لاہور: سیشن کورٹ لاہور نے آن لائن جوا ایپ کی مبینہ تشہیر اور اس کی ترغیب دینے کے مقدمے میں معروف ٹک ٹاکرز اقراء کنول اور اریب کی عبوری ضمانت میں 7 جولائی تک توسیع کر دی ہے۔
ایڈیشنل سیشن جج نے دونوں ملزمان کی ضمانت کی درخواستوں پر سماعت کی۔ عبوری ضمانت کی مدت ختم ہونے پر اقراء کنول اور اریب عدالت میں پیش ہوئے، جہاں ان کے وکلا نے مؤقف اختیار کیا کہ مقدمے میں قانونی تقاضوں کو مدنظر رکھتے ہوئے انہیں ریلیف دیا جائے۔
سماعت کے دوران عدالت نے نیشنل سائبر کرائم انویسٹی گیشن ایجنسی (NCCIA) سے مقدمے کا مکمل ریکارڈ طلب کرتے ہوئے کیس کی مزید سماعت 7 جولائی تک ملتوی کر دی۔
یاد رہے کہ این سی سی آئی اے نے دونوں ٹک ٹاکرز کے خلاف مبینہ طور پر ایک آن لائن جوا ایپ کی تشہیر کرنے اور عوام کو اس کے استعمال کی ترغیب دینے کے الزام میں مقدمہ درج کر رکھا ہے۔
ممکنہ گرفتاری سے بچنے کے لیے اقراء کنول اور اریب نے عدالت سے رجوع کرتے ہوئے الگ الگ عبوری ضمانت کی درخواستیں دائر کی تھیں۔ عدالت نے ابتدائی سماعت کے بعد انہیں عارضی ریلیف دیتے ہوئے عبوری ضمانت میں توسیع کر دی ہے۔
اب کیس کی آئندہ سماعت 7 جولائی کو ہوگی، جہاں عدالت مقدمے کے ریکارڈ اور فریقین کے دلائل کی روشنی میں مزید کارروائی کرے گی۔
اقراء کنول اور اریب کی عبوری ضمانت میں 7 جولائی تک توسیع
