Blog

‎ابوظبی: امریکی وزیر خارجہ مارکو روبیو ایران سے متعلق حالیہ معاہدے اور خطے کی بدلتی ہوئی صورتحال پر خلیجی اتحادیوں کو اعتماد میں لینے کے لیے متحدہ عرب امارات پہنچ گئے ہیں۔
‎عرب میڈیا رپورٹس کے مطابق مارکو روبیو اپنے دو روزہ دورے کے دوران متحدہ عرب امارات، کویت اور بحرین کی اعلیٰ قیادت سے ملاقاتیں کریں گے، جن میں خطے کی سیکیورٹی، ایران کے ساتھ ہونے والے معاہدے اور باہمی تعاون پر تبادلہ خیال کیا جائے گا۔
‎رپورٹس کے مطابق امریکی وزیر خارجہ خلیجی اتحادیوں کو امریکا اور ایران کے درمیان ہونے والی حالیہ سفارتی پیش رفت اور معاہدے کی تفصیلات سے آگاہ کریں گے، تاکہ خطے میں پیدا ہونے والے خدشات کو دور کیا جا سکے۔
‎امریکی میڈیا کا کہنا ہے کہ اس دورے کے دوران واشنگٹن اپنے خلیجی اتحادیوں کو سیکیورٹی سے متعلق نئی یقین دہانیاں بھی کرا سکتا ہے، جن کا مقصد خطے میں استحکام برقرار رکھنا اور اتحادی ممالک کے دفاعی مفادات کا تحفظ یقینی بنانا ہے۔
‎تجزیہ کاروں کے مطابق یہ دورہ ایسے وقت میں ہو رہا ہے جب امریکا اور ایران کے درمیان کشیدگی میں کمی اور سفارتی رابطوں میں پیش رفت کے بعد مشرق وسطیٰ کی سیاسی صورتحال میں اہم تبدیلیاں رونما ہو رہی ہیں۔
‎ماہرین کا کہنا ہے کہ مارکو روبیو کی یہ ملاقاتیں نہ صرف امریکا کے خلیجی اتحادیوں کے تحفظات دور کرنے میں اہم کردار ادا کریں گی بلکہ خطے میں مستقبل کی سفارتی اور دفاعی حکمت عملی کے تعین میں بھی مددگار ثابت ہو سکتی ہیں۔

‎لندن: ایف آئی ایچ پرو لیگ میں پاکستان کے قومی پرچم کی غلط نمائش پر انٹرنیشنل ہاکی فیڈریشن (FIH) نے پاکستان ہاکی فیڈریشن (PHF) سے باضابطہ تحریری معذرت کر لی ہے۔
‎ایف آئی ایچ پرو لیگ کی ڈائریکٹر ہیلری اٹکنسن نے پاکستان ہاکی فیڈریشن کے صدر محی الدین احمد وانی کے نام خط میں غیر مشروط معافی مانگتے ہوئے اس واقعے پر گہرے افسوس کا اظہار کیا۔
‎یہ واقعہ لندن میں پاکستان اور بھارت کے درمیان ایف آئی ایچ پرو لیگ کے میچ سے قبل قومی ترانوں کی تقریب کے دوران پیش آیا تھا، جہاں پاکستان کے قومی پرچم میں سفید رنگ کا حصہ موجود نہیں تھا، جس پر پاکستانی شائقین نے شدید ردعمل دیا تھا۔
‎اپنے خط میں ہیلری اٹکنسن نے کہا کہ ہر ملک کا قومی پرچم اس کی شناخت، وقار اور قومی فخر کی علامت ہوتا ہے، اور اس غلطی سے پاکستان ہاکی ٹیم، پاکستان ہاکی فیڈریشن، پاکستانی شائقین اور پوری پاکستانی قوم کی دل آزاری ہوئی، جس پر ایف آئی ایچ کو دلی افسوس ہے۔
‎انہوں نے اس انتظامی غلطی کی مکمل ذمہ داری قبول کرتے ہوئے واضح کیا کہ یہ ایک غیر ارادی کوتاہی تھی، جس کا مقصد کسی بھی ملک یا اس کی قومی شناخت کی بے توقیری ہرگز نہیں تھا۔
‎ایف آئی ایچ پرو لیگ کی ڈائریکٹر نے یقین دہانی کرائی کہ آئندہ ایسے واقعات سے بچنے کے لیے تمام انتظامی اور آپریشنل طریقہ کار کا ازسرنو جائزہ لیا جائے گا تاکہ کسی بھی ٹیم کے قومی تشخص اور وقار سے متعلق اس نوعیت کی غلطی دوبارہ نہ ہو۔
‎واضح رہے کہ اس واقعے کے بعد سوشل میڈیا پر پاکستانی صارفین نے ایف آئی ایچ کو شدید تنقید کا نشانہ بنایا تھا اور باضابطہ معذرت کا مطالبہ کیا تھا، جس کے بعد فیڈریشن نے تحریری طور پر اپنی غلطی تسلیم کرتے ہوئے معافی جاری کی۔

‎پیرس: فرانس میں جاری شدید گرمی کی لہر کے دوران مختلف مقامات پر نہاتے ہوئے 40 افراد ڈوب کر جاں بحق ہو گئے ہیں۔ فرانسیسی وزیراعظم سیباسٹین لیکورنو نے ہلاکتوں کی تصدیق کرتے ہوئے عوام سے احتیاط برتنے کی اپیل کی ہے۔
‎گرمی کی لہر سے متعلق ہنگامی اجلاس سے خطاب کرتے ہوئے وزیراعظم نے کہا کہ 18 جون سے اب تک ملک بھر میں ڈوبنے کے مختلف واقعات میں 40 افراد اپنی جانوں سے ہاتھ دھو بیٹھے ہیں، جن میں زیادہ تر نوجوان شامل ہیں۔
‎انہوں نے ان واقعات کو انتہائی افسوسناک قرار دیتے ہوئے کہا کہ غیر معمولی گرمی کے باعث بڑی تعداد میں لوگ دریا، جھیلوں، ساحلی علاقوں اور دیگر آبی مقامات کا رخ کر رہے ہیں، جس کے نتیجے میں ڈوبنے کے حادثات میں نمایاں اضافہ دیکھنے میں آیا ہے۔
‎ادھر فرانس کے محکمہ موسمیات نے ملک کے بیشتر علاقوں میں ہیٹ ویو الرٹ برقرار رکھتے ہوئے خبردار کیا ہے کہ آئندہ چند روز کے دوران درجہ حرارت 40 سے 43 ڈگری سینٹی گریڈ تک پہنچ سکتا ہے۔
‎حکام نے شہریوں کو شدید گرمی کے دوران غیر محفوظ مقامات پر نہانے سے گریز، زیادہ پانی پینے، دھوپ میں غیر ضروری نکلنے سے بچنے اور سرکاری حفاظتی ہدایات پر عمل کرنے کی تلقین کی ہے۔
‎فرانسیسی حکام کا کہنا ہے کہ ریسکیو اداروں کو ہائی الرٹ پر رکھا گیا ہے تاکہ کسی بھی ہنگامی صورتحال میں فوری امدادی کارروائیاں یقینی بنائی جا سکیں۔

‎فیفا ورلڈ کپ 2026 کے دوران پیراگوئے کے مڈفیلڈر میٹیاس گالارزا کی ایک ویڈیو سوشل میڈیا پر تیزی سے وائرل ہو رہی ہے، جس میں انہیں میچ کے دوران ریفری کی گرنے والی گھڑی اپنی کلائی پر باندھتے ہوئے دیکھا جا سکتا ہے۔ اس واقعے نے شائقین فٹبال میں دلچسپ بحث چھیڑ دی ہے۔
‎رپورٹس کے مطابق پیراگوئے اور ترکی کے درمیان کھیلے گئے میچ میں پہلے ہاف کے اختتام سے کچھ دیر قبل دونوں ٹیموں کے کھلاڑیوں کے درمیان تلخ کلامی اور دھکم پیل شروع ہو گئی۔ صورتحال پر قابو پانے کی کوشش کے دوران میچ ریفری ایوان بارٹن کی کلائی سے ان کی گھڑی گر گئی۔
‎اسی دوران 24 سالہ میٹیاس گالارزا کی نظر گھڑی پر پڑی۔ وائرل ویڈیو میں دیکھا جا سکتا ہے کہ انہوں نے گھڑی اٹھائی اور فوری طور پر ریفری کو واپس دینے کے بجائے چند لمحوں کے لیے اپنی کلائی پر باندھ لی۔ ویڈیو میں وہ گھڑی کے بٹن بھی چیک کرتے ہوئے نظر آتے ہیں، جبکہ ریفری اس دوران اپنی ذمہ داریاں انجام دینے میں مصروف رہے اور انہیں اس بات کا علم نہیں ہوا۔
‎ہنگامہ ختم ہونے کے بعد گالارزا نے ریفری ایوان بارٹن کو ان کی گھڑی واپس کر دی۔ اس کے باوجود ویڈیو سوشل میڈیا پر وائرل ہونے کے بعد متعدد صارفین نے ان کی حرکت پر تنقید کی، جبکہ بعض افراد نے اسے محض ایک مذاق یا وقتی عمل قرار دیا۔
‎تاحال نہ فیفا اور نہ ہی میچ آفیشلز کی جانب سے اس واقعے پر کوئی باضابطہ بیان جاری کیا گیا ہے۔ گالارزا کے خلاف بھی کسی قسم کی تادیبی کارروائی کا اعلان سامنے نہیں آیا۔
‎واقعے کی ویڈیو مختلف سوشل میڈیا پلیٹ فارمز پر لاکھوں بار دیکھی جا چکی ہے، جہاں صارفین اس پر مختلف آرا کا اظہار کر رہے ہیں۔ کچھ شائقین کا کہنا ہے کہ یہ محض ایک دلچسپ لمحہ تھا، جبکہ دیگر نے اسے کھیل کے آداب کے خلاف قرار دیا۔

‎ایران اور امریکا کے درمیان حالیہ کشیدگی کے تناظر میں ایک امریکی ایف 15 فائٹر طیارے کے پائلٹ نے دعویٰ کیا ہے کہ ایرانی فضائی حدود میں نشانہ بننے سے قبل اس نے ایرانی ڈرونز کی ایک غیر معمولی اور جدید فارمیشن دیکھی، جسے اس نے "جیلی فش” سے تشبیہ دی۔
‎غیر ملکی میڈیا رپورٹس کے مطابق امریکی پائلٹ نے بتایا کہ فضاء میں ایک بڑا ڈرون موجود تھا جبکہ اس کے گرد متعدد چھوٹے ڈرون اس انداز میں پرواز کر رہے تھے کہ وہ جیلی فش کی ٹانگوں جیسے دکھائی دے رہے تھے۔ ان کے بقول ایسا محسوس ہو رہا تھا جیسے فضا میں ڈرونز پر مشتمل ایک بارودی سرنگ بچھا دی گئی ہو۔
‎رپورٹس کے مطابق امریکی ایف 15 طیارہ اپریل میں ایرانی فضائی حدود میں گر کر تباہ ہو گیا تھا۔ حادثے کے وقت طیارے میں موجود دونوں پائلٹ ایجیکٹ کرنے میں کامیاب رہے تھے، جنہیں بعد ازاں امریکی اسپیشل فورسز نے خصوصی آپریشن کے ذریعے بحفاظت نکال لیا تھا۔
‎پائلٹ کے اس بیان کے بعد امریکی دفاعی حلقوں میں تشویش پائی جا رہی ہے۔ دفاعی ماہرین کا کہنا ہے کہ اگر یہ دعویٰ درست ثابت ہوتا ہے تو یہ ایران کی ڈرون ٹیکنالوجی اور فضائی جنگی حکمت عملی میں نمایاں پیش رفت کی نشاندہی کرتا ہے۔
‎کچھ ماہرین کا خیال ہے کہ ایران نے اپنی ڈرون صلاحیتوں کو بہتر بنانے کے لیے جدید ٹیکنالوجی اور بیرونی تعاون سے فائدہ اٹھایا ہے، تاہم اس حوالے سے کسی سرکاری ادارے نے باضابطہ تصدیق نہیں کی۔
‎اب تک امریکی یا ایرانی حکام کی جانب سے پائلٹ کے ان دعوؤں پر کوئی باضابطہ ردعمل سامنے نہیں آیا، جبکہ دفاعی ماہرین اس معاملے کو مزید تحقیق اور تصدیق کا متقاضی قرار دے رہے ہیں۔

‎چین کے ایک چڑیا گھر نے ایک منفرد ملازمت کا اشتہار جاری کیا ہے، جس میں امیدوار کو سیاہ ریچھ کا لباس پہن کر سیاحوں کے سامنے ریچھ کا کردار ادا کرنا ہوگا۔ اس دلچسپ ملازمت کے بدلے سالانہ ایک لاکھ یوآن، یعنی پاکستانی کرنسی میں 41 لاکھ روپے سے زائدتنخواہ کی پیشکش کی گئی ہے۔
‎یہ ملازمت چین کے صوبہ ہینان کے شہر لووہے میں واقع لووہے وائلڈ لائف زو کی جانب سے پیش کی گئی ہے۔ اشتہار سوشل میڈیا پر وائرل ہونے کے بعد لوگوں کی بڑی تعداد نے اس میں دلچسپی ظاہر کی ہے۔
‎چڑیا گھر کی جانب سے جاری اشتہار کے مطابق امیدوار کی عمر کم از کم 18 سال ہونی چاہیے اور وہ جسمانی طور پر مکمل فٹ ہو۔ ملازمت کرنے والے افراد کو روزانہ 6 گھنٹے کام کرنا ہوگا جبکہ ہر ماہ چار دن کی چھٹی بھی دی جائے گی۔
‎اشتہار میں بتایا گیا ہے کہ ریچھ کا کردار ادا کرنے والے افراد کو سیاحوں سے بات کرنے کی اجازت نہیں ہوگی، تاہم وہ مختلف آوازیں نکال سکتے ہیں تاکہ حقیقی ریچھ کا تاثر برقرار رکھا جا سکے۔ انہیں چڑیا گھر آنے والے افراد سے کھانے پینے کی اشیا لینے کی بھی اجازت ہوگی۔
‎چڑیا گھر نے اشتہار میں دلچسپ انداز میں لکھا ہے کہ اگر ملازم تھک جائے تو وہ آرام سے لیٹ سکتا ہے، اور اگر توانائی محسوس کرے تو اچھل کود، رقص، درختوں پر چڑھنے یا مچھلیاں پکڑنے جیسی سرگرمیاں بھی انجام دے سکتا ہے تاکہ سیاحوں کو زیادہ دلچسپ تجربہ فراہم کیا جا سکے۔
‎اگرچہ یہ واضح نہیں کیا گیا کہ کتنے افراد کو ملازمت دی جائے گی، تاہم چڑیا گھر کے مطابق اب تک 100 سے زائد افراد اس منفرد نوکری کے لیے رابطہ کر چکے ہیں۔
‎چڑیا گھر کے ترجمان کا کہنا ہے کہ اگر اس کردار کو ادا کرنے والا شخص سوشل میڈیا پر مقبول ہو جائے تو وہ ایک لاکھ یوآن سالانہ سے بھی زیادہ آمدنی حاصل کر سکتا ہے، جبکہ اس سے چڑیا گھر میں آنے والے سیاحوں کی تعداد اور آمدنی میں بھی اضافہ متوقع ہے۔