اسلام آباد: اسلام آباد ہائی کورٹ نے پاکستان تحریک انصاف (پی ٹی آئی) کے بانی عمران خان اور بشریٰ بی بی کی مبینہ تنہائی کی قید کے خلاف دائر درخواستوں کے قابلِ سماعت ہونے سے متعلق فیصلہ محفوظ کر لیا ہے۔
جسٹس خادم حسین سومرو نے درخواستوں پر فریقین کے تفصیلی دلائل سننے کے بعد ریمارکس دیے کہ عدالت سب سے پہلے یہ طے کرے گی کہ آیا یہ درخواستیں قابلِ سماعت ہیں یا نہیں، اس کے بعد ہی کیس کی مزید کارروائی آگے بڑھے گی۔
سماعت کے دوران وفاقی حکومت اور قومی احتساب بیورو (نیب) نے عدالت سے مؤقف اختیار کیا کہ درخواستیں قانون کے مطابق قابلِ سماعت نہیں، لہٰذا انہیں مسترد کیا جائے۔
دوسری جانب درخواست گزاروں نے مؤقف اختیار کیا کہ عمران خان اور بشریٰ بی بی کو مبینہ طور پر تنہائی میں رکھا جا رہا ہے، اس لیے عدالت اس معاملے کا جائزہ لے اور متعلقہ حکام کو قانون کے مطابق کارروائی کا پابند بنائے۔
تمام فریقین کے دلائل مکمل ہونے کے بعد اسلام آباد ہائی کورٹ نے درخواستوں کے قابلِ سماعت ہونے سے متعلق فیصلہ محفوظ کر لیا، جو بعد میں سنایا جائے گا۔
عمران خان اور بشریٰ بی بی کی تنہائی کی قید سے متعلق درخواستوں پر فیصلہ محفوظ
