Blog

چینی وزارتِ خارجہ نے متحدہ عرب امارات کے ساحل کے قریب خلیج میں اپنے آئل ٹینکر پر حملے کے واقعے پر گہری تشویش کا اظہار کرتے ہوئے کہا ہے کہ صورتحال پر مسلسل نظر رکھی جا رہی ہے۔

چینی وزارتِ خارجہ کے ترجمان کے مطابق حملے کا نشانہ بننے والے آئل ٹینکر پر چینی عملہ موجود تھا، تاہم خوش قسمتی سے اب تک کسی جانی نقصان کی اطلاع سامنے نہیں آئی۔ ترجمان نے کہا کہ چین اپنے شہریوں اور سمندری مفادات کے تحفظ کو یقینی بنانے کے لیے متعلقہ فریقوں سے رابطے میں ہے۔برطانوی خبر رساں ادارے رائٹرز کے مطابق چینی ٹینکر 4 مئی کو مینا صقر کے قریب حملے کا نشانہ بنا۔ واقعے کے بعد خطے میں سیکیورٹی خدشات مزید بڑھ گئے ہیں، جہاں پہلے ہی امریکا اور ایران کے درمیان کشیدگی کے باعث غیر یقینی صورتحال پائی جا رہی ہے۔

چینی میڈیا ادارے شیاشن کی رپورٹ کے مطابق حملے کے بعد نامعلوم جہاز کے ڈیک میں آگ بھڑک اٹھی۔ رپورٹ میں متاثرہ جہاز کی شناخت “چائنا آنر اینڈ کریو” کے نام سے کی گئی ہے۔ آگ لگنے کے بعد امدادی کارروائیاں شروع کی گئیں جبکہ جہاز کے عملے کو محفوظ مقام پر منتقل کرنے کی کوششیں کی گئیں۔تجزیہ کاروں کا کہنا ہے کہ خلیج میں بڑھتی ہوئی کشیدگی عالمی سمندری تجارت کے لیے بڑا خطرہ بنتی جا رہی ہے۔ رپورٹس کے مطابق سیکڑوں بحری جہاز اور تقریباً 20 ہزار سی فیررز اس وقت خطے میں پھنسے ہوئے ہیں، جس کے باعث تیل کی ترسیل، تجارتی سرگرمیوں اور بین الاقوامی شپنگ کے نظام پر منفی اثرات مرتب ہونے کا خدشہ ہے۔ماہرین کے مطابق اگر خطے میں کشیدگی برقرار رہی تو عالمی توانائی منڈیوں میں بے یقینی مزید بڑھ سکتی ہے، جبکہ خلیج کے اہم بحری راستوں پر سیکیورٹی کے مسائل عالمی معیشت کے لیے نئے چیلنجز پیدا کر سکتے ہیں۔

انڈونیشیا کے شمالی مالوکو صوبے کے جزیرے ہالماہیرا میں واقع فعال آتش فشاں ماؤنٹ ڈوکو نو میں جمعہ کی صبح ایک زور دار آتش فشانی دھماکے کے نتیجے میں کم از کم تین افراد ہلاک ہو گئے، جبکہ ایک بڑے ریسکیو آپریشن کے ذریعے درجن سے زائد پھنسے ہوئے سیاحوں کو بچانے کی کوششیں جاری رہیں۔

مقامی حکام کے مطابق ہلاک ہونے والوں میں سنگاپور کے شہری اور ایک انڈونیشیائی شہری بھی شامل ہیں، تاہم قومی سرچ اینڈ ریسکیو ادارے نے تاحال اموات اور شناخت کی باضابطہ تصدیق نہیں کی۔پولیس چیف ارلیخسن پاساریبو کے مطابق واقعے کے وقت مجموعی طور پر 20 کے قریب سیاح ماؤنٹ ڈوکو نو کی چڑھائی پر موجود تھے، جن میں 9 غیر ملکی اور 11 مقامی افراد شامل تھے۔بعد ازاں حکام نے تصدیق کی کہ 15 سیاح محفوظ طور پر نیچے اترنے میں کامیاب ہو گئے، تاہم تین افراد کی لاشیں ابھی تک آتش فشاں کے خطرناک علاقے میں موجود ہیں۔مزید بتایا گیا ہے کہ دو دیگر کوہ پیما اب بھی پہاڑ پر موجود ہیں اور ریسکیو ٹیموں کے ساتھ رابطے میں ہیں۔

ایک ویڈیو میں دیکھا جا سکتا ہے کہ آتش فشاں کے دہانے سے دھوئیں اور راکھ کا ایک بہت بڑا بادل آسمان کی طرف اٹھ رہا ہے۔ انڈونیشیائی گائیڈ الیکس دجنگو کے مطابق دھماکے سے قبل شدید زمینی جھٹکے محسوس ہوئے۔
انہوں نے بتایا “میں نے دیکھا کہ چھوٹے پتھر اور مٹی نیچے کی طرف لڑھک رہی تھی، میں نے فوراً اپنے کلائنٹس کو نیچے بھاگنے کا کہا، یہ بہت خوفناک لمحہ تھا۔”انہوں نے مزید کہا کہ کچھ سیاح اس وقت بھی کریٹر کے قریب ویڈیوز بنا رہے تھے۔

ماؤنٹ ڈوکو نو انڈونیشیا کے سب سے زیادہ فعال آتش فشاؤں میں سے ایک ہے اور ماہرین کے مطابق مارچ کے آخر سے اس کی سرگرمیوں میں اضافہ دیکھا جا رہا تھا۔مقامی گائیڈز کے مطابق جب یہ آتش فشاں چند دن خاموش رہتا ہے تو اس کے بعد اچانک بڑا دھماکہ ہونے کا خطرہ بڑھ جاتا ہے، اور یہی صورتحال اس واقعے سے پہلے بھی دیکھی گئی۔واضح رہے کہ انڈونیشیا دنیا کے اس خطرناک زون میں واقع ہے جسے “رِنگ آف فائر” کہا جاتا ہے، جہاں زلزلے اور آتش فشانی واقعات عام ہیں۔ یہ زون جاپان، انڈونیشیا، امریکہ اور جنوبی امریکہ تک پھیلا ہوا ہے اور دنیا کے سب سے زیادہ زلزلہ خیز علاقوں میں شمار ہوتا ہے۔

بھارتی ریاستوں میں ہونے والے حالیہ انتخابات کے غیر سرکاری نتائج نے ایک بار پھر ملک کی سیاست میں مذہبی بنیادوں پر گہری تقسیم کو اجاگر کر دیا ہے۔ مختلف سیاسی و سماجی تجزیہ کاروں کے مطابق ان نتائج سے ہندو اور مسلم ووٹرز کے درمیان واضح سیاسی رجحانات سامنے آئے ہیں، جو بھارت کے جمہوری اور انتخابی منظرنامے میں ایک اہم تبدیلی کی نشاندہی کرتے ہیں۔

ذرائع کے مطابق حالیہ انتخابات میں مسلم ووٹرز کی بڑی تعداد نے اپوزیشن جماعتوں، خصوصاً کانگریس اور بعض علاقائی جماعتوں کی حمایت کی ہے۔ مبصرین کے مطابق اس رجحان کی ایک بڑی وجہ یہ تاثر ہے کہ کانگریس اور دیگر اپوزیشن جماعتیں نسبتاً سیکولر سیاسی سوچ رکھتی ہیں اور اقلیتوں کی نمائندگی کے حوالے سے زیادہ قابلِ قبول سمجھی جاتی ہیں۔دوسری جانب ہندو ووٹرز کی اکثریت نے حکمراں جماعت بھارتیہ جنتا پارٹی (بی جے پی) کی حمایت جاری رکھی ہے، جسے مبصرین ہندو قوم پرست سیاسی بیانیے اور مضبوط تنظیمی ڈھانچے کا نتیجہ قرار دیتے ہیں۔

تجزیہ کاروں کا کہنا ہے کہ بی جے پی گزشتہ برسوں میں قومی اور ریاستی سیاست میں نمایاں برتری حاصل کرنے میں کامیاب رہی ہے۔ اس دوران بعض ریاستوں میں پارٹی کی جانب سے مسلم امیدواروں کو محدود یا نہ کے برابر ٹکٹ دینے کی حکمت عملی بھی دیکھی گئی ہے۔بی جے پی رہنماؤں کے مطابق یہ فیصلے سیاسی زمینی حقائق اور ووٹرز کے عمومی رجحانات کو مدنظر رکھ کر کیے جاتے ہیں۔ تاہم اپوزیشن جماعتیں اس حکمت عملی پر تنقید کرتے ہوئے کہتی ہیں کہ اس سے اقلیتی نمائندگی متاثر ہو سکتی ہے اور سیاسی شمولیت کے حوالے سے سوالات پیدا ہوتے ہیں۔اپوزیشن رہنماؤں کا کہنا ہے کہ انتخابی سیاست میں مذہبی بنیادوں پر تقسیم جمہوری اصولوں کے لیے ایک چیلنج ہے۔ ان کے مطابق اگر سیاسی جماعتیں تمام طبقات کو برابر نمائندگی نہ دیں تو سماجی فاصلے مزید بڑھ سکتے ہیں۔

سیاسی مبصرین اس رجحان کو “ریورس پولرائزیشن” کے طور پر بیان کر رہے ہیں، جس میں ووٹرز تیزی سے نظریاتی اور مذہبی شناختوں کی بنیاد پر تقسیم ہوتے جا رہے ہیں۔ ان کے مطابق یہ رجحان بھارت کی ریاستی سیاست میں ایک گہری تبدیلی کی علامت ہے۔ماہرین نے خبردار کیا ہے کہ اگر اس تقسیم کو کم کرنے کے لیے مؤثر سیاسی اور سماجی اقدامات نہ کیے گئے تو مستقبل میں یہ خلیج مزید وسیع ہو سکتی ہے، جس کے اثرات نہ صرف انتخابات بلکہ مجموعی سماجی ہم آہنگی پر بھی پڑ سکتے ہیں۔

عالمی ادارۂ صحت نے تصدیق کی ہے کہ نیدرلینڈز کی قومی ایئرلائن کی ایک ڈچ فضائی میزبان، جسے ہینٹا وائرس کے ممکنہ خطرے کے باعث اسپتال منتقل کیا گیا تھا، اس کا ٹیسٹ منفی آگیا ہے۔ خاتون فضائی میزبان ایک ایسی 69 سالہ ڈچ خاتون کے قریبی رابطے میں رہی تھیں جو 26 اپریل کو جنوبی افریقا کے شہر جوہانسبرگ میں ہینٹا وائرس کے باعث انتقال کر گئی تھیں۔

میڈیا رپورٹس کے مطابق مذکورہ فضائی میزبان میں ہلکی علامات ظاہر ہوئی تھیں جس کے بعد احتیاطی تدابیر کے طور پر انہیں ایمسٹرڈیم کے اسپتال میں داخل کیا گیا۔ تاہم ڈبلیو ایچ او کی تازہ رپورٹ کے مطابق ان میں وائرس کی موجودگی نہیں پائی گئی، جس سے فوری خطرات میں کمی آئی ہے۔

یہ واقعہ اس بڑے عالمی طبی بحران کا حصہ ہے جو کروز شپ سے جڑا ہوا ہے۔ یہ بحری جہاز یکم اپریل کو جنوبی ارجنٹینا سے روانہ ہوا تھا اور اس میں 149 افراد سوار تھے جن میں 23 برطانوی شہری بھی شامل تھے۔ جہاز کے سفر کے دوران متعدد افراد میں ہینٹا وائرس کی علامات سامنے آئیں جبکہ اب تک تین افراد ہلاک ہوچکے ہیں، جن میں ایک ڈچ جوڑا اور ایک جرمن شہری شامل ہیں۔عالمی ادارۂ صحت کے مطابق اب تک اس وبا سے منسلک پانچ تصدیق شدہ کیسز سامنے آچکے ہیں جبکہ مزید تین مشتبہ کیسز کی تحقیقات جاری ہیں۔ کم از کم چھ افراد مختلف ممالک کے اسپتالوں میں زیرِ علاج ہیں۔ متاثرہ افراد کو نیدرلینڈز، جرمنی، جنوبی افریقا اور سوئٹزرلینڈ منتقل کیا گیا ہے۔

برطانوی حکام نے بھی صورتحال پر گہری نظر رکھی ہوئی ہے۔ برطانیہ کی ہیلتھ سیکیورٹی ایجنسی کے مطابق ایک نئے برطانوی شہری میں بھی ہینٹا وائرس کا مشتبہ کیس سامنے آیا ہے۔ یہ شخص جنوبی بحرِ اوقیانوس کے جزیرے پر موجود تھا جہاں کروز شپ نے گزشتہ ماہ مختصر قیام کیا تھا۔حکام کے مطابق جہاز پر موجود تمام برطانوی مسافروں اور عملے کو برطانیہ واپسی کے بعد 45 روز تک آئسولیشن میں رہنے کی ہدایت کی جائے گی۔ برطانوی حکومت نے اعلان کیا ہے کہ کینری آئی لینڈز پہنچنے پر مسافروں کے لیے خصوصی حفاظتی اقدامات کے تحت وطن واپسی کی پرواز کا انتظام کیا جائے گا، جس میں متعدی امراض کے ماہرین بھی موجود ہوں گے۔

طبی ماہرین کے مطابق ہینٹا وائرس عام طور پر چوہوں اور دیگر جنگلی چوہا نما جانوروں کے فضلے، پیشاب یا لعاب سے انسانوں میں منتقل ہوتا ہے۔ بعض اقسام میں انسان سے انسان میں منتقلی بھی ممکن سمجھی جاتی ہے، تاہم ماہرین کا کہنا ہے کہ اس وائرس کے عالمی وبا بننے کے امکانات بہت کم ہیں۔امریکا کے معروف ماہر صحت اور جارج ٹاؤن یونیورسٹی کے پروفیسر لیری گوسٹن نے خبردار کیا ہے کہ ہینٹا وائرس “کووڈ سے زیادہ جان لیوا” ہوسکتا ہے، لیکن اس کی منتقلی کی رفتار انتہائی محدود ہے۔ ان کے مطابق کروز شپ جیسی بند اور گنجان جگہیں وائرس کے پھیلاؤ کے لیے خطرناک ماحول فراہم کرتی ہیں۔

دوسری جانب یونیورسٹی آف باتھ کے سائنسدانوں نے ہینٹا وائرس کے خلاف ایک “انتہائی امید افزا” ویکسین تیار کرنے کا دعویٰ کیا ہے۔ تحقیقاتی ٹیم کی سربراہ پروفیسر ایسل سارتبائیوا کے مطابق ابتدائی لیبارٹری تجربات میں ویکسین نے مثبت نتائج دیے ہیں، تاہم انسانی آزمائشوں کے بعد ہی اس کی افادیت اور حفاظت کی مکمل تصدیق ہوسکے گی۔ ماہرین کا اندازہ ہے کہ ویکسین عام عوام تک پہنچنے میں مزید تین سے پانچ سال لگ سکتے ہیں۔ادھر نیدرلینڈز کے ادارۂ صحت نے بتایا ہے کہ وائرس سے متاثرہ شخص کے ساتھ فضائی سفر کرنے والے تین افراد کے ٹیسٹ کیے گئے، جن میں سے دو کے نتائج منفی آئے ہیں جبکہ تیسرے شخص کی رپورٹ کا انتظار ہے۔عالمی ادارے مسلسل اس صورتحال کی نگرانی کر رہے ہیں جبکہ مختلف ممالک نے متاثرہ افراد کے رابطوں کی ٹریسنگ، آئسولیشن اور طبی نگرانی کے اقدامات مزید سخت کر دیے ہیں۔

بحری جہاز ’ایم وی ہونڈیوس‘ پر پھیلنے والے مہلک وائرس ہنٹا کی تحقیقات کے دوران ایک ڈچ میاں بیوی کو مرکزی حیثیت حاصل ہو گئی ہے، دونوں کئی ماہ تک ارجنٹینا، چلی اور یوراگوئے میں سفر کرنے کے بعد یکم اپریل کو ارجنٹینا کے شہر اوشوائیا سے جہاز پر سوار ہوئے تھے،بین الاقوامی میڈیا رپورٹس کے مطابق بحری جہاز پر موجود جوڑے میں پہلے شوہر بیمار ہوا اور 11 اپریل کو جہاز پر ہی دم توڑ گیا جبکہ اہلیہ کو جزیرہ سینٹ ہیلینا سے جنوبی افریقا منتقل کیا گیا جہاں وہ بھی جانبر نہ ہو سکی،ایک جرمن مسافر کی ہلاکت بھی اسی وائرس سے جوڑی گئی ہے جبکہ متعدد مسافروں اور عملے کے ارکان کا علاج جاری ہے