Author: ممتاز حیدر

پیر کی صبح مشرقِ وسطیٰ میں کشیدگی مزید شدت اختیار کر گئی جب ایران اور اسرائیل کے درمیان میزائل حملوں اور جوابی کارروائیوں کا سلسلہ تیز ہو گیا۔ ایران کی پاسدارانِ انقلاب (آئی آر جی سی) نے اعلان کیا ہے کہ وہ ’’تمام محاذوں پر وسیع پیمانے کی کارروائیوں‘‘ کے لیے مکمل طور پر تیار ہے، جبکہ اسرائیل نے ایران کے مختلف فوجی اور صنعتی اہداف کو نشانہ بنانے کا دعویٰ کیا ہے۔

ایرانی خبر رساں ایجنسی فارس کے مطابق پاسدارانِ انقلاب نے کہا ہے کہ اسرائیلی حملوں کے جواب میں جاری آپریشن محض ایک عارضی ردعمل نہیں بلکہ ’’مسلسل ایک ہفتے تک جاری رہنے والی کارروائیوں‘‘ کا آغاز ہے۔ ایرانی فوجی قیادت نے خبردار کیا کہ آئندہ سات دنوں تک اسرائیل کے خلاف میزائلوں اور ڈرونز کی لہروں میں حملے جاری رہیں گے اور اگر ایرانی سرزمین کو دوبارہ نشانہ بنایا گیا تو اس کا جواب توقعات سے کہیں زیادہ شدید اور تباہ کن ہوگا۔

دوسری جانب اسرائیلی فوج (آئی ڈی ایف) کے مطابق ایرانی میزائل حملوں کے جواب میں فضائیہ نے مغربی اور وسطی ایران میں متعدد فوجی اہداف پر حملے کیے ہیں۔ ایرانی سرکاری میڈیا نے اصفہان، کرج، تبریز اور تہران میں دھماکوں کی آوازیں سنائی دینے کی تصدیق کی، تاہم نقصانات کی تفصیلات فوری طور پر جاری نہیں کی گئیں۔ پاسدارانِ انقلاب کا کہنا ہے کہ اسرائیل نے ان حملوں میں فضا سے داغے جانے والے بیلسٹک میزائل استعمال کیے۔

اسرائیلی فوج نے مزید دعویٰ کیا ہے کہ جنوب مغربی ایران کے شہر ماہشہر میں واقع ایک بڑے پیٹروکیمیکل کمپلیکس کو بھی نشانہ بنایا گیا ہے۔ اسرائیل کے مطابق اس کارروائی کا مقصد ایران کی عسکری اور لاجسٹک صلاحیتوں کو کمزور کرنا تھا، تاہم ایرانی حکام نے تاحال اس دعوے پر تفصیلی ردعمل نہیں دیا۔

کشیدگی میں اس وقت مزید اضافہ ہوا جب ایران نے رات گئے جنگ بندی کے بعد پہلی مرتبہ اسرائیل پر میزائل حملے کیے۔ اسرائیل کا کہنا ہے کہ ان تمام میزائلوں کو فضائی دفاعی نظام نے تباہ کر دیا اور کسی جانی یا مالی نقصان کی اطلاع نہیں ملی۔ بعد ازاں صبح کے اوقات میں بھی ایران کی جانب سے مزید میزائل داغے گئے، جن کے باعث اسرائیل کے مختلف علاقوں میں خطرے کے سائرن بج اٹھے اور شہریوں کو محفوظ پناہ گاہوں میں منتقل ہونے کی ہدایات جاری کی گئیں۔اسرائیلی فوج نے یہ بھی بتایا کہ یمن سے اسرائیل کی جانب ایک میزائل داغا گیا جسے روکنے کے لیے فضائی دفاعی نظام متحرک کر دیا گیا۔ ابتدائی اطلاعات کے مطابق یہ حملہ ایران کے حمایت یافتہ حوثی باغیوں کی جانب سے کیا گیا، تاہم اس کی مکمل تفصیلات سامنے نہیں آ سکیں۔

ادھر ایران کے وزیر خارجہ عباس عراقچی نے سوشل میڈیا پلیٹ فارم ایکس پر ایران اور لبنان کے پرچموں کی تصویر شیئر کرتے ہوئے اسرائیل کے خلاف یکجہتی کا اظہار کیا۔ تجزیہ کاروں کے مطابق ایران کی جانب سے لبنان میں اسرائیلی حملوں کے بعد سخت ردعمل خطے میں ایک وسیع تر محاذ آرائی کا اشارہ دے رہا ہے۔

عالمی منڈیوں پر بھی اس کشیدگی کے اثرات فوری طور پر ظاہر ہوئے ہیں۔ ایشیائی تجارت کے دوران عالمی معیار کے برینٹ خام تیل کی قیمت میں 2.6 فیصد اضافہ ہوا اور یہ 95.50 ڈالر فی بیرل تک پہنچ گئی، جبکہ امریکی خام تیل کی قیمت 2.5 فیصد بڑھ کر 92.75 ڈالر فی بیرل ہو گئی۔ ماہرین کا کہنا ہے کہ اگر ایران اور اسرائیل کے درمیان تصادم مزید بڑھا تو توانائی کی عالمی منڈیوں میں شدید اتار چڑھاؤ دیکھنے میں آ سکتا ہے۔

ادھر امریکی صدر ڈونلڈ ٹرمپ کی جانب سے اسرائیلی وزیر اعظم کو فوری جوابی کارروائی سے گریز کا مشورہ دیے جانے کی اطلاعات بھی سامنے آئی ہیں، تاہم اسرائیل نے اس کے باوجود ایران میں اہداف کو نشانہ بنایا۔ خطے میں تیزی سے بدلتی صورتحال کے باعث عالمی برادری کی تشویش میں اضافہ ہو رہا ہے اور خدشہ ظاہر کیا جا رہا ہے کہ اگر سفارتی کوششیں کامیاب نہ ہوئیں تو یہ بحران ایک وسیع علاقائی جنگ کی شکل اختیار کر سکتا ہے۔

خلیجی خطے میں جاری کشیدگی اور ایران کے خلاف جنگ کے اثرات سیاحتی صنعت پر بھی نمایاں ہونے لگے ہیں، جس کے باعث دبئی کے لگژری ہوٹلوں کو غیر ملکی سیاحوں کی کمی کا سامنا ہے اور اب وہ بڑی حد تک مقامی رہائشیوں پر انحصار کرنے پر مجبور ہو گئے ہیں۔

غیر ملکی میڈیا رپورٹس کے مطابق خطے میں سیکیورٹی خدشات، فضائی آپریشنز اور سفری غیر یقینی صورتحال کے باعث دبئی آنے والے بین الاقوامی سیاحوں کی تعداد میں نمایاں کمی ریکارڈ کی گئی ہے۔ سیاحتی سرگرمیوں میں سست روی کے نتیجے میں کئی معروف ہوٹلوں کی بکنگ متاثر ہوئی ہے، جس سے ہوٹل انڈسٹری کو مالی مشکلات کا سامنا کرنا پڑ رہا ہے۔رپورٹس کے مطابق بعض لگژری ہوٹلوں نے کم کاروباری سرگرمیوں کو جواز بنا کر تزئین و آرائش اور اپ گریڈیشن کے نام پر عارضی طور پر اپنے دروازے بند کر دیے ہیں، جبکہ کئی دیگر ہوٹلوں میں اخراجات کم کرنے کے لیے عملے کی تعداد میں کمی اور تنخواہوں کی ادائیگی سے متعلق مسائل بھی سامنے آئے ہیں۔

ماہرین کا کہنا ہے کہ دبئی کی سیاحتی معیشت کا بڑا انحصار بین الاقوامی سیاحوں پر ہے، تاہم موجودہ علاقائی کشیدگی نے سیاحتی شعبے کو غیر معمولی دباؤ میں ڈال دیا ہے۔ متعدد ہوٹل مالکان اور انتظامیہ اس امید پر ہیں کہ جنگ کے خاتمے اور خطے میں استحکام کی بحالی کے بعد سیاحتی سرگرمیاں دوبارہ معمول پر آ سکیں گی۔دوسری جانب پام جمیرہ، دبئی مرینا اور دیگر معروف سیاحتی مقامات پر قائم پانچ ستارہ ہوٹلوں نے مقامی رہائشیوں کو متوجہ کرنے کے لیے خصوصی رعایتی پیکجز، ویک اینڈ آفرز اور خاندانی تفریحی پیکجز متعارف کروا دیے ہیں۔ ان رعایتوں کے باعث اب ایسے مقامی افراد بھی لگژری ہوٹلوں میں قیام اور سہولیات سے لطف اندوز ہو رہے ہیں جو ماضی میں ان کی بلند قیمتوں کے باعث ایسا کرنے سے قاصر تھے۔

سیاحت کے شعبے سے وابستہ ماہرین کے مطابق اگر علاقائی صورتحال طویل عرصے تک برقرار رہی تو ہوٹل انڈسٹری کو مزید چیلنجز کا سامنا کرنا پڑ سکتا ہے، جبکہ سیاحتی بحالی کا انحصار خطے میں امن و استحکام اور بین الاقوامی سفری اعتماد کی بحالی پر ہوگا۔

ایران کے اسرائیل پر جوابی میزائل حملے کے بعد ایرانی پاسداران انقلاب نے خبردار کیا ہے کہ اسرائیل پر حملہ ایک وارننگ تھا، جارحیت دہرائی گئی تو جواب مزید وسیع ہوگا۔

ایرانی پاسداران انقلاب نے اپنے بیان میں کہا ہے کہ اسرائیل کے رامات ڈیوڈ ائیر بیس کو آئی آر جی سی ایروسپیس فورس کے بیلسٹک میزائلوں سے نشانہ بنایا۔پاسداران انقلاب کا کہنا ہے کہ جنگ بندی کی قبولیت اس شرط پر تھی کہ تمام محاذوں پر فائرنگ بند ہو، امریکا اور اسرائیل نے اپنے وعدوں پر عمل نہیں کیا۔پاسداران انقلاب نے خبردار کیا ہے کہ اسرائیل لبنان پر حملے روک دے، ورنہ نتائج مزید تباہ کن ہوں گے،خطے میں تمام امریکی و اسرائیلی اہداف کو نشانہ بنایا جائے گا۔دوسری جانب سینئر ایرانی ذرائع نےبتایا ہے کہ اسرائیل نےحملہ کیا تو خطے میں موجود تمام امریکی اڈے اہداف ہوں گے۔

امریکی صدر ڈونلڈ ٹرمپ نے ایران کی جانب سے اسرائیل پر جوابی حملے کے بعد ردعمل دیتے ہوئےکہا ہے کہ ایران کو مشورہ دوں گا، آپ نے اپنے میزائل داغ دیے بس اتنا کافی ہے۔ امریکی صدر ڈونلڈ ٹرمپ نے صحافی بارک راوڈ سے گفتگو کرتے ہوئے کہا کہ ایران میز پر واپس آئے اور معاہدہ کرے، امریکی فوج الرٹ ہے۔صدر ڈونلڈ ٹرمپ نے کہا کہ اسرائیل کی جانب سے بیروت پر آج کے حملے پر خوش نہیں ہوں، میں ابھی نیتن یاہو کو فون کرنے جا رہا ہوں، اسرائیلی وزیر اعظم سے کہوں گا کہ جوابی حملہ نہ کرے۔

ایران کی جانب سے اسرائیل پر جوابی حملے کے بعد ایران کے مغربی حصے کی فضائی حدود غیر معینہ مدت تک بند کردی گئی۔حکام عراقی سول ایوی ایشن کے مطابق فضائی حدود عارضی طور پر بند کر دی گئی۔شام نے بھی جنوبی فضائی حدود کو 12 گھنٹوں کے لیے عارضی طور پر بند کر دیا اور دمشق ایئرپورٹ پر آپریشن معطل کردیا گیا۔

اسرائیلی فوج کے ترجمان نے ایران کی جانب سے تازہ حملے پر ردعمل دیتے ہوئے کہا ہے کہ ایران نے اسرائیل پر حملہ کر کے ایک سنگین غلطی کی ہے۔میڈیا سے بات کرتے ہوئے اسرائیل فوج کے ترجمان نے کہا کہ اسرائیلی فوج کے چیف آف اسٹاف حملوں کا جائزہ لے رہے ہیں اور آئندہ کے لیے منصوبوں کی منظوری دے رہے ہیں۔ اسرائیلی فوج لبنان بھر میں کارروائیاں جاری رکھے گی۔بعد ازاں اسرائیلی آرمی چیف نے کہا کہ حکم ملتے ہی دشمن پر بھرپور حملہ کریں گے۔