Tag: تازہ ترین

آسکر ایوارڈ یافتہ اداکار جارج کلونی نے وینس فلم فیسٹیول کے دوران امریکی صدر ڈونلڈ ٹرمپ اور ان کی حکومت کو شدید تنقید کا نشانہ بناتے ہوئے کہا ہے کہ امریکا اس وقت ایسے لوگوں کے ہاتھ میں ہے جو حکومت چلانے کیلئے سب سے کم اہل ہیں۔

آسکر ایوارڈ یافتہ اداکار کو وینس فلم فیسٹیول میں فلمی دنیا میں طویل خدمات کے اعتراف میں گولڈن لائن فار لائف ٹائم اچیومنٹ ایوارڈ سے نوازا گیا،اس دوران امریکا کی موجودہ صورتحال سے متعلق سوال پر جارج کلونی نے کہا کہ ملک اس وقت ایک افسوسناک دور سے گزر رہا ہے۔

امریکی حکومت کے بارے میں بات کرتے ہوئے کلونی نے کہا کہ انہیں موجودہ صورتحال پر ’شرمندگی‘ محسوس ہوتی ہے۔ انہوں نے سیاسی اصطلاح ’کاکسٹو کریسی‘ کا حوالہ دیتے ہوئے کہا کہ اس سے مراد ایسا نظام حکومت ہے جو ’کم ترین اہلیت رکھنے والے لوگوں‘ کے ہاتھ میں ہو، اور شاید اس وقت امریکا بھی اسی کیفیت سے گزر رہا ہے، تاہم ’ہم اس دور سے نکل جائیں گے‘۔

معروف ہالی وڈ اداکار جارج کلونی نے کہا ہے کہ ٹرمپ انتظامیہ کے دور میں امریکا اپنی تاریخ کے ایک ’بدقسمت وقت‘ سے گزر رہا ہے، جہاں حکومت ان کے بقول ’کم ترین اہلیت رکھنے والے لوگوں‘ کے ہاتھ میں ہے 65 سالہ اداکار نے تاہم امید ظاہر کی کہ امریکا اس مشکل دور سے نکل آئے گا۔

کلونی نے نومبر میں ہونے والے وسط مدتی انتخابات کو حکومت کے لیے ’چیک اینڈ بیلنس‘ کا ذریعہ قرار دیا اور امید ظاہر کی کہ 2028 تک ملک میں کسی حد تک معمول کی صورتحال بحال ہو سکتی ہے۔ خود کو پُرامید شخص قرار دیتے ہوئے انہوں نے 1968 کے پُرتشدد دور کو یاد کیا، جب امریکا کے کئی شہروں میں ہنگامے پھوٹ پڑے تھے، مارٹن لوتھر کنگ جونیئر اور بوبی کینیڈی ایک ہی سال قتل ہوئے اور امریکی کیپیٹل کے گرد ٹینک تعینات کیے گئے تھے۔

اقوام متحدہ کے ادارہ برائے اطفال یونیسیف کے مطابق 12 سے 17 سال کی عمر کے تقریباً 2 کروڑ بچوں کو ایک سال کے دوران ٹیکنالوجی کے ذریعے جنسی استحصال یا ہراسانی کا سامنا کرنا پڑا، جبکہ 60 فیصد واقعات سوشل میڈیا پلیٹ فارمز پر پیش آئے۔

یونیسیف کے مطابق 21 ممالک میں 12 سے 17 سال کی عمر کے تقریباً 2 کروڑ بچوں، یعنی ہر 5 میں سے تقریباً ایک بچے، کو ایک سال کے دوران ٹیکنالوجی کے ذریعے جنسی استحصال یا بدسلوکی کی کم از کم ایک شکل کا سامنا کرنا پڑا، یونیسیف کی نئی رپورٹ ’بچوں کی نظر سے: ڈیجیٹل ٹیکنالوجیز کس طرح بچوں کے جنسی استحصال کو ممکن بناتی ہیں‘ میں سروے کے اعداد و شمار کے ساتھ ایسے بچوں کی گواہیاں بھی شامل کی گئی ہیں جو خود اس بدسلوکی کا شکار ہوئے۔

رپورٹ کے مطابق ایک کروڑ 50 لاکھ سے زیادہ بچوں کو ان کی مرضی کے خلاف جنسی نوعیت کے مواد کا سامنا کرنا پڑا، جبکہ 90 لاکھ بچوں سے جنسی گفتگو کرنے یا جنسی تصاویر شیئر کرنے کے لیے دباؤ ڈالا گیا تقریباً 40 لاکھ بچوں کی جنسی تصاویر ان کی رضامندی کے بغیر شیئر کی گئیں تقریباً 60 فیصد واقعات فیس بک، انسٹاگرام، اسنیپ چیٹ، ٹک ٹاک اور واٹس ایپ جیسےسوشل میڈیا پلیٹ فارمز پر پیش آئے، جبکہ 14 فیصد واقعات آن لائن گیمز کے دوران ہوئے۔

یونیسیف کے مطابق 57 فیصد واقعات میں مبینہ ملزم وہ شخص تھا جسے بچہ پہلے سے جانتا تھا، جن میں ہم جماعت، دوست، رومانوی ساتھی اور خاندان کے افراد شامل تھے تاہم 38 فیصد بچوں کا پہلی مرتبہ مبینہ ملزم سے آن لائن سامنا ہوا، جہاں جعلی اکاؤنٹس اور نجی پیغامات جیسے ذرائع استعمال کیے گئے۔

ایسے تجربات نےبچوں کی ذہنی و جذباتی کیفیت، تحفظ کے احساس اور دوسروں پر اعتماد کو شدید متاثر کیارپورٹ کے مطابق ٹیکنالوجی کے ذریعے جنسی استحصا ل کا شکار بچوں میں خودکشی کے خیالات یا ایسے رویوں اور خود کو نقصان پہنچانے کے واقعات کی اطلاع دینے کا امکان دیگر بچوں کے مقابلے میں 4 گنا زیادہ تھا، جبکہ ان میں اضطراب کی سطح بھی نمایاں طور پر بلند پائی گئی۔

رپورٹ میں بتایا گیا کہ 40 فیصد سے زیادہ واقعات کبھی کسی کے سامنے نہیں لائے گئے، جبکہ ایک فیصد سے بھی کم واقعات پولیس، سماجی کارکنوں یا ہیلپ لائنز سمیت متعلقہ حکام کو رپورٹ کیے گئے بچوں کی خاموشی کی سب سے بڑی وجہ یہ تھی کہ انہیں معلوم نہیں تھا کہ مدد کے لیے کہاں جانا ہے یا کس سے بات کرنی ہے۔

یونیسیف نے حکومتوں اور ٹیکنالوجی کمپنیوں پر زور دیا ہے کہ وہ بچوں کے آن لائن تحفظ کے لیے مؤثر اقدامات کریں، جن میں پرائیویسی کا مضبوط تحفظ، بالغ افراد کی جانب سے غیر مطلوبہ رابطوں کی روک تھام، محفوظ تجویز کردہ مواد کے نظام، بدسلوکی کی بہتر نشاندہی اور مؤثر رپورٹنگ و معاونت کا نظام شامل ہے۔

بھارتی ریاست آسام میں ایک پولیس اہلکار نے ساتھی اہلکاروں پر اے کے 47 سے فائرنگ کردی، جس کے نتیجے میں پولیس افسر سمیت 2 اہلکار ہلاک اور 2 زخمی ہوگئے۔

کشمیر میڈیا سروس کے مطابق بھارتی ریاست آسام میں ایک پولیس اہلکار کی ساتھیوں پر فائرنگ سے پولیس افسر سمیت 2 اہلکار ہلاک اور 2 زخمی ہوگئے واقعہ ریاست کے ضلع کامرو پ کے علاقے بوکو میں گیمرِمورا پولیس چوکی پر پیش آیا، جو بھارتیہ جنتا پارٹی (بی جے پی) کی حکومت والی ریاست آسام میں واقع ہے۔

فائرنگ میں ہلاک ہونے والوں کی شناخت فضل الر علی اور گیمرِمورا پولیس چوکی کے انچارج انسپکٹر اندرجیت بورا کے نام سے ہوئی ہے پولیس اہلکار چرنجیب چودھری نے مبینہ طور پر اے کے 47 رائفل سے چوکی میں موجود ساتھی اہلکاروں پر فائرنگ کی، جس کے نتیجے میں 2 دیگر اہلکار زخمی ہوئے۔

حکام کے مطابق فائرنگ کے واقعے کی اصل وجوہات اور ملزم اہلکار کے محرکات تاحال معلوم نہیں ہوسکے واقعہ بوکو پولیس اسٹیشن کی حدود میں پیش آیا زخمی اہلکاروں کی حالت اور فائرنگ کرنے والے اہلکار کے بارے میں مزید تفصیلات کا انتظار ہے۔

یہ واقعہ بھارتی سیکیورٹی فورسز میں ساتھی اہلکاروں کی جانب سے فائرنگ کے حالیہ واقعات کے سلسلے کی ایک کڑی قرار دیا جا رہا ہے ایسے واقعات نے بھارتی فوج، نیم فوجی دستوں اور پولیس میں اہلکاروں کے ذہنی دباؤ، نظم و ضبط، کمانڈ کے نظام، کام کے حالات اور نفسیاتی معاونت سے متعلق سوالات کو ایک بار پھر نمایاں کردیا ہے۔

عالمی موسمیاتی تنظیم کے مطابق ایل نینو آئندہ چند ماہ میں مزید شدت اختیار کرسکتا ہے، جس کے نتیجے میں سیلاب، خشک سالی اور شدید گرمی کے خطرات میں اضافہ متوقع ہے۔

عالمی موسمیاتی تنظیم (WMO) نے خبردار کیا ہے کہ ایل نینو پوری طرح فعال ہوچکا ہے اور آنے والے مہینوں میں اس کی شدت مزید بڑھنے کا امکان ہے۔ تنظیم کے تازہ ترین جائزے کے مطابق ایل نینو کے فروری 2027 تک برقرار رہنے کا امکان تقریباً 100 فیصد ہے، جس کے موسمی اثرات 2027 تک جاری رہ سکتے ہیں۔

WMO کے مطابق استوائی بحرالکاہل میں سمندری درجہ حرارت معمول سے غیر معمولی طور پر زیادہ ہے، جس کے باعث ایل نینو 2026 کے اختتام تک انتہائی مضبوط سطح تک پہنچ سکتا ہے،مرکزی و مشرقی استوائی بحرالکاہل میں سمندر کی سطح کے درجہ حرارت کی پیمائش کرنے والے ’نینو 3.4‘ انڈیکس کے مطابق مئی سے جولائی 2026 کے دوران درجہ حرارت معمول سے اوسطاً 1.5 ڈگری سینٹی گریڈ زیادہ رہا، جبکہ جولائی میں یہ فرق 2 ڈگری سینٹی گریڈ تک پہنچ گیا۔ جولائی کے آخر سے اگست کے وسط تک ہفتہ وار درجہ حرارت معمول سے 2.2 سے 2.6 ڈگری سینٹی گریڈ زیادہ ریکارڈ کیا گیا۔

عالمی موسمیاتی تنظیم کی سیکریٹری جنرل سیلیسٹے ساؤلو نے کہا ہے کہ خشک سالی اور سیلاب پہلے ہی بڑے پیمانے پر نقصان اور خلل کا باعث بن رہے ہیں، جبکہ ایل نینو کی شدت بڑھنے کے ساتھ ان کے اثرات میں مزید اضافہ متوقع ہے اس غیر معمولی ایل نینو کے لیے غیر معمولی تیاری اور مؤثر ردعمل کی ضرورت ہے، جس کے لیے WMO قومی موسمیاتی اور ہائیڈرولوجیکل اداروں کے ساتھ مل کر ابتدائی انتباہ اور ہنگامی تیاری کے نظام کو مضبوط بنا رہی ہے۔

WMO کے مطابق ستمبر سے نومبر 2026 کے دوران دنیا کے تقریباً تمام زمینی علاقوں میں معمول سے زیادہ درجہ حرارت کا امکان ہے، جبکہ بارشوں کے انداز بھی طاقتور ایل نینو سے متاثر ہوسکتے ہیں، تاہم کسی خطے میں ایل نینو کے اثرات کی شدت صرف اس کی اپنی طاقت سے طے نہیں ہوتی بلکہ بھارتی اور بحر اوقیانوس کے سمندروں کی صورتحال سمیت دیگر موسمی عوامل بھی اہم کردار ادا کرتے ہیں۔ تنظیم نے واضح کیا کہ ایل نینو ایک قدرتی موسمیاتی مظہر ہے اور یہ موسمیاتی تبدیلی کے باعث پیدا نہیں ہوتا۔