Author: ممتاز حیدر

ہنگری پولیس نے 30 سالہ شخص کو گرفتار کر لیا ہے جس پر الزام ہے کہ وہ اسپتال اور متروک قبرستانوں سے انسانی جسم کے اعضا جمع کرکے اپنے گھر میں محفوظ رکھتا تھا۔

ہنگری کے نیشنل بیورو آف انویسٹی گیشن کے مطابق ملزم کو 17 جون کو دارالحکومت بوڈاپیسٹ سے گرفتار کیا گیا۔ پولیس کو اطلاع ملی تھی کہ وہ انسانی اعضا اپنے گھر اور اسپتال میں ذخیرہ کر رہا ہے۔ ملزم ایک اسپتال میں وارڈ اٹینڈنٹ کے طور پر کام کرتا ہے۔پولیس نے ملزم کے اپارٹمنٹ پر چھاپے کے دوران کئی انسانی کھوپڑیاں، ایک مکمل نچلی ٹانگ، ایک ہاتھ اور انسانی چہرے کی جلد سے تیار کردہ چہرے کا نمونہ برآمد کیا۔ اس کے علاوہ ایک سوٹ کیس میں مزید ہڈیاں بھی رکھی ہوئی تھیں۔تحقیقات کے دوران ایک مرتبان میں محفوظ دل بھی برآمد ہوا، جس کے بارے میں ماہرین یہ تعین کر رہے ہیں کہ آیا وہ انسانی ہے یا کسی جانور کا۔

پولیس کے مطابق ملزم نے دورانِ تفتیش انسانی اعضا جمع کرنے کا اعتراف کرتے ہوئے بتایا کہ اسے انسانی جسم کے اعضا میں غیرمعمولی دلچسپی تھی۔ اس نے یہ بھی دعویٰ کیا کہ وہ بعض انسانی اعضا سے کھانا تیار کر کے کھا چکا ہے۔حکام کا کہنا ہے کہ ملزم کو انسانی باقیات کے غیرقانونی استعمال کے شبہے میں حراست میں لیا گیا ہے۔ پولیس کے مطابق وہ اناٹومی اور پیتھالوجی کا شوقین ہے اور جانوروں کی چیر پھاڑ بھی کرتا رہا ہے۔تفتیش کاروں کا شبہ ہے کہ ملزم نے کچھ اعضا اپنے اسپتال کے کام کے دوران حاصل کیے جبکہ بعض انسانی باقیات ہنگری اور سلواکیہ کے متروک قبرستانوں سے قبریں کھود کر نکالی گئیں۔

پولیس نے ملزم کے کمپیوٹر، لیپ ٹاپ، ٹیبلٹس، موبائل فونز، سم کارڈز اور دیگر ڈیجیٹل مواد بھی قبضے میں لے لیا ہے۔ تمام برآمد شدہ انسانی باقیات فرانزک ماہرین کے حوالے کر دی گئی ہیں، جبکہ حکام کا کہنا ہے کہ تحقیقات آگے بڑھنے کے ساتھ مقدمے میں مزید سنگین الزامات بھی شامل کیے جا سکتے ہیں۔

ایران اور امریکہ کے درمیان حالیہ جنگ بندی معاہدے کے بعد خلیجی عرب ممالک ایک نئے سکیورٹی اور سفارتی دوراہے پر کھڑے ہیں۔

ماہرین کا کہنا ہے کہ جنگ نے نہ صرف خطے کے سکیورٹی ڈھانچے کو متاثر کیا ہے بلکہ امریکہ کی جانب سے فراہم کی جانے والی سکیورٹی ضمانتوں پر بھی سوالات کھڑے کر دیے ہیں۔خلیجی ممالک کئی دہائیوں سے امریکہ کو اپنا سب سے اہم سٹریٹجک اتحادی تصور کرتے رہے ہیں، تاہم امریکی صدر ڈونلڈ ٹرمپ کے دور سے واشنگٹن اور خلیجی ریاستوں کے تعلقات میں ایک زیادہ "لین دین” پر مبنی سوچ نمایاں ہونے لگی تھی۔ ٹرمپ نے 2018 میں سعودی عرب کے بارے میں کہا تھا کہ امریکہ کے بغیر سعودی قیادت زیادہ دیر تک محفوظ نہیں رہ سکتی، جسے خلیجی ممالک میں مختلف انداز سے دیکھا گیا۔

2019 میں سعودی عرب کی اہم تیل تنصیبات پر حملے کے بعد، جس کا الزام ایران پر عائد کیا گیا، خلیجی ممالک میں یہ خدشات پیدا ہوئے کہ امریکہ کس حد تک ان کے دفاع کے لیے عملی اقدامات کرنے کو تیار ہے۔ یہی خدشات حالیہ ایران جنگ کے بعد مزید گہرے ہو گئے ہیں۔رواں سال امریکہ اور اسرائیل کی جانب سے ایران کے خلاف فوجی کارروائی اور اس کے بعد ایران کے جوابی حملوں نے خلیجی ریاستوں کو براہ راست متاثر کیا۔ متحدہ عرب امارات، بحرین،سعودی عرب اور کویت ان ممالک میں شامل ہیں جنہیں جنگ کے دوران ایرانی حملوں کے خطرات کا سامنا کرنا پڑا۔اسی پس منظر میں امریکی وزیر خارجہ مارکو روبیو نے کویت، بحرین اور متحدہ عرب امارات کا دورہ کیا، جہاں انہوں نے خلیجی قیادت کو یقین دلانے کی کوشش کی کہ امریکہ کی سکیورٹی وابستگیاں برقرار ہیں۔ روبیو نے کہا کہ واشنگٹن ایران کے ساتھ مذاکرات میں اپنے خلیجی اتحادیوں کے مفادات کو نظر انداز نہیں کرے گا اور ہر اہم فیصلے پر انہیں اعتماد میں لیا جائے گا۔

ماہرین کے مطابق ایران اور امریکہ کے درمیان ابھرنے والا نیا معاہدہ خلیجی دارالحکومتوں میں تشویش کا باعث بن رہا ہے۔ خلیجی ممالک کا مؤقف ہے کہ معاہدہ ایران کے بیلسٹک میزائل پروگرام اور اس کے حمایت یافتہ مسلح گروہوں جیسے اہم مسائل کا مکمل حل پیش نہیں کرتا۔مزید برآں، معاہدے کے تحت آبنائے ہرمز میں تجارتی سرگرمیوں کی نگرانی میں ایران کو ایک باضابطہ کردار دیا جا رہا ہے۔ چونکہ خلیجی ممالک کی توانائی برآمدات اور سمندری تجارت کا بڑا حصہ اسی راستے سے گزرتا ہے، اس لیے کئی حلقے اسے اپنے اقتصادی مفادات کے لیے خطرہ سمجھ رہے ہیں۔ معاہدے میں ایران کی تعمیر نو کے لیے 300 ارب ڈالر کے خصوصی فنڈ کی تجویز بھی شامل ہے۔ امریکی صدر ٹرمپ نے اس منصوبے کے لیے خلیجی ممالک کی مالی معاونت کا عندیہ دیا ہے، تاہم اب تک سعودی عرب اور دیگر ریاستوں نے اس حوالے سے واضح عزم کا اظہار نہیں کیا۔سعودی حکام کا کہنا ہے کہ انہیں اس منصوبے کی مکمل تفصیلات موصول نہیں ہوئیں، جبکہ قطر نے دلچسپی ظاہر کی ہے لیکن باضابطہ شمولیت اختیار نہیں کی۔

سفارتی ذرائع کے مطابق خلیجی ممالک اب اپنی دفاعی ضروریات کے لیے متبادل شراکت داروں پر بھی غور کر رہے ہیں۔ ترکی کو اس سلسلے میں ایک ممکنہ دفاعی سپلائر کے طور پر دیکھا جا رہا ہے، جبکہ کئی ریاستیں اپنی مقامی دفاعی صلاحیتوں میں اضافے کے منصوبوں پر کام کر رہی ہیں۔ماہرین کا کہنا ہے کہ خلیجی ممالک مستقبل میں ایک ایسے علاقائی سکیورٹی نظام پر غور کر سکتے ہیں جس میں ایران کے ساتھ "عدم جارحیت معاہدہ” بھی شامل ہو۔ تاہم تجزیہ کاروں کے مطابق اس طرح کے کسی معاہدے کی کامیابی کے لیے ضروری ہے کہ خلیجی ممالک اپنی دفاعی طاقت اور مشترکہ سکیورٹی صلاحیتوں کو مزید مضبوط بنائیں۔

علاقائی مبصرین کا خیال ہے کہ خلیجی ممالک اب نہ صرف ایران بلکہ امریکہ کے ساتھ اپنے تعلقات کا بھی ازسرِنو جائزہ لے رہے ہیں۔ کئی ماہرین کے مطابق امریکہ پر مکمل انحصار کی پالیسی کمزور پڑ رہی ہے اور خلیجی ریاستیں مستقبل میں زیادہ خودمختار سکیورٹی حکمت عملی اختیار کرنے کی کوشش کریں گی۔تجزیہ کاروں کے مطابق خطے میں پائیدار امن کے لیے صرف سفارت کاری کافی نہیں ہوگی بلکہ دفاعی تیاری، علاقائی تعاون اور مؤثر بازدار قوت بھی ناگزیر ہوگی۔ ایران جنگ کے بعد پیدا ہونے والی نئی صورتحال نے مشرق وسطیٰ کے سکیورٹی منظرنامے کو تبدیل کر دیا ہے اور آنے والے برسوں میں اس کے اثرات مزید نمایاں ہو سکتے ہیں۔

یورپ کے مختلف ممالک شدید گرمی کی لہر کی زد میں ہیں، جہاں ریکارڈ توڑ درجہ حرارت نے معمولاتِ زندگی کو بری طرح متاثر کر دیا ہے۔ فرانس میں شدید گرمی کے باعث پولٹری فارمز پر لاکھوں مرغیاں ہلاک ہو گئی ہیں جبکہ لاشیں ٹھکانے لگانے کی خدمات بھی دباؤ کا شکار ہو گئی ہیں۔

فرانس کے علاقے پیدیلا لوائر کے ایک پولٹری فارمر کلیمنٹ بلانشارڈ کے مطابق چند روز کے دوران ان کے تقریباً 700 مرغے مر گئے، جبکہ عام حالات میں روزانہ صرف ایک یا دو مرغیاں ہلاک ہوتی تھیں۔دیگر علاقوں میں‌بھی مختلف پولٹری فارمز پر لاکھوں مرغیاں شدید گرمی کی وجہ سے ہلاک ہو چکی ہیں، حکام متاثرہ علاقوں میں مردہ پرندوں کو فارموں پر ہی دفنانے کے امکان پر غور کر رہے ہیں۔دوسری جانب برطانیہ میں شدید گرمی کے باعث متعدد تعلیمی ادارے بند کر دیے گئے ہیں۔ مختلف علاقوں میں سیکڑوں اسکول مکمل یا جزوی طور پر بند ہیں جبکہ طلبہ کو گرمی سے بچاؤ کے لیے خصوصی ہدایات جاری کی گئی ہیں۔برطانیہ کے شہر پورٹس ماؤتھ میں واقع کوئین الیگزینڈرا اسپتال نے کولنگ سسٹم میں خرابی کے بعد "کریٹیکل انسیڈنٹ” کا اعلان کر دیا۔ اسپتال انتظامیہ کے مطابق خرابی سے آپریشن تھیٹرز، تشخیصی اسکیننگ اور دیگر اہم طبی خدمات متاثر ہوئی ہیں، تاہم ہنگامی اور ضروری طبی سہولیات بدستور جاری ہیں۔

ادھر فرانس میں گرمی کی شدت کے باعث 50 افراد جان کی بازی ہار چکے ہیں، جن میں 48 افراد ڈوبنے کے واقعات اور دو کم سن بچے گرم گاڑی میں دم گھٹنے سے ہلاک ہوئے۔ پیرس میں درجہ حرارت 40.9 ڈگری سینٹی گریڈ تک پہنچ گیا جبکہ بعض علاقوں میں 44 ڈگری سے زائد ریکارڈ کیا گیا، جو ملکی تاریخ کے گرم ترین دنوں میں شمار ہو رہا ہے۔ماہرین موسمیات نے خبردار کیا ہے کہ شدید گرمی کے باعث صحت، ٹرانسپورٹ، توانائی اور دیگر بنیادی سہولیات متاثر ہونے کا خدشہ ہے، جبکہ شہریوں کو غیر ضروری سفر سے گریز اور احتیاطی تدابیر اختیار کرنے کی ہدایت کی گئی ہے۔