راولپنڈی: آفندی کالونی میں گھر کے اندر گیس لیکیج کے باعث ہونے والے دھماکے میں خواتین اور بچوں سمیت 7 افراد جھلس کر زخمی ہوگئے، جنہیں فوری طور پر اسپتال منتقل کر دیا گیا جہاں ان کا علاج جاری ہے۔
تفصیلات کے مطابق راولپنڈی کے علاقے آفندی کالونی میں ایک رہائشی مکان میں گیس جمع ہونے کے باعث اچانک دھماکا ہوا، جس کے نتیجے میں گھر میں موجود 7 افراد جھلس کر زخمی ہوگئے۔ریسکیو ذرائع کے مطابق اطلاع ملتے ہی امدادی ٹیمیں موقع پر پہنچ گئیں اور زخمیوں کو ابتدائی طبی امداد فراہم کرنے کے بعد راولپنڈی کے ہولی فیملی اسپتال منتقل کیا گیا۔ زخمیوں کا علاج اسپتال کے برن یونٹ میں جاری ہے۔زخمی ہونے والوں میں 7 سالہ مناہل، 14 سالہ حسنین، 12 سالہ بلال، 45 سالہ فریال، 32 سالہ مصطفیٰ، 36 سالہ عثمان اور 10 سالہ مریم شامل ہیں۔ اسپتال انتظامیہ کے مطابق بعض زخمیوں کے جسم کے مختلف حصے جھلسے ہیں جبکہ تمام متاثرین کو طبی نگرانی میں رکھا گیا ہے۔
ابتدائی تحقیقات کے مطابق دھماکا گھر میں گیس لیکیج کے باعث پیش آیا، تاہم واقعے کی حتمی وجوہات جاننے کے لیے متعلقہ اداروں نے تحقیقات شروع کر دی ہیں۔ حکام کا کہنا ہے کہ گیس کی تنصیبات اور دیگر شواہد کا جائزہ لیا جا رہا ہے تاکہ حادثے کی اصل وجہ معلوم کی جا سکے۔علاقہ مکینوں نے مطالبہ کیا ہے کہ گیس لیکیج کے بڑھتے ہوئے واقعات کی روک تھام کے لیے حفاظتی اقدامات کو مزید مؤثر بنایا جائے اور شہریوں میں آگاہی مہم چلائی جائے تاکہ ایسے افسوسناک حادثات سے بچا جا سکے۔