آئی جی ایف سی بلوچستان (ساؤتھ) نے تربت میں تزئین و آرائش کے بعد دوبارہ فعال کیے گئے پاکستان سویٹ ہوم کا دورہ کیا، جہاں عیدالاضحیٰ کے موقع پر یتیم بچوں کے ساتھ خوشیاں بانٹی گئیں۔
دورے کے دوران یتیم بچوں نے مہمانوں کا گرمجوشی، اپنائیت اور مسکراہٹوں کے ساتھ استقبال کیا۔ اس موقع پر جذباتی اور خوشگوار مناظر دیکھنے میں آئے، جہاں بچوں کے چہروں پر خوشی نمایاں تھی۔آئی جی ایف سی بلوچستان (ساؤتھ) نے بچوں کے ساتھ وقت گزارا، ان میں عیدی اور تحائف تقسیم کیے اور ان کی تعلیم، تربیت اور بہتر مستقبل کے عزم کا اظہار کیا۔
یاد رہے کہ پاکستان سویٹ ہوم طویل عرصے سے خستہ حالی کا شکار تھا، تاہم ایف سی ساؤتھ بلوچستان اور پرواز فاؤنڈیشن کی مشترکہ کاوشوں سے ادارے کو مختصر وقت میں مکمل طور پر بحال کیا گیا۔بحالی منصوبے کے تحت بچوں کے لیے نئے بیڈز، فرنیچر، سولر لائٹس، کمپیوٹرز، کھیلوں کا سامان اور دیگر بنیادی سہولیات فراہم کی گئیں تاکہ انہیں بہتر اور محفوظ ماحول میسر آ سکے۔