Category: لاہور

پاکستان اسپیس اینڈ اپر ایٹموسفیئر ریسرچ کمیشن (اسپارکو) اور محکمہ موسمیات نے محرم الحرام 1448 ہجری کے چاند کی رویت کے حوالے سے اہم پیش گوئیاں جاری کر دی ہیں۔ دونوں اداروں کے مطابق 15 جون کو محرم الحرام کا چاند نظر آنے کے امکانات انتہائی کم ہیں، جس کے باعث یکم محرم الحرام 1448 ہجری بدھ 17 جون کو ہونے کی توقع ہے۔
‎اسپارکو کی جانب سے جاری اعلامیے میں بتایا گیا ہے کہ نئے چاند کی پیدائش 15 جون کو صبح 7 بج کر 54 منٹ پر متوقع ہے۔ ماہرین کے مطابق اسی روز غروب آفتاب کے وقت چاند کی عمر تقریباً 11 گھنٹے 50 منٹ ہوگی، جو رویت کے لیے مطلوبہ معیار سے کم سمجھی جا رہی ہے۔
‎اعلامیے کے مطابق ساحلی علاقوں میں غروب آفتاب اور غروبِ قمر کے درمیان تقریباً 40 منٹ کا وقفہ متوقع ہے، تاہم چاند کی کم عمر اور دیگر فلکیاتی عوامل کے باعث اس کی رویت کے امکانات بہت محدود ہیں۔
‎دوسری جانب محکمہ موسمیات نے بھی اسی مؤقف کی تائید کرتے ہوئے کہا ہے کہ 15 جون، جو 29 ذوالحج کے مساوی ہوگی، ملک بھر میں چاند نظر آنے کے امکانات نہ ہونے کے برابر ہیں۔ محکمہ موسمیات کے مطابق اس روز پاکستان کے بیشتر علاقوں میں موسم صاف یا جزوی طور پر ابر آلود رہنے کی توقع ہے، تاہم فلکیاتی صورتحال چاند کی رویت کے حق میں نہیں ہے۔
‎اعداد و شمار کے مطابق پنجاب میں چاند رات 7 بج کر 59 منٹ پر غروب ہوگا، سندھ میں رات 8 بج کر 5 منٹ، آزاد کشمیر میں رات 8 بج کر 7 منٹ، گلگت بلتستان میں رات 8 بج کر 12 منٹ، خیبر پختونخوا میں رات 8 بج کر 23 منٹ جبکہ بلوچستان میں رات 8 بج کر 34 منٹ پر غروب ہونے کی توقع ہے۔
‎رؤیت ہلال ریسرچ کونسل نے بھی اپنی پیش گوئی میں کہا ہے کہ 15 جون کو چاند نظر آنے کے امکانات انتہائی کم ہیں، جس کے باعث نئے اسلامی سال کا آغاز 17 جون سے ہونے کا امکان زیادہ ہے۔
‎یاد رہے کہ محرم الحرام 1448 ہجری کے چاند کی رویت کے لیے مرکزی رویت ہلال کمیٹی کا اجلاس 15 جون کی شام لاہور کی تاریخی بادشاہی مسجد میں منعقد ہوگا۔ چاند کی رویت کے بارے میں حتمی اعلان مرکزی رویت ہلال کمیٹی ہی کرے گی، جس کے بعد نئے اسلامی سال اور یوم عاشور کی تاریخوں کا باضابطہ تعین کیا جائے گا۔

لاہور: چیئرمین پاکستان علماء کونسل حافظ طاہر محمود اشرفی نے کہا ہے کہ بھارت کے پاس پاکستان میں بے امنی پھیلانے کے علاوہ اب کچھ نہیں بچا، تاہم دشمن کی تمام سازشیں ناکامی سے دوچار ہو رہی ہیں۔

لاہور چیمبر میں خطاب کرتے ہوئے حافظ طاہر محمود اشرفی نے کہا کہ محرم الحرام کو پرامن انداز میں منانا ہم سب کی مشترکہ ذمہ داری ہے۔ انہوں نے کہا کہ محرم کا مقدس مہینہ امت مسلمہ کو اتحاد، اتفاق اور باہمی ہم آہنگی کا درس دیتا ہے اور موجودہ حالات میں قومی وحدت کی پہلے سے کہیں زیادہ ضرورت ہے۔انہوں نے کہا کہ جو عناصر ملک میں انتشار، فساد اور انارکی پھیلانے کی کوشش کرتے ہیں وہ درحقیقت ملک دشمن ہیں اور ان کے عزائم کو ناکام بنانا پوری قوم کی ذمہ داری ہے۔چیئرمین پاکستان علماء کونسل کا کہنا تھا کہ ’’معرکۂ حق‘‘ کے بعد اللہ تعالیٰ نے پاکستان کو عزت اور وقار سے نوازا ہے۔ انہوں نے دعویٰ کیا کہ پاکستان نے عالمی سطح پر اہم کردار ادا کرتے ہوئے تیسری عالمی جنگ کے خدشات کو کم کرنے میں اپنا حصہ ڈالا، جبکہ امریکی صدر کی جانب سے مسئلہ کشمیر کا متعدد بار ذکر بھی پاکستان کے مؤقف کی اہمیت کو ظاہر کرتا ہے۔

حافظ طاہر محمود اشرفی نے مزید کہا کہ بھارت اور اسرائیل پاکستان میں بدامنی اور عدم استحکام پیدا کرنے کے لیے بھاری وسائل خرچ کر رہے ہیں، تاہم پاکستانی قوم، سیکیورٹی اداروں اور ریاستی قوتوں کے اتحاد کے باعث دشمن کے تمام منصوبے ناکام ہو رہے ہیں۔انہوں نے خوارج کے حملوں کا ذکر کرتے ہوئے کہا کہ دہشت گرد عناصر ڈرون حملوں اور دیگر کارروائیوں کے ذریعے معصوم شہریوں اور بچوں کو نشانہ بنا رہے ہیں، لیکن دشمن جتنی بھی کوشش کر لے، اسے ناکامی کا سامنا کرنا پڑ رہا ہے۔ انہوں نے اس عزم کا اظہار کیا کہ قوم اتحاد و یکجہتی کے ذریعے ملک دشمن عناصر کے ناپاک عزائم کو ہر صورت ناکام بنائے گی۔

لاہور ہائی کورٹ نے پٹرولیم ڈیولپمنٹ لیوی (PDL) کے خلاف آئینی درخواست پر وفاقی حکومت کو نوٹس جاری کر دیے

لاہور ہائی کورٹ نے پٹرولیم لیوی کی آئینی حیثیت اور قانونی جواز پر وفاق سے جواب طلب کر لیا،جوڈیشل ایکٹوازم پینل اور وحید شہزاد بٹ کی درخواست پر لاہور ہائی کورٹ کی اہم کارروائی،محمد اظہر صدیق ایڈووکیٹ سپریم کورٹ کی وساطت سے دائر درخواست پر وفاقی حکومت کو نوٹس جاری کر دیئے گئے،پٹرولیم ڈیولپمنٹ لیوی کو پارلیمانی منظوری کے بغیر عائد اور بڑھانے کا اقدام چیلنج کیا گیا ہے،لاہور ہائیکورٹ میں دائر درخواست میں مؤقف اختیار کیا گیا کہ پٹرولیم لیوی درحقیقت ایک ٹیکس ہے جسے صرف پارلیمنٹ ہی منظور کر سکتی ہے،لاہور ہائی کورٹ نے پٹرولیم لیوی سے متعلق رپورٹ اور پیراوائز کمنٹس طلب کر لیے

درخواست میں پٹرولیم لیوی کے مسلسل اضافے کو آئین کے منافی قرار دیا گیا،پٹرولیم لیوی کے تعین اور اضافے کے لیے ایگزیکٹو کو دیے گئے لامحدود اختیارات چیلنج کئے گئے،درخواست میں مؤقف کہ قانونی حدود اور رہنما اصولوں کے بغیر لیوی بڑھانے کا اختیار غیر آئینی ہے،پٹرولیم لیوی کو این ایف سی ایوارڈ کے قابل تقسیم محاصل سے باہر رکھنے کا اقدام بھی چیلنج کیا گیا،درخواست گزاروں کا مؤقف کہ پٹرولیم لیوی کی رقم صوبوں کے مالی حقوق کو متاثر کر رہی ہے،لاہور ہائی کورٹ کے ڈویژن بینچ نے فریقین کو نوٹس جاری کرتے ہوئے جواب طلب کر لیا،جسٹس حسن نواز مخدوم اور جسٹس خالد اسحاق پر مشتمل بینچ نے سماعت کے بعد حکم جاری کیا،عدالت نے کیس گرمیوں کی تعطیلات کے بعد سماعت کے لیے مقرر کرنے کا حکم دے دیا

لاہور ہائی کورٹ میں پٹرولیم لیوی کی قانونی حیثیت، پارلیمانی بالادستی اور صوبائی حقوق کا معاملہ زیر سماعت آ گیا،درخواست میں مؤقف کہ ٹیکس کا نفاذ، اضافہ یا وصولی صرف آئین اور قانون کے مطابق ہی ہو سکتی ہے،پٹرولیم لیوی کیس کا فیصلہ وفاقی ٹیکس پالیسی اور صوبائی مالی حقوق پر دور رس اثرات مرتب کر سکتا ہے

خیبر پختونخوا اور پنجاب کے مختلف اضلاع میں آندھی اور تیز بارش نے تباہی مچا دی،5 افراد جاں بحق جبکہ متعدد زخمی ہوگئے۔

ڈیرہ اسماعیل خان میں تیز بارش سے ندی نالوں میں طغیانی آگئی۔ لاہور، فیصل آباد،جھنگ، چنیوٹ، سیالکوٹ، سمیت دیگر علاقوں میں بارش سےکئی علاقوں میں بجی کی فراہمی معطل ہوگئی،تیز ہواؤں سے کئی مقامات پر درخت اور سولر پینل اکھڑ گئے،پی ڈی ایم اے کے مطابق بنوں میں آندھی اور موسلادھاربارش سے 4 افرادجاں بحق جبکہ 16 زخمی ہوئے

فیصل آباد اور جھنگ میں بارش اور آندھی کے باعث درجنوں افراد مختلف حادثات میں زخمی ہوگئے،ترجمان ریسکیو کے مطابق فیصل آباد میں تیز آندھی اور بارش کے دوران 7 مقامات پر حادثات پیش آئے جہاں 6 واقعات میں عمارتوں کی دیواریں گرنے سے 15 افراد زخمی ہوئے جب کہ غازی آباد کے علاقے میں مکان کی چھت گرنے سے ایک خاتون جاں بحق ہو گئیں، ریسکیو اہلکاروں نے تمام واقعات میں زخمیوں کو ملبے سے نکال کر علاج کیلئے قریبی اسپتالوں میں منتقل کردیا۔

دوسری جانب جھنگ شہر اور گرد و نواح میں طوفانی آندھی اور بارش کے باعث 5 خواتین سمیت 9 افراد زخمی ہوئے،ریسکیو ذرائع کے مطابق شہر کے مختلف علاقوں میں آندھی اور بارش کے باعث سائن بورڈز ، دیواروں ، چھتوں اور سولر پینلز کے اسٹینڈز گرنے کے واقعات میں 2 خواتین سمیت 5 افراد زخمی ہوئے،نواحی علاقے منڈی شاہ جیونا میں آندھی کے باعث ایک مکان کی چھت گر گئی جس کے نتیجے میں 3خواتین سمیت 4افراد زخمی ہوئے۔

پی ڈی ایم اے کا کہنا ہے کہ آندھی اور بارش سے مختلف علاقوں میں دیواریں، مکانات گر گئے، متاثرہ علاقوں میں امدادی کارروائیاں جاری ہیں،پی ڈی ایم اے نے ہدایات جاری کی ہیں کہ عوام خراب موسم میں خستہ حال عمارتوں سے دور رہیں، ایمرجنسی آپریشن سینٹر مکمل فعال ہے۔

فیڈریشن چیمبر ریجنل آفس لاہور میں بجٹ تقریر سننے کے بعد سابق نگراں وفاقی وزیر اور کاروباری شخصیت ایس ایم تنویر نے دیگر صنعتکاروں اور کاروباری رہنماؤں کے ہمراہ پریس کانفرنس کرتے ہوئے وفاقی بجٹ 2026-27 کو مجموعی طور پر ترقی، سرمایہ کاری اور کاروباری سرگرمیوں کے فروغ کا بجٹ قرار دیا۔
‎ایس ایم تنویر نے کہا کہ حکومت نے ایف بی آر کے محصولات کے ہدف کو برقرار رکھتے ہوئے معیشت میں استحکام لانے کی کوشش کی ہے۔ تاہم انہوں نے اس خدشے کا اظہار بھی کیا کہ نان ٹیکس ریونیو کو 4845 ارب روپے تک بڑھانے کے بعض اثرات مہنگائی کی صورت میں سامنے آ سکتے ہیں۔
‎انہوں نے کہا کہ وفاقی ترقیاتی بجٹ میں 150 ارب روپے کی کمی کی گئی ہے، لیکن اس کے باوجود حکومت نے ترقیاتی منصوبوں کو جاری رکھنے کا عزم ظاہر کیا ہے۔ ان کے مطابق موجودہ معاشی حالات میں وسائل کے مؤثر استعمال کی ضرورت ہے۔
‎ایس ایم تنویر نے وزیراعظم شہباز شریف اور فیلڈ مارشل عاصم منیر کی کوششوں کو سراہتے ہوئے کہا کہ ملکی استحکام اور معاشی بحالی کے لیے سیاسی اور عسکری قیادت کا کردار قابل تعریف ہے۔
‎انہوں نے دفاعی بجٹ کو 3 ہزار ارب روپے تک بڑھانے کے فیصلے کی حمایت کرتے ہوئے کہا کہ موجودہ علاقائی اور عالمی حالات میں دفاعی صلاحیتوں کو مضبوط بنانا وقت کی اہم ضرورت ہے۔
‎پراپرٹی سیکٹر کے حوالے سے انہوں نے کہا کہ جائیداد کی خرید و فروخت پر ٹیکسوں میں کمی ایک مثبت قدم ہے جس سے رئیل اسٹیٹ اور تعمیراتی شعبے کو فروغ ملے گا۔ ان کے مطابق لیٹ فائلر کی کیٹیگری ختم کرنا بھی ٹیکس نظام کو بہتر بنانے کی جانب ایک اہم اقدام ہے۔
‎انہوں نے کہا کہ کنسٹرکشن اور ہاؤسنگ سیکٹر کے لیے بجٹ میں دی گئی سہولیات سرمایہ کاری اور روزگار کے مواقع بڑھانے میں مددگار ثابت ہوں گی۔ اسی طرح تنخواہ دار طبقے کے لیے انکم ٹیکس میں دیے گئے ریلیف کو بھی خوش آئند قرار دیا، اگرچہ ان کے بقول ملازمت پیشہ افراد کو مزید سہولت ملنی چاہیے تھی۔
‎ایس ایم تنویر نے زرعی شعبے کی اہمیت پر زور دیتے ہوئے کہا کہ پائیدار معاشی ترقی کے لیے زراعت کو مزید فروغ دینا ناگزیر ہے۔ انہوں نے برآمد کنندگان کے لیے سپر ٹیکس کے خاتمے کو بھی مثبت قرار دیا اور کہا کہ 50 کروڑ روپے تک آمدن پر سپر ٹیکس کا خاتمہ اور اس سے زائد آمدن پر شرح میں دو فیصد کمی کاروباری برادری کے اعتماد میں اضافے کا باعث بنے گی۔
‎انہوں نے اپنی گفتگو کے اختتام پر کہا کہ مجموعی طور پر یہ بجٹ سرمایہ کاری، کاروبار اور معاشی ترقی کے فروغ کی سمت میں ایک مثبت کوشش ہے، جس کے نتائج آنے والے مہینوں میں سامنے آئیں گے۔

پنجاب میں ماس ٹرانزٹ سسٹم کے تحت چلنے والی تمام پبلک ٹرانسپورٹ پر مفت سفر کی سہولت ختم کر دی گئی ہے، جس کے بعد مسافروں کو دوبارہ کرایہ ادا کرنا ہوگا۔

انچارج ماس ٹرانزٹ اتھارٹی عزیر شاہ کے مطابق اورنج لائن میٹرو ٹرین، میٹرو بس اور اسپیڈو بس سروس پر مفت سفر کی سہولت کا خاتمہ کر دیا گیا ہے۔ ان کا کہنا ہے کہ کرایوں کا دوبارہ اطلاق لاہور، راولپنڈی اور ملتان میں چلنے والی تمام ماس ٹرانزٹ سروسز پر ہوگا،عزیر شاہ نے بتایا کہ شہریوں کو ریلیف فراہم کرنے کے لیے ماس ٹرانزٹ اتھارٹی کی ٹرانسپورٹ سروسز کو عارضی طور پر مفت کیا گیا تھا، تاہم اب یہ سہولت واپس لے لی گئی ہے اور مسافروں سے معمول کے مطابق کرایہ وصول کیا جائے گا۔

واضح رہے کہ اپریل میں پیٹرولیم مصنوعات کی قیمتوں میں اضافے کے بعد پنجاب اور وفاقی دارالحکومت اسلام آباد میں عوام کو سفری سہولت فراہم کرنے کے لیے پبلک ٹرانسپورٹ کو مفت کر دیا گیا تھا۔ اب حکومت کی جانب سے اس پالیسی کو ختم کرتے ہوئے دوبارہ کرایہ نظام بحال کر دیا گیا ہے۔