Blog

سعودی عرب میں پرنس سلطان ایئر بیس پر ایرانی حملے کے نتیجے میں امریکی فضائیہ کا جدید جاسوس طیارہ تباہ ہو گیا، جس کے بعد سامنے آنے والی تصاویر نے اس واقعے کی سنگینی کو واضح کر دیا ہے۔

غیر ملکی میڈیا کے مطابق جمعے کے روز ہونے والے حملے میں امریکی فضائیہ کا E-3 Sentry طیارہ نشانہ بنا۔ اوپن سورس انٹیلیجنس ٹیموں نے سوشل میڈیا پر گردش کرنے والی تصاویر کی تصدیق کی ہے، جن میں طیارے کے پچھلے حصے کا ملبہ واضح طور پر دیکھا جا سکتا ہے۔ابتدائی طور پر امریکی حکام نے صرف طیارے کو نقصان پہنچنے کی تصدیق کی تھی، تاہم اب سامنے آنے والی تصاویر سے ظاہر ہوتا ہے کہ طیارہ مکمل طور پر تباہ ہو چکا ہے۔خبر رساں ادارے رائٹرز کے مطابق اس حملے میں کم از کم 12 افراد زخمی ہوئے ہیں، تاہم کسی ہلاکت کی اطلاع نہیں ملی۔

ماہرین کے مطابق E-3 Sentry طیارہ جدید ریڈار سسٹم سے لیس ہوتا ہے جو دور سے دشمن کی نقل و حرکت کا پتا لگانے اور جنگی طیاروں کو رہنمائی فراہم کرنے میں کلیدی کردار ادا کرتا ہے۔ امریکی فضائیہ کے پاس ایسے طیاروں کی تعداد محدود ہے، جس کی وجہ سے اس کا نقصان ایک بڑا دھچکا سمجھا جا رہا ہے۔سابق امریکی پائلٹ اور دفاعی تجزیہ کار ہیدر پینی کا کہنا ہے کہ اس طیارے کا نقصان “انتہائی تشویشناک” ہے کیونکہ یہ فضائی جنگی آپریشنز میں مرکزی حیثیت رکھتا ہے۔جس فضائی اڈے کو نشانہ بنایا گیا وہ پرنس سلطان ایئر بیس ہے، جو خطے میں امریکی افواج کے لیے نہایت اہم سمجھا جاتا ہے اور ایران کے خلاف کارروائیوں میں کلیدی کردار ادا کرتا رہا ہے۔

اسپین نے ایران جنگ میں شامل طیاروں کے لیے اپنی فضائی حدود بند کرنے کا فیصلہ کر لیا ہے، جس کے بعد امریکی اور دیگر متعلقہ پروازوں کو متبادل راستے اختیار کرنا ہوں گے۔

رپورٹ کے مطابق اس فیصلے کے تحت اسپین میں موجود اہم فوجی اڈوں روٹا نیول بیس اور مورون ایئر بیس کے استعمال پر بھی پابندی عائد کر دی گئی ہے، جہاں امریکی افواج تعینات ہیں۔یورپی میڈیا اور اخبار نے فوجی ذرائع کے حوالے سے تصدیق کی ہے کہ یہ پابندی ان تمام طیاروں پر لاگو ہوگی جو ایران کے خلاف جاری جنگ سے کسی بھی طرح منسلک ہیں۔ اس میں وہ امریکی فوجی پروازیں بھی شامل ہو سکتی ہیں جو برطانیہ یا فرانس سے اڑان بھر کر مشرقِ وسطیٰ جاتی ہیں۔

اس فیصلے کے باعث امریکی فوجی طیاروں کو اب مشرقِ وسطیٰ پہنچنے کے لیے اسپین کی فضائی حدود سے گریز کرنا ہوگا، جس سے ان کے راستے طویل اور پیچیدہ ہو سکتے ہیں۔اسپین کے وزیرِ معیشت کارلوس کیورپو نے ایک ریڈیو انٹرویو میں کہا کہ یہ فیصلہ اس حکومتی پالیسی کا حصہ ہے جس کے تحت اسپین کسی ایسی جنگ میں حصہ نہیں لے گا جو یکطرفہ طور پر شروع کی گئی ہو اور بین الاقوامی قوانین کے خلاف ہو۔

دوسری جانب اسپین کے وزیر اعظم پیڈرو سانچیز پہلے ہی ایران پر امریکی اور اسرائیلی حملوں کے سخت ناقد رہے ہیں اور انہیں “غیر ذمہ دارانہ اور غیر قانونی” قرار دے چکے ہیں۔ادھر امریکی صدر ڈونلڈ ٹرمپ نے خبردار کیا ہے کہ اگر اسپین نے امریکی فوج کو اپنے اڈے استعمال کرنے کی اجازت نہ دی تو واشنگٹن میڈرڈ کے ساتھ تجارتی تعلقات محدود کر سکتا ہے۔تجزیہ کاروں کے مطابق اسپین کا یہ اقدام عالمی سطح پر ایران جنگ کے حوالے سے بڑھتی ہوئی تقسیم اور اختلافات کی عکاسی کرتا ہے، جبکہ اس سے نیٹو اتحادیوں کے درمیان بھی کشیدگی میں اضافہ ہو سکتا ہے۔

اسرائیل کے شہر حیفہ کے ساحلی علاقے حیفہ بے میں واقع آئل ریفائنری کمپلیکس سے آج گہرے سیاہ دھوئیں کے بادل اٹھتے دیکھے گئے، جب ایک روکے گئے حملے کا ملبہ براہِ راست تنصیب پر آ گرا۔

اسرائیلی فائر اینڈ ریسکیو سروس کے مطابق امدادی ٹیمیں جب جائے وقوعہ پر پہنچیں تو انہوں نے ریفائنری کے اندر ایک آئل ٹینکر پر "براہِ راست ضرب” کے واضح شواہد دیکھے۔ اس کے ساتھ ہی کمپلیکس کی ایک اور عمارت کی چھت سے شدید دھواں اٹھ رہا تھا، جس نے پورے علاقے کو اپنی لپیٹ میں لے لیا۔حکام کا کہنا ہے کہ واقعے میں کسی جانی نقصان کی اطلاع نہیں ملی، تاہم صورتحال پر قابو پانے کے لیے ریسکیو ٹیمیں فوری طور پر سرگرم عمل ہو گئیں۔

یاد رہے کہ رواں ماہ کے آغاز میں بھی اسی حیفہ آئل ریفائنری کمپلیکس کو نشانہ بنایا گیا تھا، جب ایک ایرانی میزائل وہاں آ کر گرا تھا۔ اس واقعے میں بھی کوئی جانی نقصان نہیں ہوا تھا، تاہم اس کے بعد سیکیورٹی خدشات میں اضافہ دیکھا گیا ہے۔حالیہ واقعہ خطے میں جاری کشیدگی کے تناظر میں اہمیت اختیار کر گیا ہے، جہاں حساس تنصیبات کو بار بار خطرات لاحق ہیں۔