Category: لاہور

وزیراعلیٰ پنجاب مریم نواز شریف نے “معرکہ حق” کا ایک سال مکمل ہونے پر پاکستانی عوام، حکومت اور افواجِ پاکستان کو خراجِ تحسین پیش کرتے ہوئے اظہارِ تشکر کیا ہے۔

اپنے خصوصی پیغام میں وزیراعلیٰ پنجاب نے معرکہ حق کے ہیروز کو سلام عقیدت پیش کیا اور کہا کہ یہ تاریخی کامیابی قوم کے اتحاد، بہادری اور بے مثال قربانیوں کی روشن مثال ہے۔وزیراعلیٰ مریم نواز شریف نے وزیراعظم محمد شہباز شریف، فیلڈ مارشل عاصم منیر،ائیر چیف مارشل ظہیر احمد بابر سدھو اور ایڈمرل نوید اشرف کو بھی خراجِ تحسین پیش کرتے ہوئے کہا کہ بے باک اور مدبر قیادت نے معرکہ حق میں تاریخی فتح کی بنیاد رکھی، “آٹھ صفر” کا معرکہ حق دشمن کبھی فراموش نہیں کر پائے گا جبکہ پاکستان کی فتح اور بھارت کی شکست کی گواہی دنیا نے دی اور دیتی رہے گی، معرکہ حق نے دشمن پر پاکستان کی ہیبت کا ایسا نشان ثبت کیا جو تاریخ میں ہمیشہ یاد رکھا جائے گا،معرکہ حق نے ثابت کردیا کہ پاکستانی قوم امن پسند ہے، لیکن جب وقت آتا ہے تو پوری قوم بنیان مرصوص بن کر دشمن کے سامنے ڈٹ جاتی ہے۔، دنیا نے معرکہ حق میں دیکھا کہ پوری قوم متحد اور یکسو ہو کر افواجِ پاکستان کے شانہ بشانہ کھڑی رہی۔

جمعیت علمائے اسلام (جے یو آئی) کے ترجمان اسلم غوری نے حکومت پر شدید تنقید کرتے ہوئے کہا ہے کہ موجودہ حکمران عالمی مالیاتی ادارے آئی ایم ایف کے “ریکوری ایجنٹ” کا کردار ادا کر رہے ہیں اور عوام کو مہنگائی کے طوفان میں دھکیل دیا گیا ہے۔

ترجمان جے یو آئی اسلم غوری نے اپنے بیان میں کہا کہ “جعلی حکمرانوں” نے مہنگائی کا 78 سالہ ریکارڈ توڑ دیا ہے اور عوام کی زندگی اجیرن بنا دی گئی ہے۔ آئی ایم ایف سے لیے گئے قرضے حکمرانوں کی “عیاشیوں” اور عوام کے لیے ایک بوجھ بن چکے ہیں،ملک میں جاری معاشی بحران اور مہنگائی میں اضافہ کسی بیرونی دباؤ سے زیادہ حکومتی پالیسیوں کا نتیجہ ہے۔ ان کا کہنا تھا کہ امریکہ ایران کشیدگی کی آڑ میں بھی عوام پر مزید مالی دباؤ ڈالا جا رہا ہے۔ حکمران “سودا گر” بن چکے ہیں جو عوام کے خون پسینے کی کمائی کو قرضوں کی شکل میں استعمال کر رہے ہیں۔

ترجمان جے یو آئی نے پٹرول اور ڈیزل کی قیمتوں میں اضافے کو سختی سے مسترد کرتے ہوئے کہا کہ جے یو آئی عوام کے ساتھ کھڑی ہے اور مہنگائی کے خلاف ہر سطح پر آواز بلند کرے گی۔اگر عوام کو ریلیف نہ دیا گیا تو ملک میں عوامی ردعمل سامنے آ سکتا ہے، اور قوم کو اپنے حقوق کے لیے سڑکوں پر آنا پڑے گا کیونکہ حکمران اپنی “خرمستیوں” میں مصروف ہیں۔

وفاقی وزیر برائے منصوبہ بندی احسن قبال نے کہا ہےکہ امریکا ایران جنگ میں کردار ادا کرنےکی بڑی وجہ بھی معرکہ حق میں کامیابی تھی،پاکستان ہر محاذ پر کامیابیوں کے جھنڈے گاڑھ رہا ہے ۔بھارت کا آپریشن سندور بری طرح ناکامی سے دوچار ہوا ۔معرکہ حق میں فوج ،حکومت اور عوام متحد ہو کر کامیابی سے ہمکنار ہو ئے ۔

لاہور چیمبر میں تقریب سےخطاب میں احسن اقبال نے زور دیتے ہوئے کہا کہ اب معرکہ ترقی نہ جیتا گیا تو معرکہ حق کا دفاع بھی زیادہ دیرتک نہیں کرسکیں گے،ہمیں عوامی مسائل حل کرنےکے لیےانتہائی سنجیدگی سےکام کرناہوگا اور ملکی استحکام کے لیے مضبوط معیشت کی ضرورت ہے،وطن پر قربان ہونے کے جذبے نے معرکہ حق جتوایا، پاکستان نے ایک قوم بن کر دشمن کا مقابلہ کیا، وطن کی ترقی وخوشحالی کے جذبے سے ہی معاشی معرکہ سرکیا جاسکتا ہے۔

احسن اقبال نے مزید کہا کہ ایک کیپٹن یا میجر کو جب کہا جاتا ہے کہ پوسٹنگ وزیرستان ہو گئی، تو وہ اگلے ہی دن وہاں جا کر ڈیوٹی شروع کرتا ہے، سول آدمی کا دوسرے شہر ٹرانسفر ہو تو وہ گھر سے 5 کلومیٹر دور بھی نہیں جانا چاہتا، مسلح افواج نے کئی گنا بڑےدشمن پرکاری ضرب لگائی، بھارت کے خلاف جیت نے پاکستان کو دنیا میں ایک نئی پہچان دی جب کہ امریکا ایران جنگ میں کرداراداکرنےکی بڑی وجہ بھی معرکہ حق میں کامیابی تھی۔

سابق امیر جماعت اسلامی سراج الحق نے حکومت کی جانب سے پٹرولیم مصنوعات کی قیمتوں میں اضافے کو عوام دشمن اقدام قرار دیتے ہوئے کہا ہے کہ حکومت نے ایک بار پھر مہنگائی کے ستائے عوام پر “پٹرول بم” گرا دیا ہے۔

اپنے بیان میں سراج الحق کا کہنا تھا کہ ملک میں پہلے ہی مہنگائی، بے روزگاری اور معاشی بدحالی نے عوام کی زندگی اجیرن بنا رکھی ہے، ایسے میں پٹرول کی قیمتوں میں اضافہ عوام پر مزید ظلم کے مترادف ہے۔ انہوں نے کہا کہ غریب اور متوسط طبقہ پہلے ہی شدید مالی مشکلات کا شکار ہے اور اب وہ مزید بوجھ اٹھانے کے قابل نہیں رہا۔سراج الحق نے حکومت کو تنقید کا نشانہ بناتے ہوئے کہا کہ اگر حکومت عوام کے مسائل حل نہیں کر سکتی تو کم از کم ان کے مسائل میں اضافہ تو نہ کرے۔ ان کا کہنا تھا کہ پٹرولیم مصنوعات کی قیمتوں میں حالیہ اضافہ ہر چیز کی قیمت بڑھانے کا سبب بنے گا، جس کے اثرات براہِ راست عام آدمی تک پہنچیں گے۔

انہوں نے مطالبہ کیا کہ حکومت فوری طور پر پٹرولیم مصنوعات کی قیمتوں میں اضافہ واپس لے اور عوام کو حقیقی ریلیف فراہم کرنے کے لیے عملی اقدامات کرے۔

پیٹرولیم مصنوعات کی قیمتوں میں اضافے کے بعد پبلک ٹرانسپورٹرز نے کرایوں میں ازخود 5 فیصد اضافہ کردیا جبکہ گڈز ٹرانسپورٹ کے کرایوں میں 10 فیصد تک اضافہ کردیا گیا۔

حکومت کی جانب سے پیٹرولیم مصنوعات کی قیمتوں میں 15 روپے فی لیٹر تک اضافہ کردیا گیا، جس کے بعد پبلک اور گڈز ٹرانسپورٹرز نے کرایوں میں اضافہ کردیا۔پبلک ٹرانسپورٹرز نے کرایوں میں ازخود 5 فیصد اضافہ کردیا جبکہ گڈز ٹرانسپورٹ کے کرائے بھی 10 فیصد تک بڑھادیئے گئے، ٹرانسپورٹ کرایوں میں اضافے کا اطلاق آج سے کردیا گیا ہے۔

واضح رہے کہ محکمہ ٹرانسپورٹ پنجاب اور ریجنل ٹرانسپورٹ اتھارٹی نے تاحال کرایوں میں اضافے کا کوئی اعلان نہیں کیا ہے۔سیکریٹری آر ٹی اے لاہور رانا محسن کا کہنا ہے کہ کرایوں میں اضافے کیلئے ٹرانسپورٹرز کے ساتھ مشاورتی اجلاس طلب کرلیا، مشاورتی اجلاس میں سرکاری سطح پر فیصلہ ہوگا کہ کرائے کتنے فیصد بڑھیں گے۔

جوڈیشل ایکٹوازم پینل کی جانب سے پٹرول قیمتوں میں اضافے کے خلاف لاہور ہائیکورٹ میں نئی درخواست دائرکر دی گئی

محمد اظہر صدیق ایڈووکیٹ سپریم کورٹ کی طرف سے پٹرولیم قیمتوں میں حالیہ اضافے کو چیلنج کر دیا،9 مئی 2026 سے پٹرول 414 روپے 78 پیسے اور ڈیزل 414 روپے 58 پیسے مقرر کیے جانے کے خلاف درخواست میں مؤقف اختیار کیا گیا کہ حکومت پٹرول قیمتیں شفاف فارمولا اور آئینی جواز کے بغیر بڑھا رہی ہے،موجودہ حکومت میں پٹرول قیمتوں میں تقریباً 186 فیصد اضافہ ہو چکا ہے،پٹرول مہنگائی نے ٹرانسپورٹ، خوراک، زراعت اور بجلی کے بحران میں اضافہ کر دیا، پاکستان میں پٹرول خطے کے کئی ممالک سے زیادہ مہنگا، عدالت میں تقابلی اعدادوشمار پیش کئے گئے،بھارت، بنگلہ دیش، افغانستان، سعودی عرب اور یو اے ای کے مقابلے میں پاکستان میں پٹرول مہنگا ہے، پٹرولیم ڈویلپمنٹ لیوی میں مسلسل اضافہ غیر آئینی قرار دیاجائے،پٹرولیم لیوی بڑھانے کا اختیار صرف پارلیمان کے پاس ہے، وزیراعظم یا وفاقی حکومت کے پاس نہیں، پٹرولیم ڈویلپمنٹ لیوی کے ذریعے اضافی ٹیکس وصولی کو عدالت میں پہلے ہی چیلنج کیا جا چکا ہے،پٹرول قیمتوں میں اضافہ آئین کے آرٹیکل 3، 4، 9، 37 اور 38 کی خلاف ورزی قرار ہے،پٹرولیم لیوی کی قانونی حیثیت پہلے ہی لاہور ہائیکورٹ میں چیلنج اور زیر سماعت ہے،حکومت عوام پر معاشی بوجھ منتقل کر کے معاشی استحصال کر رہی ہے،

جماعت اسلامی کے امیر حافظ نعیم الرحمان نے کہا ہے کہ حکومت مسلسل پٹرول اور ڈیزل کی قیمت میں اضافہ کررہی ہے۔ آج پھر 15 ، 15 روپے فی لیٹر بڑھادیے۔ حکومت نے پٹرول کو کمائی کا ذریعہ بنایا ہوا ہے۔

ایکس پر ایک پوسٹ میں حافظ نعیم الرحمان کا کہنا تھا کہ عالمی مارکیٹ کا نام لیتے ہیں اور بھاری لیوی وصول کررہے ہیں جس کا پٹرولیم کی قیمت سے کوئی تعلق نہیں۔اہم بات یہ ہے عالمی مارکیٹ میں چند دنوں میں تقریباً 8 ڈالر قیمت کم ہوئی ہے۔ اس وقت بھی فی لیٹر 150 روپے سے زائد ٹیکسز و لیوی وصول کی جارہی ہے۔ طالب علم، بائیکیا اور اِن ڈرائیو چلانے والے، مزدور، عام غریب اور مڈل کلاس شہری یہ لیوی ادا کررہے ہیں جو بہت بڑا ظلم ہے۔ دوسری طرف حکمران طبقے کی شاہ خرچیاں، مراعات، اربوں روپے کے جہاز، پروٹوکول سب اسی طرح جاری ہیں۔ یہ دوہرا اور طبقاتی نظام زیادہ عرصے نہیں چل سکتا۔

حکومت نے پیٹرولیم مصنوعات کو کمائی کا بڑا ذریعہ بنالیا، پیٹرول اور ڈیزل مہنگی ہونے کی وجوہات سامنے آگئیں۔ فی لیٹر پیٹرول پر 198 روپے اور ڈیزل پر 113 روپے سے زائد کے ٹیکسز وصول کئے جارہے ہیں۔

پیٹرول کی ٹیکسز کے بغیر قیمت 216 روپے 68 پیسے بنتی ہے، پیٹرول کی قیمت میں 29 روپے فی لیٹر پریمیم بھی شامل ہے۔رپورٹ کے مطابق ڈیزل کی فی لیٹر قیمت میں 113 روپے 71 پیسے ٹیکسز شامل ہیں، ٹیکسز کے بغیر اس کی فی لیٹر قیمت تقریباً 301 روپے بنتی ہے، ڈیزل پر 42 روپے 60 پیسے لیوی،32 روپے 48 پیسے کسٹم ڈیوٹی شامل ہے۔ڈسٹری بیوشن مارجن کی مد میں تیل کمپنیوں کو 7٫87 روپے اور منافع 8٫64 روپے دیا جارہا ہے، 7 روپے 25 پیسے فریٹ مارجن، ڈھائی روپے کلائمیٹ سپورٹ لیوی بھی شامل ہے۔

صحافی عامر الیاس رانا ایکس پر کہتے ہیں کہ وزیراعظم شہباز شریف آپ کی حکومت نے لوگوں پر آخر کس طرح پیٹرولیم لیوی مزید بڑھا دی یہ ظلم ہے قیمتوں میں کمی کرنے کی بجائے اسے ٹیکس لگا کر اور بڑھانا ، وزیراعظم اس فیصلے کو فوری واپس لیجئے صرف یہی لیوی نہیں مزید بھی کمی کیجئے یہ کیا ہے کہ ایف بی آر کی ناکامیوں کا بدلہ عام آدمی سے لینا کہاں کی تک ہے