Author: ممتاز حیدر

اسلام آباد: دفترِ خارجہ کے ترجمان طاہر حسین اندرابی نے کہا ہے کہ پاکستان خطے میں امن و استحکام کے لیے اپنی سفارتی کوششیں بھرپور انداز میں جاری رکھے ہوئے ہے اور اس سلسلے میں اہم علاقائی و عالمی رہنماؤں سے مسلسل رابطہ رکھا جا رہا ہے۔

ہفتہ وار نیوز بریفنگ میں ترجمان کا کہنا تھا کہ پاکستان نے جاری تنازعات کے اہم فریقین کے ساتھ رابطے برقرار رکھے ہیں تاکہ کشیدگی میں کمی لائی جا سکے۔ انہوں نے بتایا کہ ایران کے صدر نے پاکستان کی امن کوششوں کو سراہا ہے، جبکہ وزیرِ اعظم شہباز شریف نے ایران کی جانب سے وفد اسلام آباد بھیجنے کے فیصلے کا خیر مقدم کیا ہے۔ترجمان کے مطابق وزیرِ اعظم شہباز شریف نے ایران اور سعودی عرب کی قیادت سے بھی رابطہ کیا، جبکہ یورپی کونسل کے صدر سے ہونے والی گفتگو میں مذاکرات اور سفارت کاری کی اہمیت پر زور دیا گیا۔انہوں نے مزید بتایا کہ ترکیہ کے صدر نے بھی پاکستان کی امن کوششوں کو سراہا، جبکہ وزیرِ اعظم نے محمد بن سلمان کی پاکستان کے لیے مسلسل حمایت پر شکریہ ادا کیا۔ ترجمان کے مطابق سعودی عرب نے پاکستان کے معاشی استحکام میں اہم کردار ادا کیا ہے۔

سرحدی صورتحال پر بات کرتے ہوئے ترجمان نے کہا کہ جنوبی وزیرستان میں افغانستان کی جانب سے 26 اور 29 اپریل کو بلااشتعال فائرنگ اور گولہ باری کی گئی، جس کے نتیجے میں متعدد افراد زخمی ہوئے اور گھروں کو نقصان پہنچا۔ انہوں نے کہا کہ ماضی میں بھی اس علاقے میں سرحد پار فائرنگ کے واقعات پیش آتے رہے ہیں۔ترجمان نے واضح کیا کہ پاکستان امن کا خواہاں ہے تاہم اپنی خودمختاری اور علاقائی سالمیت کے تحفظ کے لیے ہر ممکن اقدام اٹھایا جائے گا۔

پاک افغان چمن بارڈر پر کشیدگی میں اضافہ دیکھنے میں آیا ہے جہاں افغانستان کی جانب سے شہری آبادی کو نشانہ بنایا گیا۔

ذرائع کے مطابق افغان طالبان کی جانب سے بلا اشتعال فائرنگ کی گئی جس کے نتیجے میں مقامی نوجوان رفیع اللّٰہ شہید ہو گئے، جبکہ متعدد افراد زخمی ہونے کی اطلاعات ہیں۔عینی شاہدین اور مقامی افراد کا کہنا ہے کہ جس علاقے پر فائرنگ کی گئی وہ مکمل طور پر سول آبادی پر مشتمل ہے، جہاں عام شہری رہائش پذیر ہیں اور وہاں کسی قسم کی عسکری یا سیکیورٹی تنصیب موجود نہیں۔زخمی ہونے والوں کو فوری طور پر قریبی طبی مراکز منتقل کیا گیا جہاں انہیں طبی امداد فراہم کی جا رہی ہے۔

مقامی انتظامیہ اور سیکیورٹی اداروں نے واقعے کا نوٹس لیتے ہوئے صورتحال کا جائزہ لینا شروع کر دیا ہے، جبکہ بارڈر کے اطراف سیکیورٹی مزید سخت کر دی گئی ہے۔ ذرائع کا کہنا ہے کہ حکام کی جانب سے اس واقعے پر شدید تشویش کا اظہار کیا گیا ہے اور اسے بلا اشتعال کارروائی قرار دیا جا رہا ہے۔ماہرین کے مطابق شہری آبادی کو نشانہ بنانا نہ صرف بنیادی انسانی حقوق کی سنگین خلاف ورزی ہے بلکہ یہ بین الاقوامی انسانی قوانین کے بھی منافی ہے۔ انہوں نے عالمی برادری سے مطالبہ کیا ہے کہ اس واقعے کا نوٹس لے کر ذمہ داران کے خلاف کارروائی یقینی بنائی جائے،

افغانستان کی جانب سے ایک بار پھر جنوبی وزیرستان کے انگور اڈہ سے ملحقہ سرحدی علاقوں میں پاکستان کی سول آبادی پر گولہ باری – ڈاکٹرز اور متاثرہ افراد کے اہم بیانات سامنے آگئے

افغان طالبان رجیم نے جنوبی وزیرستان کے علاقے انگور اڈہ میں شہری آبادی پر حملہ کردیا.سکیورٹی ذرائع کے مطابق 29 اپریل کو افغان طالبان نے انگور اڈہ سے ملحقہ سرحدی علاقے میں شہری آبادی پرگولہ باری کی،افغان طالبان کی جانب سے فائر کیا گیا مارٹر گولہ شہری کریم خان اور رحمت اللہ کے گھر پر گرا جس کے نتیجے میں ان کے خاندان کے 5 افراد زخمی ہوگئے،سکیورٹی ذرائع کا کہنا ہے کہ میڈیکل آفیسر ڈاکٹراشفاق کے مطابق اسپتال میں3 بچوں سمیت 5 زخمی اسپتال لائے گئے ہیں جو بلاسٹ انجری کا شکار ہیں، متاثرہ بچوں کو فوری طور پر ایڈمٹ کر کے علاج شروع کر دیا گیا ہے،

ڈاکٹر کے مطابق ایک مریض کا فریکچر ہے اور اس کے ایلبو جوائنٹ کی بیک سلیب کے ذریعے اسٹیبلائزیشن کر دی گئی ہے، ڈاکٹر کے مطابق تینوں بچوں کی حالت اس وقت زیرِ نگرانی ہے اور انہیں مکمل طبی سہولیات فراہم کی جا رہی ہیں

متاثرہ شخص نور علی کے مطابق گولہ اچانک گھر پر آ گرا، جس کے نتیجے میں زور دار دھماکہ ہوا اور ہر طرف چیخ و پکار مچ گئی،ایک اور متاثرہ شخص کا کہنا تھا کہ دھماکہ اتنا شدید تھا کہ پورا گھر لرز اٹھا اور کچھ سمجھنے کا موقع ہی نہیں ملا،اہلِ علاقہ نے واقعے پر شدید تشویش کا اظہار کرتے ہوئے کہا ہے کہ سرحد پار سے ہونے والی اس نوعیت کی گولہ باری میں عام شہری، خصوصاً بچے، بار بار نشانہ بن رہے ہیں جس سے علاقے میں خوف و غیر یقینی کی صورتحال برقرار ہے۔واضح رہے کہ اس سے قبل بھی اسی علاقے میں سرحد پار سے فائرنگ اور گولہ باری کے واقعات رپورٹ ہو چکے ہیں جن میں عام شہری زخمی ہوئے تھے

بحری دفاع میں ایک اہم سنگ میل، پاک بحریہ کی پہلی جدید ترین ہنگور کلاس آبدوز کی کمیشننگ کی تقریب چین میں منعقد ہوئی جس کے بعد اسے بحریہ میں شامل کرلیا گیا ۔صدر آصف علی زرداری نے بطور مہمان خصوصی تقریب میں شرکت کی۔ اس موقع پر سربراہ پاک بحریہ ایڈمرل نوید اشرف بھی موجود تھے۔

صدر زرداری نے ہنگور کی کمیشننگ کو پاک بحریہ کی جدت کے سفر میں ایک تاریخی سنگِ میل قرار دیا۔ انہوں نے اس موقع پر پاکستان کے ایک مضبوط، متوازن اور قابلِ اعتماد دفاعی پالیسی برقرار رکھنے کے عزم کا بھی اعادہ کیا۔ انہوں نے کہا کہ پاکستان اپنی خودمختاری کے دفاع، بحری مفادات کے تحفظ اور تجارتی گزرگاہوں کی سلامتی یقینی بنانے کی مکمل صلاحیت رکھتا ہے۔

اس موقع پر سربراہ پاک بحریہ ایڈمرل نوید اشرف نے اس بات پر زور دیا کہ اہم بحری گزرگاہوں کا تعطل عالمی تجارت اور توانائی کی ترسیل کے لیے بڑا خطرہ ہے ۔ اس تناظر میں ایک مستحکم اور عالمی قوانین پر مبنی بحری نظام کو برقرار رکھنے کے لیے جدید ترین بحری افواج ناگزیر ہیں۔ انہوں نے کہا کہ ہنگور کلاس آبدوزیں جو جدید ترین ہتھیاروں، سینسرز اور ایئر انڈیپینڈنٹ پروپلشن سے لیس ہیں، خطے میں بحری استحکام کو برقرار رکھنے میں کلیدی کردار ادا کریں گی ۔ یہ آبدوزیں جارحیت کو روکنے اور بحیرہ عرب میں اہم سمندری تجارتی گزرگاہوں کی سلامتی یقینی بنانے میں اہم کردار ادا کریں گی۔

نیول چیف نے کہا کہ ہنگور کا نام ہماری قومی تاریخ میں خاص اہمیت رکھتا ہے۔ 1971 کی پاک بھارت جنگ میں، سابقہ ‘ہنگور’ دوسری عالمی جنگ کے بعد کسی بحری جہاز کو تباہ کرنے والی پہلی آبدوز تھی ۔ آبدوز ‘ہنگور’ اس شاندار ورثہ کو آگے بڑھائے گی کیونکہ یہ پاک بحریہ کے لیے ایک اہم سنگِ میل ہے جو ہمارے بحری دفاع کو مضبوط اور ہمارے بیڑے کو جدید ترین ٹیکنالوجی سے لیس کرے گی۔پہلی ہنگور کلاس آبدوز کی کمیشننگ پاکستان اور چین کے درمیان دیرینہ اور گہری دوستی کا ایک نیا باب ہے۔ تقریب میں پاک بحریہ اور پی ایل اے (نیوی) کے اعلیٰ افسران نے شرکت کی۔

وزیرِ اعظم شہباز شریف نے کہا ہے کہ بجٹ میں ہم بڑی چیزیں لے کر آئیں گے، وزیرِ اعظم اپنا گھر اسکیم کے لیے قرض کا حصول آسان بنایا گیا ہے۔

اسلام آباد میں وزیرِ اعظم اپنا گھر اسکیم کے اجراء کی تقریب میں وزیرِ اعظم شہباز شریف نے بھی شرکت کی، اس اسکیم کے تحت ایک کروڑ تک قرض آسان شرائط پر دستیاب ہوگا،اس اسکیم کا اطلاق چاروں صوبوں، گلگت بلتستان اور آزادکشمیر میں ہوگا،وزیرِ اعظم شہباز شریف نے اسکیم کا باقاعدہ اجرا کیا اور اس موقع پر تقریب سے خطاب کرتے ہوئے کہا کہ لوگوں کی ایک بڑی تعداد اپنے گھر سے محروم ہے، لوگوں کو چھت کی فراہمی مقدس فریضہ ہے، گھر کے لیے قرض حاصل کرنے والوں کو مبارکباد دیتا ہوں، عام آدمی کو چھت کی فراہمی ہماری حکومت کی اولین ترجیح ہے، یہ اسکیم چاروں صوبوں سمیت آزاد کشمیر اور گلگت بلتستان کے لیے بھی ہے،
اپنا گھر سکیم ریاست کا مقدس فریضہ ہے۔،پاکستان میں آج بھی لاکھوں لوگ اپنی چھت سے محروم ہیں، کئی کے لیے نیلا آسمان ہی چھت اور زمین ہی فرش ہے۔ یہ منصوبہ بے پناہ محنت، مشاورت اور عزم سے ممکن ہوا، جس میں اسحاق ڈار، وزیر خزانہ، گورنر اسٹیٹ بینک و دیگر کا اہم کردار رہا،اسکیم کے تحت پہلا ہدف 50 ہزار گھروں کے لیے قرض ہے، اس اسکیم کے لیے 321 ارب روپے کی فنانسنگ مختص کی گئی ہے، آئندہ 4 برس میں ہمارا ہدف 5 لاکھ گھروں کا ہے، اس اسکیم کا حجم 3.2 کھرب روپے کا ہے، 10 مرلے کی زمین تک گھر بنایا جا سکے گا،اس قرضے کی مدت 20 سال ہے، مارک اپ 5 فیصد ہوگا اور ایک کروڑ روپے تک قرضہ دیا جائے گا، میں اس اسکیم کا ہر مہینے خود جائزہ لوں گا، جو بینکس اس اسکیم میں لیڈ لیں گے وہ ہمارے سروں کے تاج ہوں گے، ان بینکوں کو ہم 14 اگست کو ایوارڈ دیں گے، اس سے انڈسٹری اور کامرس چلے گی اور ملک میں خوشحالی کے دروازے کھلیں گے