Blog

تہران: ایران کے سابق وزیر خارجہ کمال خرازی زخموں کی تاب نہ لاتے ہوئے شہید ہوگئے۔ ایرانی حکام نے ان کی شہادت کی باضابطہ تصدیق کر دی ہے، جس کے بعد ملک بھر میں سوگ کی فضا قائم ہے۔

ایرانی سرکاری میڈیا کے مطابق کمال خرازی گزشتہ روز اپنے خالقِ حقیقی سے جا ملے۔ رپورٹس میں بتایا گیا ہے کہ وہ یکم اپریل کو ہونے والی شدید بمباری میں زخمی ہوگئے تھے، جو کہ امریکا اور اسرائیل کی جانب سے کی گئی کارروائیوں کا حصہ تھی۔حملے کے دوران ان کی اہلیہ موقع پر ہی شہید ہوگئیں جبکہ کمال خرازی کو شدید نوعیت کے زخم آئے تھے۔ انہیں فوری طور پر اسپتال منتقل کیا گیا جہاں وہ کئی روز تک زیر علاج رہے، تاہم زخموں کی شدت کے باعث وہ جانبر نہ ہو سکے۔ایرانی قیادت اور عوامی حلقوں کی جانب سے کمال خرازی کی وفات پر گہرے دکھ اور افسوس کا اظہار کیا جا رہا ہے۔ حکومتی شخصیات نے انہیں ایک تجربہ کار سفارتکار اور قومی مفادات کے مضبوط محافظ کے طور پر خراج عقیدت پیش کیا ہے۔

امریکی صدر ڈونلڈ ٹرمپ نے کہا ہے کہ ایران کے ساتھ امن معاہدے کیلئے پر اُمید ہوں، ایرانی رہنماء بہت معقول لوگ ہیں، لبنان پر اسرائیلی حملوں میں کمی آئی ہے۔

ٹرمپ کا کہنا ہے کہ اسرائیلی وزیراعظم نیتن یاہو نے فون کرکے لبنان پر حملوں میں کمی کی یقین دہانی کرائی ہے۔امریکی صدر نے ایک اور پیغام میں لکھا کہ ایران کی جانب سے آبنائے ہرمز سے گزرنے والے ٹینکرز سے فیس وصولی کی اطلاعات ہیں، اگر ایران ایسا کررہا ہے تو اسے روکنا ہوگا، جو ہورہا ہے وہ معاہدے کے مطابق نہیں۔ٹرمپ نے کہا کہ ایران کے ساتھ یا اس کے بغیر آبنائے ہرمز سے تیل کی ترسیل جلد شروع ہوگی۔

دوسری جانب ایرانی نائب وزیر خارجہ سعید خطیب زادہ نے ایرانی میڈیا سےگفتگو کرتے ہوئے کہا کہ امریکی بحری جہازبھی آبنائے ہرمز سے گزر سکتے ہیں اگر وہ دشمنی پر مبنی طرزِ عمل اختیارنہ کریں،سعید خطیب زادہ نے کہا کہ آبنائے ہرمزکھلی ہوئی ہے، تکنیکی وجوہات کی بنا پر ایرانی افواج کے ساتھ رابطہ رکھنا ضروری ہے، آبنائے ہرمز سے محفوظ راستوں کے ذریعے سفر کو یقینی بنائیں گے۔

قبل ازیں امریکی صدر ڈونلڈ ٹرمپ اور برطانوی وزیراعظم سر کیئر اسٹامر کے درمیان ٹیلیفونک رابطہ ہوا ہے جس میں آبنائے ہرمز میں بحری آمدورفت بحال کرنے پر بات چیت کی گئی،برطانوی وزیراعظم کے دفتر (ڈاؤننگ اسٹریٹ) کے مطابق دونوں رہنماؤں نے اس بات پر زور دیا کہ آبنائے ہرمز سے بحری جہازوں کی بلا رکاوٹ آمدورفت کے لیےعملی منصوبہ تیار کیا جائے،برطانوی وزیراعظم اس وقت خلیجی ممالک کے دورے پر ہیں، جہاں وہ قطر، سعودی عرب، بحرین اور متحدہ عرب امارات کے رہنماؤں سے ملاقاتیں کر رہے ہیں،اس سے قبل بھی برطانوی وزیراعظم نے کہا تھا کہ آبنائے ہرمز سے گزرنے والے جہازوں پر کسی قسم کا ٹول یا فیس قابل قبول نہیں ہوگی۔

پاکستان کے دارالحکومت اسلام آباد میں امریکا اور ایران کے درمیان مجوزہ امن مذاکرات سے قبل سکیورٹی کو ہائی الرٹ کر دیا گیا ہے۔ وزارتِ داخلہ کے مطابق یہ اقدامات ایران اور امریکا ،اسرائیل جنگ میں دو ہفتوں کی جنگ بندی کے بعد کیے گئے ہیں، جس کا اعلان بدھ کے روز سامنے آیا تھا۔

ایران کی جانب سے جنگ کے ممکنہ حل کے لیے 10 نکاتی تجویز بھی جاری کی گئی ہے، جس میں آبنائے ہرمز پر کنٹرول برقرار رکھنے، جوہری افزودگی کے حق کو تسلیم کرنے، اقتصادی پابندیاں ختم کرنے اور خطے میں جنگ کے خاتمے جیسے نکات شامل ہیں۔ ایران نے لبنان میں حزب اللہ کے خلاف جاری کارروائیوں کو بھی معاہدے کا حصہ قرار دیا ہے، جبکہ امریکا اور اسرائیل کا مؤقف ہے کہ حالیہ جنگ بندی میں لبنان شامل نہیں۔

پاکستان، جس نے اس بحران میں ثالث کا کردار ادا کیا، کے مطابق لبنان بھی اس معاہدے کا حصہ ہے۔ حکام کے مطابق مذاکرات کا پہلا دور ہفتہ کے روز اسلام آباد میں متوقع ہے، جس کے لیے شہر بھر میں سکیورٹی کے سخت انتظامات کیے گئے ہیں اور حساس مقامات پر اضافی نفری تعینات کر دی گئی ہے۔وفاقی وزیر داخلہ محسن نقوی نے سکیورٹی انتظامات کا جائزہ لینے کے بعد کہا کہ اسلام آباد میں ان اہم مذاکرات کا انعقاد پاکستان کے لیے اعزاز ہے۔ ان کے مطابق ریڈ زون، جہاں اہم سرکاری اور سفارتی دفاتر واقع ہیں، کو مکمل طور پر سیل کر دیا جائے گا اور صرف متعلقہ افراد کو داخلے کی اجازت ہوگی، جبکہ وزارت داخلہ میں ایک خصوصی کنٹرول روم بھی قائم کر دیا گیا ہے۔

سرکاری میڈیا کے مطابق امریکی وفد کی قیادت نائب صدر جے ڈی وینس کریں گے، جبکہ وفد میں سینئر شخصیات اسٹیو وٹکوف اور جیراڈ کشنر بھی شامل ہوں گے۔ایرانی وفد کی قیادت اسپیکر پارلیمنٹ محمد باقر قالیباف اور وزیر خارجہ عباس عراقچی کریں گے۔پاکستانی قیادت، جس میں وزیر اعظم شہباز شریف، وزیر خارجہ اسحاق ڈار اور فیلڈ مارشل،چیف آف آرمی اسٹاف عاصم منیر شامل ہیں، کی سفارتی کوششوں کے باعث پاکستان اس بحران میں اہم ثالث کے طور پر ابھرا ہے۔

‎امریکا میں گزشتہ تین سالوں کے دوران 9 معروف سائنسدانوں کی پراسرار اموات اور گمشدگیوں نے کئی سوالات کو جنم دے دیا ہے، جس پر ماہرین اور سیکیورٹی حلقوں میں تشویش پائی جا رہی ہے۔
‎برطانوی اخبار کی رپورٹ کے مطابق مختلف شعبوں سے تعلق رکھنے والے سائنسدان غیر معمولی حالات میں یا تو ہلاک ہوئے یا پھر اچانک لاپتہ ہو گئے، جس نے ان واقعات کو مزید مشکوک بنا دیا ہے۔
‎رپورٹ میں بتایا گیا ہے کہ کینسر ریسرچ سے وابستہ سائنسدان جیسن تھامس کی لاش ایک جھیل سے ملی، جبکہ ریٹائرڈ ایئر فورس جنرل ولیم میک کاسلینڈ کو لاپتہ قرار دیا گیا ہے۔ اسی طرح ماہر فلکیات کارل گرل مائر کو کیلیفورنیا میں قتل کیا گیا جبکہ فیوژن انرجی کے سائنسدان نونولو ریرو بھی فائرنگ کا نشانہ بنے۔
‎مزید برآں ناسا کے جیٹ پروپلشن لیبارٹری سے وابستہ میٹریلز چیف مونیکا ریزا گزشتہ سال سے لاپتہ ہیں، جبکہ لاس الاموس لیبارٹری کے دو سائنسدان بھی پراسرار طور پر غائب ہو گئے، جو اپنے گھروں سے نکلے مگر ان کی گاڑیاں اور دیگر سامان وہیں چھوڑ دیا گیا۔
‎ایک سابق ایف بی آئی افسر کے مطابق ان تمام واقعات میں مماثلت پائی جاتی ہے اور انہیں محض اتفاق قرار نہیں دیا جا سکتا، تاہم حکام کی جانب سے اب تک کوئی حتمی مؤقف سامنے نہیں آیا۔
‎ماہرین کا کہنا ہے کہ ان پراسرار واقعات کی مکمل اور شفاف تحقیقات نہایت ضروری ہیں تاکہ حقائق سامنے آ سکیں اور اگر کوئی منظم پہلو موجود ہے تو اسے بے نقاب کیا جا سکے۔