Author: ممتاز حیدر

لاہور: محکمہ اوقاف پنجاب میں حضرت داتا گنج بخشؒ کے عرس اور عید میلاد النبیؐ کے فنڈز میں سنگین مالی بے ضابطگیوں اور کرپشن ثابت ہونے پر سیکرٹری اوقاف ڈاکٹر احسان بھٹہ نے تین سابق افسران کے خلاف سخت محکمانہ کارروائی کے احکامات جاری کر دیے۔

محکمانہ فیصلے کے مطابق سابق اسسٹنٹ ڈائریکٹر حافظ جاوید شوکت کو مالی بدعنوانی، قواعد و ضوابط کی خلاف ورزی اور اوپن چیکس کے ذریعے من پسند سپلائرز کو ادائیگیاں کرنے کے الزامات ثابت ہونے پر ملازمت سے برطرف کر دیا گیا ہے۔ ان سے 64 لاکھ روپے سے زائد کی ریکوری بھی کی جائے گی۔اسی طرح سابق ایڈمنسٹریٹر داتا دربار شیخ جمیل احمد کو پانچ سال کے لیے نچلے عہدے پر تنزلی کی سزا دیتے ہوئے 28 لاکھ روپے کی ریکوری کا حکم دیا گیا، جبکہ سابق منیجر داتا دربار طاہر مقصود کو تین سال کے لیے تنزلی اور 18 لاکھ روپے سے زائد کی ریکوری کا سامنا ہوگا۔

محکمانہ انکوائری میں انکشاف ہوا کہ عرس انتظامات کے دوران مروجہ مانیٹرنگ سسٹم کو نظر انداز کیا گیا، وینڈر سبسٹی ٹیوشن کی گئی اور من پسند سپلائرز کو نوازا گیا۔ ان الزامات کے ثابت ہونے پر معاملہ مزید قانونی کارروائی کے لیے اینٹی کرپشن اسٹیبلشمنٹ (ACE) کو ریفرنس بھیجنے کی بھی ہدایت کر دی گئی ہے۔دوسری جانب سابق خطیب داتا دربار مفتی رمضان سیالوی کے خلاف 26 لاکھ روپے فنڈز کی مبینہ وصولی کے معاملے پر فیکٹ فائنڈنگ انکوائری کا حکم دیا گیا ہے، جبکہ سابق سیکرٹری و چیف ایڈمنسٹریٹر اوقاف اور سابق ڈی جی مذہبی امور کے کردار کے تعین کے لیے بھی الگ تحقیقات شروع کرنے کی ہدایت جاری کی گئی ہے۔

سیکرٹری اوقاف ڈاکٹر احسان بھٹہ نے کہا کہ وزیراعلیٰ پنجاب مریم نواز شریف کے وژن کے مطابق محکمہ اوقاف کو بدعنوان اور نااہل عناصر سے پاک کیا جا رہا ہے، اور میرٹ، شفافیت اور محکمانہ مفاد پر کسی قسم کا سمجھوتہ نہیں کیا جائے گا۔ انہوں نے واضح کیا کہ مالی بے ضابطگیوں میں ملوث افراد کے خلاف بلاامتیاز کارروائی جاری رہے گی۔

سانحہ کاہنہ،ایک ماں دکھی ماؤں کا درد بانٹنے کاہنہ پہنچ گئی

وزیر اعلیٰ مریم نواز شریف کی کاہنہ میں جاں بحق بچوں کے دکھی والدین سے ملاقات ہوئی ہے،وزیر اعلیٰ مریم نواز نے متاثرہ والدین کا درد بانٹا، پسماندہ ماوں کو گلے لگا کر دلاسہ دیا،وزیر اعلیٰ مریم نواز شریف نے متاثرہ خاندانوں سے تعزیت اور گفتگو کی،حکومتِ پنجاب کی جانب سے سانحہ کاہنہ کے دکھی خاندانوں کی داد رسی کے لئے ہر جاں بحق بچے کے لیے 20 لاکھ اور زخمیوں کے لیے 5 لاکھ روپے مقررکئے گئے ہیں،وزیر اعلیٰ مریم نواز شریف نے سانحہ کاہنہ کے دکھی خاندانوں کو چیکس سپرد کر دیے،زخمیوں کی بہترین دیکھ بھال کی ہدایت کی،
وزیر اعلیٰ مریم نواز شریف نے متاثرین کے زخموں پر مرہم رکھا، سوگوار خاندانوں کو ہر ممکن تعاون کا یقین دلایا،وزیراعلیٰ کا کہناتھا کہ لفظ کم ہیں،غم بڑا ہے،دکھی ماؤں کے آنسوؤں کا مداوا کوئی رقم نہیں کر سکتی،ننھے پھولوں کا اس طرح بچھڑجانا دلخراش ہے،دکھی ماوں کو تنہا نہیں چھوڑیں گے،آپ کے بچوں کا غم میرا اپنا غم ہے

لاہور ( ) چودہ معصوم کلیوں کی جدائی پر شہر سوگوار ہے، ہر آنکھ اشکبار اور ہر دل غم سے نڈھال کر دیا ہے۔چودہ معصوم بچوں کے جنازے ایک ایسا دردناک منظر ہے جسے الفاظ میں بیان کرنا ممکن نہیں۔ اس غم نے صرف متاثرہ خاندانوں کو ہی نہیں بلکہ پوری قوم کو سوگوار کر دیا ہے۔ان خیالات کا اظہار معروف سیاسی سماجی رہنما ڈاکٹر سبیل اکرام نے کیا ۔انھوں نے کہا یہ واقعہ ہم سب کیلئے ایک بڑی نصیحت ہے کہ والدین اپنے بچوں کو صبح وشام کے اذکار ضرور یاد کروائیں ۔ اس سے انسان اللہ کی حفاظت میں آجاتا ہے ۔انھوں نے کہا کہ اس المناک حادثہ پر ہر ماں کی آنکھ نم اور ہر باپ کا دل کانپ اٹھا ہے اور ہر حساس انسان اس سانحے پر رنجیدہ ہے۔ بچے جنت کے پھول ہوتے ہیں۔ ان کی مسکراہٹوں سے گھر کے آنگن مہکتے ہیں، ان کی معصوم باتوں سے زندگی میں خوشیاں بکھرتی ہیں اور ان کی موجودگی والدین کے لیے اللہ تعالی کی ایک عظیم نعمت ہوتی ہے۔ لیکن جب یہی ننھے پھول اچانک بچھڑ جائیں تو گھروں کی رونقیں ماتم میں بدل جاتی ہیں ۔دعا ہے کہ اللہ جان بحق ہونے والے تمام بچوں اور بچیوں کو جنت الفردوس میں اعلی مقام عطا فرمائے، ان کی قبروں کو نور سے بھر دے اور انہیں اپنے خاص رحم و کرم کے سائے میں جگہ عطا فرمائے۔ اللہ تعالی ان کے والدین، بہن بھائیوں اور تمام لواحقین کو صبرِ جمیل عطا فرمائے اور اس عظیم سانحے کو برداشت کرنے کی ہمت نصیب فرمائے۔ ہم غمزدہ خاندانوں کے دکھ اور غم میں برابر کے شریک ہیں۔ اس افسوسناک واقعے میں زخمی ہونے والے بچوں کی جلد صحت یابی کے لیے بھی دعاگو ہیں۔ یہ سانحہ ہم سب کے لیے ایک بڑی نصیحت بھی ہے۔ والدین کو چاہیے کہ وہ اپنے بچوں کو صبح و شام کے مسنون اذکار اور دعائیں ضرور یاد کروائیں، کیونکہ جب بندہ اخلاص کے ساتھ اللہ کا ذکر کرتا اور صبح و شام کے اذکار پڑھتا ہے تو وہ اللہ تعالی کی حفاظت میں آ جاتا ہے۔زخمی بچوں کے علاج معالجہ کیلئے تمام وسائل بروئے کار لائے جائیں اور متاثرہ خاندانوں کی ہر ممکن مدد کی جائے ۔