مشرقِ وسطیٰ میں کشیدگی ایک بار پھر شدت اختیار کر گئی ہے، جہاں امریکی صدر ڈونلڈ ٹرمپ کی اپیل کے باوجود اسرائیل نے ایران پر جوابی حملہ کر دیا۔
ایرانی میڈیا کے مطابق دارالحکومت تہران، تبریز اور اصفہان میں دھماکوں کی آوازیں سنی گئیں جبکہ کرج کے قریب بھی دھماکے کی اطلاعات موصول ہوئی ہیں۔اسرائیلی فوج نے دعویٰ کیا ہے کہ اس نے مغربی اور وسطی ایران میں فوجی اہداف کو نشانہ بنایا ہے۔ اسرائیلی حکام کے مطابق یہ کارروائی ایران کی جانب سے کیے گئے حالیہ میزائل حملوں کے جواب میں کی گئی ہے۔
دوسری جانب ایرانی پاسدارانِ انقلاب نے الزام عائد کیا ہے کہ اسرائیل نے ایران پر حملوں میں بیلسٹک میزائل استعمال کیے ہیں۔ تاہم اسرائیلی حکام نے اس دعوے پر فوری طور پر کوئی ردعمل نہیں دیا۔
یاد رہے کہ اتوار کی شب ایران نے لبنان کے دارالحکومت بیروت پر اسرائیلی حملوں کے ردعمل میں اسرائیل پر متعدد میزائل داغے تھے، جس کے بعد خطے میں مزید کشیدگی کا خدشہ پیدا ہو گیا تھا۔امریکی صدر ڈونلڈ ٹرمپ نے اسرائیل کو ایران کے خلاف جوابی کارروائی سے گریز کرنے کا مشورہ دیا تھا۔ انہوں نے کہا تھا کہ ایرانی حملوں کے نتیجے میں کسی قسم کا جانی نقصان نہیں ہوا، اس لیے امید ہے کہ اسرائیل مزید فوجی کارروائی سے اجتناب کرے گا۔اسرائیلی میڈیا کی رپورٹس کے مطابق اسرائیلی وزیراعظم بنجمن نیتن یاہو نے ایران پر حملے کے اپنے ارادے سے امریکی صدر کو آگاہ کیا تھا۔ رپورٹ کے مطابق صدر ٹرمپ نے واضح کیا کہ اگر اسرائیل ایران کے خلاف کارروائی کرتا ہے تو امریکا اس حملے میں شریک نہیں ہوگا۔