سری لنکا کے شہر نیگومبو کی ایک جیل میں قیدیوں کے دو گروہوں کے درمیان ہونے والی خونریز جھڑپوں کے نتیجے میں کم از کم 19 قیدی ہلاک جبکہ 100 سے زائد افراد زخمی ہو گئے۔
غیر ملکی خبر ایجنسی کے مطابق جیل میں اتوار کے روز دو مخالف گروہوں کے درمیان تصادم شروع ہوا، جسے سیکیورٹی اہلکاروں نے رات گئے تک قابو میں کر لیا تھا۔ تاہم پیر کی صبح دونوں گروہوں کے درمیان ایک بار پھر شدید جھڑپیں شروع ہو گئیں، جس کے باعث جیل میں شدید افراتفری پھیل گئی۔رپورٹس کے مطابق ہنگامہ آرائی کے دوران متعدد قیدی شدید زخمی ہوئے۔ زخمیوں کو فوری طور پر نیگومبو کے مقامی اسپتال منتقل کیا گیا، جبکہ تشویشناک حالت میں موجود قیدیوں کو بہتر طبی سہولیات کی فراہمی کے لیے دارالحکومت کولمبو کے اسپتالوں میں منتقل کیا جا رہا ہے۔واقعے کے بعد جیل میں سیکیورٹی سخت کر دی گئی ہے اور اضافی اہلکار تعینات کر دیے گئے ہیں تاکہ مزید کسی ناخوشگوار صورتحال سے بچا جا سکے۔
سری لنکن حکام نے واقعے کا نوٹس لیتے ہوئے ہنگامہ آرائی کی وجوہات اور ذمہ دار عناصر کا تعین کرنے کے لیے باضابطہ تحقیقات شروع کر دی ہیں۔ حکام کا کہنا ہے کہ تحقیقات مکمل ہونے کے بعد واقعے کی تفصیلات اور ذمہ داروں کے خلاف قانونی کارروائی سے متعلق مزید معلومات فراہم کی جائیں گی۔