Blog

‎ایران میں آیت اللہ علی خامنہ ای کی آخری رسومات اور سوگ کی تقریبات کے حوالے سے تیاریاں جاری ہیں۔ ایرانی حکام کے مطابق تہران، قم اور مشہد سمیت مختلف شہروں میں نمازِ جنازہ اور تعزیتی اجتماعات کے انتظامات مکمل کیے جا رہے ہیں، جبکہ آخری رسومات کا سلسلہ عراق کے مقدس شہروں تک بھی جاری رہے گا۔
‎رپورٹس کے مطابق آیت اللہ علی خامنہ ای کے ساتھ ان کے اہلِ خانہ کے چند افراد کی نمازِ جنازہ بھی ادا کی جائے گی۔ حکام کا کہنا ہے کہ ان تقریبات میں دنیا بھر سے مختلف ممالک کے وفود، مذہبی شخصیات اور لاکھوں زائرین کی شرکت متوقع ہے۔
‎ایرانی حکام کے مطابق بین الاقوامی مہمانوں کی آمد جمعہ سے شروع ہوگی، جبکہ 4 اور 5 جولائی کو تہران کے مصلیٰ امام خمینی کمپلیکس میں مرکزی سوگ تقریبات منعقد کی جائیں گی۔ اس کے بعد 6 جولائی کو انقلاب روڈ، لشکری روڈ اور آزادی روڈ پر نمازِ جنازہ کا بڑا اجتماع متوقع ہے، جس میں ایرانی حکام کے مطابق بڑی تعداد میں افراد شریک ہوں گے۔
‎زائرین کی سہولت کے لیے تہران اور گرد و نواح میں ہنگامی انتظامات کیے گئے ہیں۔ رہائش کے لیے 1,500 اسکولوں، کالجوں اور یونیورسٹی ہاسٹلز کو مختص کیا گیا ہے، جبکہ مضافاتی علاقوں میں مزید 800 سے زائد تعلیمی اداروں کو عارضی رہائش گاہوں میں تبدیل کیا گیا ہے۔ ٹریفک کی روانی برقرار رکھنے کے لیے متبادل راستوں کا بھی اعلان کیا گیا ہے۔
‎تہران کے بعد سوگ کی تقریبات قم میں منعقد ہوں گی، جہاں زائرین کی رہائش کے لیے سیکڑوں تعلیمی اداروں کے ہاسٹلز مختص کیے گئے ہیں۔ اس کے بعد جسدِ خاکی کو عراق کے مقدس شہروں نجف، کربلا، کاظمین اور بغداد لے جانے کا پروگرام بھی جاری کیا گیا ہے، جہاں تعزیتی اجتماعات منعقد کیے جائیں گے۔
‎رپورٹس کے مطابق عراق سے واپسی پر 9 جولائی کو مشہد میں الوداعی تقریب منعقد ہوگی، جس کے بعد آیت اللہ علی خامنہ ای کو حضرت امام رضاؑ کے روضہ مبارک کے احاطے میں سپردِ خاک کیا جائے گا۔

‎دوحا: ایران اور امریکا کے درمیان مجوزہ تکنیکی مذاکرات ایک بار پھر غیر یقینی صورتحال کا شکار ہو گئے ہیں۔ اگرچہ دونوں ممالک کے وفود اس ہفتے قطر پہنچنے والے ہیں، تاہم ایران نے واضح کیا ہے کہ آئندہ چند روز میں امریکی حکام کے ساتھ کسی بھی سطح پر مذاکرات طے نہیں ہیں۔
‎ایرانی وزارت خارجہ کے ترجمان اسماعیل بقائی نے کہا کہ ایرانی تکنیکی وفد کا قطر کا دورہ معمول کی سفارتی سرگرمیوں کا حصہ ہے اور اس کا امریکی وفد کی آمد سے کوئی تعلق نہیں۔ انہوں نے دوٹوک انداز میں کہا کہ آنے والے دنوں میں امریکا کے ساتھ کسی بھی سطح پر مذاکرات نہیں ہوں گے۔
‎دوسری جانب امریکی صدر ڈونلڈ ٹرمپ کی ترجمان کیرولین لیویٹ کے مطابق صدر ٹرمپ نے اپنے داماد جیرڈ کشنر اور خصوصی ایلچی اسٹیو وٹکوف کو امریکی مذاکراتی ٹیم کی قیادت سونپی ہے۔ تاہم خود صدر ٹرمپ نے صحافیوں سے گفتگو میں کہا کہ دوحا میں ممکنہ ملاقات اہم بھی ہو سکتی ہے اور نہیں بھی، اس بارے میں جلد صورتحال واضح ہو جائے گی۔
‎رپورٹس کے مطابق جون میں طے پانے والی 14 نکاتی مفاہمتی یادداشت کے تحت دونوں ممالک نے جنگ بندی کو آگے بڑھانے، ایران کے جوہری پروگرام پر بات چیت اور مستقل امن معاہدے کی کوششوں پر اتفاق کیا تھا، لیکن حالیہ دنوں میں دونوں جانب سے جنگ بندی کی خلاف ورزیوں کے الزامات کے بعد پیش رفت سست روی کا شکار ہو گئی ہے۔
‎ذرائع کے مطابق ایک ایرانی عہدیدار نے دعویٰ کیا ہے کہ منگل کو دوحا میں ایک اہم ملاقات متوقع ہے، تاہم اس کا مرکز جوہری مذاکرات کے بجائے آبنائے ہرمز میں کشیدگی کم کرنا اور بحری سلامتی کے معاملات ہوں گے۔ ایک اور ذریعے کے مطابق امریکی اور ایرانی تکنیکی ٹیمیں بدھ کے روز قطری اور پاکستانی ثالثوں سے الگ الگ ملاقاتیں کر سکتی ہیں۔
‎اس دوران امریکا اور ایران کے درمیان حالیہ فوجی کارروائیوں نے خطے میں کشیدگی مزید بڑھا دی ہے۔ امریکا نے ایران پر تجارتی جہازوں کو نشانہ بنانے کا الزام عائد کرتے ہوئے ایرانی فوجی تنصیبات پر حملے کیے، جبکہ ایران نے جواباً بحرین اور کویت میں امریکی فوجی اڈوں کو میزائل اور ڈرون حملوں کا نشانہ بنانے کا دعویٰ کیا۔
‎ادھر ایرانی صدر مسعود پزشکیان نے اعلان کیا ہے کہ قطر میں منجمد ایرانی اثاثوں میں سے 6 ارب ڈالر ایران کو جاری کیے جائیں گے۔ انہوں نے اس پیش رفت کو ایرانی عوام کی بڑی کامیابی قرار دیا۔
‎تجزیہ کاروں کا کہنا ہے کہ دوحا میں مذاکرات سے متعلق غیر یقینی صورتحال اور خطے میں جاری کشیدگی کے باعث عالمی منڈی میں خام تیل کی قیمتوں میں بھی اضافہ دیکھا گیا ہے، جبکہ آبنائے ہرمز کی صورتحال پر عالمی برادری کی نظریں مرکوز ہیں۔