مظفر گڑھ: مظفر گڑھ میں شہریوں کو مبینہ طور پر اغوا کرکے تاوان وصول کرنے کے سنگین الزام میں کرائم کنٹرول ڈیپارٹمنٹ (سی سی ڈی) کے پانچ اہلکاروں کے خلاف مقدمہ درج کرلیا گیا، جبکہ تین اہلکاروں کو حراست میں لے کر معطل بھی کر دیا گیا ہے۔
سی سی ڈی حکام کے مطابق واقعہ 16 جنوری کو پیش آیا، جب پانچ اہلکاروں نے تحصیل جتوئی کے بازار سے لنڈے کا کاروبار کرنے والے ایک شہری اور اس کے ساتھی کو مبینہ طور پر اغوا کر لیا۔الزام ہے کہ اہلکار دونوں مغویوں کو ایک نجی عقوبت خانے میں لے گئے، جہاں انہیں غیرقانونی طور پر حبس میں رکھا گیا۔ متاثرین کا کہنا ہے کہ دورانِ حراست انہیں جھوٹے مقدمات میں ملوث کرنے اور جان سے مارنے کی دھمکیاں دی گئیں تاکہ ان سے رقم وصول کی جا سکے۔تحقیقات کے مطابق ملزمان نے مبینہ طور پر 12 لاکھ روپے تاوان وصول کرنے کے بعد دونوں افراد کو رہا کیا۔
سی سی ڈی حکام کا کہنا ہے کہ واقعے میں ملوث پانچ اہلکاروں کے خلاف مقدمہ درج کر لیا گیا ہے۔ ابتدائی کارروائی کے دوران تین اہلکاروں کو حراست میں لے کر معطل کر دیا گیا ہے، جبکہ دیگر ملزمان کی گرفتاری اور واقعے کے مختلف پہلوؤں کی تحقیقات جاری ہیں۔حکام کے مطابق اگر تحقیقات میں اہلکاروں کے خلاف الزامات ثابت ہوئے تو قانون کے مطابق سخت محکمانہ اور قانونی کارروائی عمل میں لائی جائے گی۔