وزیراعظم محمد شہباز شریف سے متحدہ قومی موومنٹ کے وفد نے ملاقات کی جس کی قیادت وفاقی وزیر تعلیم اور ایم کیو ایم کے کنوینر خالد مقبول صدیقی نے کی۔
وفد میں ایم کیو ایم کے رہنما ڈاکٹر فاروق ستار، قومی اسمبلی کے ارکان سید امین الحق اور جاوید حنیف شامل تھے۔
ملاقات میں نائب وزیراعظم و وزیر خارجہ سینیٹر اسحاق ڈار اور وزیراعظم کے مشیر رانا ثناء اللہ نے بھی شرکت کی۔
ملاقات کے دوران ایم کیو ایم وفد نے آئندہ وفاقی بجٹ کے حوالے سے اپنی تجاویز وزیراعظم کو پیش کیں۔
اس موقع پر سندھ اور کراچی میں وفاقی حکومت کے تحت جاری عوامی فلاحی منصوبوں پر بھی تفصیلی گفتگو کی گئی۔
وزیراعظم شہباز شریف نے کہا کہ ایم کیو ایم وفاقی حکومت کی ایک اہم اتحادی جماعت ہے جس نے عوامی فلاح کے اقدامات میں حکومت کا بھرپور ساتھ دیا۔
انہوں نے متعلقہ حکام کو ہدایت کی کہ ایم کیو ایم کی بجٹ تجاویز کا جائزہ لیا جائے اور قابلِ عمل و جامع حکمت عملی تیار کر کے پیش کی جائے۔
ملاقات میں ملک کی مجموعی سیاسی صورتحال پر بھی تبادلہ خیال کیا گیا۔
وزیراعظم شہباز شریف سے ایم کیو ایم وفد کی ملاقات، بجٹ تجاویز پر تبادلہ خیال
