خلاف کسی بھی سازش یا انتشار انگیز سرگرمی کو کامیاب نہیں ہونے دیا جائے گا۔