Blog

رہنما مسلم لیگ ن خرم دستگیر کا کہنا ہے کہ بھارت نے عالمی قانون کی توہین کی اور دریاؤں کا گلا گھونٹنے کی کوشش کی، بھارت نے پانی کو ہتھیار کے طور پر استعمال کیا، بھارتی دھمکیاں صرف ایک مرتبہ نہیں بلکہ بار بار دہرائی گئیں، اگر ہمیں جنگ کرنا پڑی تو کریں گے لیکن ہم امن چاہتے ہیں۔

اسلام آباد میں سندھ طاس معاہدے سے متعلق عالمی سینیمار سے خطاب کرتے ہوئے خرم دستگیر نے کہا کہ میں یہاں زندہ دریاؤں کے حق میں آواز اٹھانے آیا ہوں، بھارت نے عالمی قانون کی توہین کی اور دریاؤں کا گلا گھونٹنے کی کوشش کی، آج میرا مؤقف ہے بھارت نے پانی کو ایک ہتھیار کے طور پر استعمال کیا۔ان کا کہنا ہے کہ گزشتہ سال بھارت نے یکطرفہ طور پر سندھ طاس معاہدے کو معطل کرنے کا اعلان کیا، سندھ طاس معاہدے میں غیرمعمولی مضبوطی اور لچک موجود تھی، سندھ طاس معاہدے کو معطل کرنے کی کوشش کی گئی، سندھ طاس معاہدے کی معطلی قانونی اعتبار سے بے معنی ہے، معاہدے میں ایسی کسی یکطرفہ معطلی کی کوئی گنجائش موجود نہیں۔

خرم دستگیر نے کہا کہ معاملہ معاہدے کی معطلی تک محدود نہیں رہا، کھلی دھمکیوں کا سلسلہ شروع ہوگیا، بھارتی وزیر نے کہا کہ یقینی بنائیں گے دریائے سندھ کا ایک قطرہ بھی پاکستان نہ پہنچے، بھارتی وزیر داخلہ امیت شاہ نے کہا سندھ طاس معاہدہ کبھی بحال نہیں ہوگا، بھارتی وزراء کے بیانات اسی مؤقف کا تسلسل ہیں جسے مودی نے 2016ء میں پیش کیا اور پھر بارہا دہرایا۔ن لیگی رہنماء کا کہنا ہے کہ بھارتی دھمکیاں صرف ایک مرتبہ نہیں بلکہ باربار دہرائی گئیں، بھارتی بیانات اور مؤقف کا حقائق کی بنیاد پر جائزہ لینا ضروری ہے، اگر ہمیں جنگ کرنا پڑی تو کریں گے لیکن ہم امن چاہتے ہیں۔

چیئرمین پاکستان پیپلز پارٹی بلاول بھٹو نے کہا ہے کہ پانی صرف جغرافیہ نہیں بلکہ خوراک، مستقبل اور زندگی کا سوال ہے

سندھ طاس معاہدہ،بین الاقوامی سیمینار سے خطاب کرتے ہوئے بلاول زرداری کا کہنا تھا کہ دنیا کو احساس ہو چکا کہ پانی کے وسائل عالمی سیاست اور سلامتی کا مرکزی مسئلہ بن چکے ہیں۔ جس طرح آبنائے ہرمز کی بندش عالمی معیشت کو متاثر کرتی ہے، اسی طرح دریائے سندھ کا پانی پاکستان کی زندگی کی ضمانت ہے۔ سمندری گزرگاہوں یا آبی وسائل کو بطور ہتھیار استعمال کرنا عالمی امن کے لیے خطرناک رجحان ہے۔سندھ طاس معاہدہ کی بحالی کے بغیر پاکستان اور بھارت کے درمیان پائیدار امن ممکن نہیں۔ پاکستان نے جنگ بندی کی شرائط پر عمل کیا جبکہ بھارت نے اپنے وعدوں کی مکمل پاسداری نہیں کی۔سندھ طاس معاہدے کے تحت پاکستان کے حصے کے پانی کا تحفظ یقینی بنایا جانا چاہیے۔ سندھ محض ایک دریا نہیں بلکہ کروڑوں شہریوں کی زندگی، زراعت اور معیشت کا ذریعہ ہے۔ سندھ، جہلم اور چناب کے پانی پر پاکستان کا حق بین الاقوامی معاہدے کے تحت تسلیم شدہ ہے۔ پانی کے معاملے کو محض تکنیکی تنازع نہیں بلکہ قومی سلامتی کے مسئلے کے طور پر دیکھا جانا چاہیے۔پاکستان کے آبی حقوق کو نقصان پہنچانے کی ہر کوشش کا قومی سطح پر جواب دیا جائے گا۔ پاکستان امن کا خواہاں ہے لیکن اپنے عوام کے بنیادی حقوق اور آبی مفادات پر کوئی سمجھوتہ نہیں کرے گا۔ کروڑوں عوام کے حقِ آب کے تحفظ پر پوری پاکستانی قوم متحد ہے۔پانی کا سیاسی دباؤ یا بطور ہتھیار استعمال بین الاقوامی قوانین اور معاہدوں کے منافی ہے۔

سید مہر علی شاہ کا کہنا ہے کہ عالمی عدالت نے بھارت سے کہا وہ دریاؤں کے بہاؤ میں کوئی خلل نہ ڈالے، پاکستان اپنے حصے کے پانی کو روکنے کی اجازت نہیں دے سکتا۔

پاکستان کمشنر برائے سندھ طاس معاہدہ سید مہر علی شاہ کا اسلام آباد میں سیمینار سے خطاب میں کہنا ہے کہ سندھ طاس معاہدہ عالمی سطح پر تسلیم شدہ معاہدہ ہے، معاہدے پر کسی بھی طرح سیاسی گفتگو کی گنجائش نہیں، سندھ طاس معاہدے سے ہماری زراعت، خوراک، معیشت جڑی ہے۔انہوں نے کہا کہ یہ معاہدہ 2 ایٹمی طاقتوں کے درمیان امن کیلئے ہے، معاہدے میں مسائل کے حل کا جامع طریقہ کار موجود ہے، معاہدے سے متعلق تمام اصولوں پر عملدرآمد ضروری ہے، سندھ طاس معاہدہ 24 کروڑ پاکستانیوں کی زندگی کا معاملہ ہے۔سید مہر علی شاہ کا کہنا ہے کہ سندھ طاس معاہدے میں مجموعی طور پر 12 شقیں ہیں، شق 9 کے تحت معاملہ عالمی عدالت میں لے جایا جاسکتا ہے، عالمی ثالثی عدالت دو بار سندھ طاس معاہدے کی وضاحت کرچکی، عدالت نے واضح کیا بھارت معاہدے کو یکطرفہ معطل نہیں کرسکتا، عالمی عدالت نے بھارت سے کہا وہ دریاؤں کے بہاؤ میں کوئی خلل نہ ڈالے۔انہوں نے مزید کہا کہ بھارت دریائے چناب کے 1.9 ملین پانی کا بہاؤ متاثر کرنے جارہا ہے، پاکستان اپنے حصے کے پانی کو روکنے کی اجازت نہیں دے سکتا۔

وفاقی وزیر برائے ماحولیاتی تبدیلی مصدق ملک نے کہا ہے کہ پاکستان اپنے حصے کے پانی پر کسی بھی قسم کا سمجھوتہ نہیں کرے گا، جبکہ بھارت پانی کے بہاؤ کو کنٹرول کرکے اسے ایک ہتھیار کے طور پر استعمال کر رہا ہے، جس کے سنگین انسانی اور معاشی اثرات مرتب ہو رہے ہیں۔

سندھ طاس معاہدے پر منعقدہ بین الاقوامی سیمینار سے خطاب کرتے ہوئے مصدق ملک نے کہا کہ پاکستان تباہ کن سیلابوں اور موسمیاتی چیلنجز کا سامنا کر چکا ہے، تاہم یہ صرف ماحولیاتی مسئلہ نہیں بلکہ انصاف کا معاملہ بھی ہے۔ انہوں نے کہا کہ پاکستان کی بڑی آبادی کا ذریعہ معاش زراعت ہے اور پانی کی قلت کے باعث کسان کھیتی باڑی چھوڑنے پر مجبور ہو رہے ہیں۔وفاقی وزیر نے کہا کہ پاکستان پہلے ہی واضح کر چکا ہے کہ اپنے حصے کے پانی پر کسی قسم کا سمجھوتہ نہیں کیا جائے گا۔ ان کے مطابق سندھ طاس معاہدہ دنیا کے مضبوط ترین بین الاقوامی معاہدوں میں شمار ہوتا ہے اور کسی بھی ملک کو علاقائی یا عالمی امن کو یرغمال بنانے کی اجازت نہیں دی جا سکتی۔مصدق ملک کا کہنا تھا کہ پانی کی عدم دستیابی کے اثرات صرف پاکستان تک محدود نہیں بلکہ بنگلادیش سمیت دیگر خطے بھی اس سے متاثر ہو رہے ہیں۔ انہوں نے کہا کہ دنیا کے مختلف خطوں، چاہے دریائے نیل ہو یا فرات، پانی کے تنازعات ایک جیسے مسائل کو جنم دے رہے ہیں۔

انہوں نے الزام عائد کیا کہ بھارت نہ صرف پاکستان کے پانی کے بہاؤ کو کنٹرول کرنے کی کوشش کر رہا ہے بلکہ دنیا میں آلودگی پھیلانے والے بڑے ممالک میں بھی شامل ہے۔ ان کا کہنا تھا کہ "بھارت کی وجہ سے ہمارے 6 ہزار لوگ جاں بحق اور ہزاروں زخمی ہو چکے ہیں، اتنے لوگ تو جنگوں میں بھی نہیں مرتے۔”وفاقی وزیر نے کہا کہ سندھ طاس معاہدہ پاکستان اور بھارت کے درمیان تین جنگوں کے باوجود برقرار رہا، جو اس کی مضبوطی کا ثبوت ہے۔ ان کے مطابق اگر اس معاہدے کو نقصان پہنچا تو دنیا میں کسی بھی بین الاقوامی معاہدے کی حیثیت محفوظ نہیں رہے گی۔انہوں نے مزید کہا کہ عالمی ثالثی عدالت واضح طور پر قرار دے چکی ہے کہ کوئی بھی ملک یکطرفہ طور پر سندھ طاس معاہدہ معطل یا ختم نہیں کر سکتا اور نہ ہی پاکستان کے حصے کے دریاؤں پر ایسے ذخائر تعمیر کر سکتا ہے جو معاہدے کی خلاف ورزی ہوں۔ مصدق ملک نے الزام لگایا کہ بھارت عالمی ثالثی عدالت کے فیصلوں کو تسلیم کرنے سے بھی انکاری ہے، جو بین الاقوامی قوانین کے لیے ایک چیلنج ہے۔