Author: ممتاز حیدر

بنگلورو: حیدرآباد سے ہبلی جانے والی Fly91 ایئرلائن کی ایک پرواز میں خراب موسم کے باعث شدید خوف و ہراس پھیل گیا، جہاں مسافر تقریباً چار گھنٹے تک فضا میں معلق رہنے پر گھبراہٹ کا شکار ہو گئے اور کئی افراد رونے لگے۔

سوشل میڈیا پر سامنے آنے والی ایک ویڈیو میں ایک خاتون کو ہاتھ جوڑ کر خاموشی سے دعا کرتے اور زار و قطار روتے دیکھا جا سکتا ہے۔ ویڈیو میں مسافروں کی چیخ و پکار سنائی دیتی ہے، جہاں کچھ لوگ “اوہ مائی گاڈ” پکارتے رہے جبکہ ایک شخص پائلٹ کے رویے پر غصے کا اظہار کرتا سنائی دیا۔ اسی دوران دیگر مسافر ایک دوسرے کو تسلی دیتے بھی نظر آئے۔Fly91 کی پرواز IC3401 (ATR ٹربو پروپ) کل دوپہر تقریباً 3 بجے حیدرآباد کے راجیو گاندھی انٹرنیشنل ایئرپورٹ سے روانہ ہوئی تھی اور اسے شام 4:30 بجے ہبلی پہنچنا تھا۔ تاہم لینڈنگ سے قبل خراب موسم کے باعث پائلٹس کو لینڈنگ منسوخ کرنا پڑی۔طیارہ منڈگود، داونگیرے اور شیواموگّا کے علاقوں کے اوپر چکر لگاتا رہا جبکہ صورتحال کو قابو میں رکھنے کی کوششیں جاری رہیں۔ اس دوران مسافروں نے پائلٹ سے بنگلورو یا بیلگام جانے کی درخواست بھی کی۔

پائلٹ کی جانب سے اعلان کیا گیا کہ مسافر صبر کریں اور ہدایات پر عمل کریں، جبکہ عملہ مسلسل صورتحال پر نظر رکھے ہوئے ہے۔دوسری جانب مسافروں کے اہل خانہ نے ایئرلائن پر غفلت اور معلومات کی کمی کا الزام لگایا، ان کا کہنا تھا کہ انہیں بروقت اپڈیٹس فراہم نہیں کی گئیں۔تاہم ایئرلائن نے وضاحت کرتے ہوئے کہا کہ پرواز میں کوئی تکنیکی خرابی پیش نہیں آئی تھی۔ بیان کے مطابق خراب موسم کے باعث طیارے کو معیاری طریقہ کار کے تحت بنگلورو کی جانب موڑ دیا گیا، جو ہوا بازی کی صنعت میں ایک محفوظ اور معمول کی کارروائی ہے۔ایئرلائن نے مزید کہا کہ اس کے پائلٹس اور عملہ ہر ہنگامی صورتحال سے نمٹنے کی مکمل تربیت رکھتے ہیں اور مسافروں کی حفاظت پر کوئی سمجھوتہ نہیں کیا گیا۔بالآخر طیارہ شام تقریباً 7:30 بجے بنگلورو کے کیمپے گوڑا انٹرنیشنل ایئرپورٹ پر بحفاظت لینڈ کر گیا، جس کے بعد مسافروں نے سکون کا سانس لیا۔

پاکستانی اداکارہ، ماڈل اور میزبان فضا علی ایک بار پھر سوشل میڈیا پر خبروں کا مرکز بن گئی ہیں، جب انہوں نے لندن میں اپنے شوہر اعجاز خان کے ساتھ وہی متنازع لمحہ دوبارہ دہرایا جو اس سے قبل ان کے لائیو شو میں وائرل ہوا تھا۔

رپورٹس کے مطابق فضا علی حال ہی میں تیسری شادی کے بعد نئی زندگی کا آغاز کر چکی ہیں اور ان دنوں اپنے شوہر کے ہمراہ لندن میں موجود ہیں۔یاد رہے کہ کچھ روز قبل اپنے لائیو پروگرام کے دوران اعجاز خان نے فضا علی کو کندھے پر اٹھا لیا تھا، جسے سوشل میڈیا صارفین نے نامناسب قرار دیا۔ معاملہ اس قدر بڑھا کہ پروگرام پر پابندی کا مطالبہ بھی سامنے آیا، جس کے بعد فضا علی نے باقاعدہ معذرت کی تھی۔

اب اداکارہ نے ہیروڈز کے سامنے اسی منظر کو دوبارہ عکس بند کروا کر ویڈیو سوشل میڈیا پر شیئر کی،فضا علی کے شوہر آتے ہیں اور فضا علی کو دوبارہ سے اپنے کندھے پر اٹھا لیتے ہیں، جس کے بعد ایک بار پھر تنقید کا نیا سلسلہ شروع ہو گیا۔ویڈیو وائرل ہونے کے بعد صارفین کی جانب سے مختلف تبصرے سامنے آئے۔ ایک صارف نے لکھا کہ نامناسب رویہ ہر جگہ نامناسب ہی رہتا ہے، بیرون ملک جانے سے کوئی چیز جائز نہیں ہو جاتی۔ جبکہ ایک اور صارف نے اسے “مڈ لائف کرائسز” قرار دیا۔ایک تبصرے میں طنزیہ انداز میں کہا گیا کہ کم از کم رومانوی انداز میں اٹھانا تو سکھائیں، اس طرح نہیں جیسے کوئی بوجھ اٹھایا جا رہا ہو۔

دنیا بھر میں خوبصورتی کے معیار مختلف ہیں، لیکن افریقی ملک موریطانیہ میں حسن کا تصور دنیا کے کئی ممالک سے بالکل مختلف ہے۔ جہاں اکثر معاشروں میں پتلا جسم اور دبلی کمر کو خوبصورتی سمجھا جاتا ہے، وہیں موریطانیہ میں زیادہ وزن اور بھاری جسم کو حسن، کشش اور سماجی وقار کی علامت مانا جاتا ہے۔

موریطانیہ میں موٹی لڑکیوں کو زیادہ پرکشش سمجھا جاتا ہے جبکہ دبلی پتلی لڑکیوں کو کم خوبصورت تصور کیا جاتا ہے۔ اسی سوچ کے تحت بعض خاندان اپنی بیٹیوں کو کم عمری میں زبردستی موٹا بنانے کی کوشش کرتے ہیں تاکہ انہیں شادی کے لیے موزوں سمجھا جائے۔موریطانیہ میں اس روایت کو “لیبلوہ” یا “گیواج” کہا جاتا ہے، جو خاص طور پر دیہی علاقوں میں پائی جاتی ہے۔ اس رسم کے تحت پانچ سے انیس سال تک کی لڑکیوں کو خصوصی گھروں یا مقامات پر رکھا جاتا ہے جہاں انہیں مسلسل زیادہ مقدار میں کھانا کھلایا جاتا ہے۔رپورٹس کے مطابق لڑکیوں کو روزانہ 10 ہزار سے 16 ہزار کیلوریز تک غذا دی جاتی ہے، جو ایک عام انسان کی ضرورت سے کئی گنا زیادہ ہے۔ اس خوراک میں اونٹ کا دودھ، کُسکُس، مکھن، مونگ پھلی کا تیل اور جانوروں کی چربی شامل ہوتی ہے۔

اگر کوئی لڑکی مزید کھانے سے انکار کرے تو بعض جگہوں پر اسے جسمانی یا ذہنی دباؤ کا سامنا کرنا پڑتا ہے۔ انسانی حقوق کے کارکنان کے مطابق بعض لڑکیوں کو مارا پیٹا جاتا ہے یا مختلف اذیت ناک طریقوں سے کھانے پر مجبور کیا جاتا ہے۔روایتی ماؤر معاشرے میں موٹاپا خوشحالی، دولت اور عزت کی نشانی سمجھا جاتا ہے۔ مقامی تصور یہ ہے کہ اگر عورت صحت مند اور بھاری جسم کی مالک ہو تو اس کا مطلب ہے کہ اس کا شوہر اسے اچھا کھانا فراہم کر سکتا ہے۔اسی سوچ کی وجہ سے کئی خاندان اپنی بیٹیوں کو کم عمری میں موٹا کر کے جلد شادی کے قابل بنانے کی کوشش کرتے ہیں۔ بعض علاقوں میں یہ بھی سمجھا جاتا ہے کہ بھاری جسم عورت کی پختگی اور بلوغت کی علامت ہے۔

ماہرین کے مطابق اس رسم کے نتیجے میں لڑکیوں کو متعدد طبی مسائل لاحق ہو سکتے ہیں، جن میں موٹاپا،ذیابیطس،ہائی بلڈ پریشر،دل کی بیماریاں،جوڑوں کا درد ،سانس کے مسائل شامل ہیں،بعض اطلاعات کے مطابق کچھ جگہوں پر وزن بڑھانے کے لیے خطرناک کیمیکل یا جانوروں کے لیے استعمال ہونے والے مادے بھی دیے جاتے ہیں، جو مزید نقصان دہ ثابت ہو سکتے ہیں۔

اقوام متحدہ، انسانی حقوق کی تنظیمیں اور خواتین کے حقوق کے کارکنان اس روایت کے خلاف مسلسل آواز اٹھا رہے ہیں۔ شہری علاقوں میں تعلیم کے فروغ اور نئی نسل کے بدلتے خیالات کے باعث یہ رسم آہستہ آہستہ کم ہو رہی ہے، تاہم دیہی علاقوں میں اب بھی اس کے اثرات موجود ہیں۔ماہرین کا کہنا ہے کہ خوبصورتی کے معیار وقت اور معاشرے کے ساتھ بدلتے رہتے ہیں، لیکن کسی بھی رسم میں صحت، آزادی اور انسانی وقار کو مقدم رکھنا ضروری ہے

ایرانی وزارت خارجہ کے ترجمان کا کہنا ہے کہ ایران کا اب تک امریکا کے ساتھ مذاکرات کے دوسرے دور میں شرکت کا پلان نہیں ہے، مذاکرات کیلئے فی الحال پاکستان جانے کا ارادہ نہیں، ثالث کار پاکستان کو بتادیا،

ایرانی وزارت خارجہ کے ترجمان اسماعیل بقائی نے نیوزکانفرنس میں کہا کہ ایران اپنے مفادات کا تحفظ جاری رکھے گا، ایران کا اب تک امریکا سے مذاکرات کے دوسرے دور میں شرکت کا پلان نہیں ہے، مذاکرات کیلئے فی الحال پاکستان جانے کا ارادہ نہیں، ثالث کار پاکستان کو بتادیا، امریکا اب بھی غیر حقیقی مطالبات پر اصرار کررہا ہے۔ان کا کہنا ہے کہ امریکا نے بحری ناکہ بندی جاری رکھ کر جنگ بندی کی خلاف ورزی کی، ایران کو امریکا پر اعتماد نہیں ہے، امریکا اور اسرائیل، ایران میں جنگی جرائم کے مرتکب ہوئے۔ترجمان دفتر خارجہ نے مزید کہا کہ امریکا کا مؤقف اور مطالبات بدلتے رہتے ہیں جو بات چیت کی راہ میں رکاوٹ ہیں، آبنائے ہرمز میں جو کچھ ہورہا ہے اس کے ذمہ دار امریکا اور اسرائیل ہیں، امریکی افواج کی جانب سے کسی بھی احماقانہ اقدام کا ایرانی افواج جواب دیں گی۔

بہار: بھارتی ریاست بہار کے ضلع ویشالی میں شادی کی ایک تقریب اس وقت میدانِ جنگ میں تبدیل ہوگئی جب دولہے کے ایک جملے پر دلہن نے نکاح سے انکار کردیا، جس کے بعد دونوں خاندانوں کے درمیان شدید جھڑپ شروع ہوگئی۔

بھارتی میڈیا رپورٹس کے مطابق شادی کی تقریب ایک بینکوئٹ ہال میں جاری تھی جہاں بارات کا استقبال کیا گیا، مہمانوں نے کھانا کھایا اور جے مالا کی رسم بھی خوش اسلوبی سے مکمل ہوئی۔ تاہم خوشی کا ماحول اس وقت کشیدہ ہوگیا جب بارات کے دو نوجوان مبینہ طور پر دلہن کے کمرے میں داخل ہوگئے،لڑکی والوں نے اس پر سخت اعتراض کرتے ہوئے دونوں افراد کو باہر نکال دیا، جس پر تلخ کلامی شروع ہوگئی۔ دیکھتے ہی دیکھتے معاملہ ہاتھا پائی میں بدل گیا اور دونوں فریق آمنے سامنے آگئے،عینی شاہدین کے مطابق ہال میں کرسیاں چلیں، لاٹھیاں برسیں اور شدید افراتفری پھیل گئی، جبکہ کئی افراد زخمی ہوئے۔ ہال کے باہر کھڑی گاڑیوں کو بھی نقصان پہنچنے کی اطلاعات ہیں۔

رپورٹ کے مطابق اسی دوران دولہا غصے میں آگیا اور اس نے دلہن کو دھمکی آمیز انداز میں کہا کہ "شادی کے بعد ٹھیک کردیں گے”۔ یہ جملہ سن کر دلہن نے فوری طور پر شادی سے انکار کردیا،اہل خانہ نے معاملہ سنبھالنے اور دلہن کو منانے کی کوشش کی، تاہم وہ اپنے فیصلے پر قائم رہی۔ بعد ازاں پولیس موقع پر پہنچ گئی اور حالات پر قابو پایا،پولیس نے دونوں خاندانوں کو تھانے منتقل کیا جہاں رات گئے تک مذاکرات جاری رہے، لیکن کشیدگی بڑھنے کے باعث شادی دوبارہ شروع نہ ہوسکی۔ آخرکار دونوں فریقوں نے باہمی رضامندی سے شادی منسوخ کرنے پر اتفاق کرلیا۔