Blog

‎ملک بھر کے بجلی صارفین کیلئے بڑی خوشخبری سامنے آئی ہے، نیپرا میں ہونے والی سماعت کے بعد صارفین کو مجموعی طور پر 63 ارب 94 کروڑ روپے ریلیف ملنے کا قوی امکان ظاہر کیا جا رہا ہے۔
‎تفصیلات کے مطابق نیپرا نے بجلی کی تقسیم کار کمپنیوں کی جانب سے سال 2026 کی پہلی سہ ماہی، یعنی جنوری سے مارچ تک کی ایڈجسٹمنٹ درخواستوں پر سماعت مکمل کر لی ہے۔
‎سماعت کے دوران ڈسکوز، پیسکو اور میپکو حکام نے بریفنگ دیتے ہوئے بتایا کہ مختلف مدوں میں اخراجات کم ہونے کے باعث بجلی صارفین کو بڑا ریلیف دینا ممکن ہوا ہے۔
‎حکام کے مطابق جنوری سے مارچ کے دوران کپیسٹی چارجز میں 36 ارب 83 کروڑ 70 لاکھ روپے کی کمی ریکارڈ کی گئی جبکہ یوز آف سسٹم چارجز اور مارکیٹ آپریشن فیس میں بھی 11 ارب 24 کروڑ روپے کمی آئی۔
‎اسی طرح انکریمنٹل یونٹس کی مد میں 23 ارب 51 کروڑ روپے کمی کی درخواست بھی دی گئی ہے۔
‎میپکو نے اپنی سہ ماہی ایڈجسٹمنٹ میں 6 اعشاریہ 3 ارب روپے کمی کی درخواست دیتے ہوئے بتایا کہ انڈسٹری کو بجلی کی فروخت میں 28 فیصد اضافہ ہوا ہے۔
‎پیسکو نے بھی 8 اعشاریہ 6 ارب روپے کمی کی درخواست دی جس میں کپیسٹی پیمنٹ اور سسٹم چارجز میں نمایاں کمی شامل ہے۔
‎سماعت کے دوران بجلی کی قیمت میں ایک روپے 93 پیسے فی یونٹ تک کمی کے امکان پر صارفین اور صنعتکاروں نے اطمینان کا اظہار کیا۔
‎صنعتی نمائندوں کا کہنا تھا کہ عالمی سطح پر توانائی مہنگی ہونے کے باوجود پاکستان میں بجلی کی قیمتوں میں کمی خوش آئند پیش رفت ہے۔
‎نیپرا سماعت میں یہ معاملہ بھی زیر بحث آیا کہ ملک میں اس وقت 45 ہزار میگاواٹ بجلی پیدا کرنے کی صلاحیت موجود ہے جبکہ ضرورت کے مطابق صرف 25 ہزار میگاواٹ بجلی پیدا کی جا رہی ہے۔
‎صارفین نے سوال اٹھایا کہ اضافی پیداواری صلاحیت موجود ہونے کے باوجود نئے پاور پلانٹس کیوں لگائے جا رہے ہیں جبکہ موجودہ نظام کو بہتر بنا کر بجلی مزید سستی کی جا سکتی ہے۔

‎پاک فوج کے شعبہ تعلقات عامہ آئی ایس پی آر کے مطابق شمالی وزیرستان کے علاقے شیوہ میں سیکیورٹی فورسز نے خفیہ اطلاعات کی بنیاد پر بڑے پیمانے پر سرچ اور کلیئرنس آپریشن کیا جس کے دوران 22 دہشتگرد مارے گئے۔
‎آئی ایس پی آر کے مطابق یہ ایریا سینیٹائزیشن آپریشن 17 مئی 2026 سے جاری ہے اور کارروائی کے دوران سیکیورٹی فورسز نے دہشتگردوں کے ٹھکانوں کو مؤثر انداز میں نشانہ بنایا۔
‎بیان میں کہا گیا کہ ہلاک ہونے والے دہشتگرد بھارتی سرپرستی میں کام کرنے والی “فتنہ الخوارج” تنظیم سے تعلق رکھتے تھے اور علاقے میں متعدد دہشتگرد کارروائیوں میں ملوث رہے تھے۔
‎فورسز نے دہشتگردوں کے قبضے سے اسلحہ اور گولہ بارود بھی برآمد کیا ہے۔
‎آئی ایس پی آر کے مطابق علاقے کو مکمل طور پر گھیرے میں لے لیا گیا ہے جبکہ باقی دہشتگردوں کے خاتمے کیلئے کلیئرنس آپریشن تاحال جاری ہے۔
‎بیان میں کہا گیا کہ شواہد سے یہ بھی ثابت ہوا ہے کہ دہشتگرد مقامی آبادی کو ڈرا دھمکا کر اپنے لیے محفوظ راستے حاصل کرتے تھے اور شہریوں کو انسانی ڈھال کے طور پر استعمال کرتے تھے۔
‎پاک فوج نے اس عمل کو انتہائی قابل مذمت قرار دیتے ہوئے کہا کہ معصوم شہریوں کی جانوں کو خطرے میں ڈالنے کا کوئی جواز نہیں دیا جا سکتا۔
‎آئی ایس پی آر نے واضح کیا کہ “عزمِ استحکام” وژن کے تحت ملک سے بیرونی سرپرستی میں ہونے والی دہشتگردی کے مکمل خاتمے تک انسداد دہشتگردی کارروائیاں پوری شدت سے جاری رہیں گی۔

‎ملک میں ایڈوانسڈ اسٹیج کینسر کے علاج کیلئے استعمال ہونے والے دو اہم انجکشنز کی فروخت اور استعمال پر پابندی عائد کر دی گئی ہے۔
‎ڈرگ ریگولیٹری اتھارٹی آف پاکستان نے انکشاف کیا ہے کہ عالمی برانڈز کے نام پر جعلی کینسر انجکشنز مارکیٹ میں سپلائی کیے جا رہے تھے، جس کے بعد فوری کارروائی کرتے ہوئے ان پر ملک گیر پابندی لگا دی گئی۔
‎یہ کارروائی ملٹی نیشنل فارماسیوٹیکل کمپنی آسٹرازینیکا کی شکایت پر کی گئی۔
‎ڈریپ کی جانب سے جاری ریپڈ الرٹ کے مطابق “امفنزی” اور “انہرٹو” نامی کینسر انجکشنز کے مخصوص بیچز جعلی قرار دیے گئے ہیں۔
‎حکام کے مطابق “Imfinzi 500mg/10ml” کا بیچ نمبر ASCB جبکہ “Enhertu 100mg” کا بیچ نمبر DK1262 جعلی پایا گیا ہے۔
‎رپورٹ کے مطابق جعلی ادویات کے پیکٹس پر آسٹرازینیکا جاپان اور سویڈن کے جعلی پتے درج کیے گئے تھے تاکہ انہیں اصلی ظاہر کیا جا سکے۔
‎لاہور کے مختلف اسپتالوں کے ڈاکٹرز نے مریضوں میں ادویات کے اثرات ظاہر نہ ہونے پر ان انجکشنز کے جعلی ہونے کی نشاندہی کی تھی۔
‎ڈریپ حکام کا کہنا ہے کہ یہ ادویات پھیپھڑوں، جگر، مثانے، معدے، مختلف ٹیومرز اور خواتین میں چھاتی کے کینسر کے علاج کیلئے استعمال ہوتی ہیں۔
‎اتھارٹی نے خبردار کیا ہے کہ ان جعلی انجکشنز کی طبی افادیت یا تو صفر ہے یا غیر واضح، اور ان کا استعمال مریضوں کیلئے جان لیوا ثابت ہو سکتا ہے۔
‎ڈریپ نے پنجاب حکومت کو فوری تحقیقات کی ہدایت دیتے ہوئے سپلائی چین میں شامل عناصر کے خلاف سخت کارروائی کا حکم دیا ہے۔
‎ملک بھر کے اسپتالوں، فارمیسیز اور بلڈ بینکس کو متاثرہ بیچز فوری طور پر فروخت سے روکنے اور اسٹاک الگ کرنے کی ہدایت جاری کر دی گئی ہے۔

‎حکومتِ پاکستان نے خلیجی ممالک سے پاکستانی شہریوں کی بے دخلی کی خبروں کو بے بنیاد قرار دیتے ہوئے واضح کیا ہے کہ کسی بھی خلیجی ملک سے پاکستانیوں کو نکالے جانے کی اطلاعات میں کوئی صداقت نہیں۔
‎قومی اسمبلی کے اجلاس میں اوورسیز پاکستانیوں کو درپیش مسائل، انسانی اسمگلنگ کے خلاف کارروائیوں اور غیر قانونی شناختی کارڈز کے معاملے پر اہم بریفنگ دی گئی۔
‎اجلاس کے دوران حکومتی ارکان نے کہا کہ سوشل میڈیا اور مختلف حلقوں میں گردش کرنے والی خبروں کے برعکس کسی خلیجی ملک نے پاکستانی شہریوں کی اجتماعی بے دخلی کا کوئی فیصلہ نہیں کیا۔
‎وزیرِ مملکت برائے داخلہ طلال چوہدری نے ایوان کو بتایا کہ حکومت کی سخت پالیسیوں اور نگرانی کے باعث غیر قانونی طریقے سے بیرون ملک جانے کی کوششوں میں 44 فیصد کمی ریکارڈ کی گئی ہے۔
‎انہوں نے کہا کہ تمام بین الاقوامی ہوائی اڈوں پر جعلی دستاویزات اور پاسپورٹس کی شناخت کیلئے جدید مشینیں نصب کی جا چکی ہیں جبکہ جعلی کاغذات پر سفر کرنے والوں کو فوری طور پر آف لوڈ کیا جاتا ہے۔
‎طلال چوہدری کے مطابق ایف آئی اے عملے کی تربیت بھی جاری ہے اور انہی اقدامات کی بدولت عالمی سطح پر پاکستانی پاسپورٹ کی ساکھ میں بہتری آ رہی ہے۔
‎انہوں نے اس بات پر بھی تشویش ظاہر کی کہ بعض مقامی افراد نے ذاتی مفاد کیلئے غیر ملکیوں کو اپنے فیملی ٹری میں شامل کروا کر انہیں پاکستانی شناختی کارڈز دلوائے۔
‎اجلاس میں پیش کی گئی سرکاری دستاویز کے مطابق گزشتہ تین برس کے دوران سات خلیجی ممالک میں مقیم پاکستانی محنت کشوں کی جانب سے مجموعی طور پر 9 ہزار 233 شکایات درج کروائی گئیں۔