آزاد کشمیر کی تاجر برادری نے کالعدم جوائنٹ ایکشن کمیٹی کے بیانیے کو مسترد کرتے ہوئے کہا ہے کہ شرپسند عناصر عوام میں انتشار پھیلانے میں ناکام رہے ہیں اور کاروباری طبقہ ریاست کے ساتھ کھڑا ہے۔
تاجر برادری کے نمائندوں کا کہنا تھا کہ دشمن معرکۂ حق میں ناکامی کے بعد مختلف حربے آزما کر بدامنی اور انتشار کو فروغ دینے کی کوشش کر رہا ہے، تاہم آزاد کشمیر کے عوام نے ان سازشوں کو ناکام بنا دیا ہے۔انہوں نے کہا کہ کالعدم جوائنٹ ایکشن کمیٹی کے دباؤ کے باوجود تاجروں نے اپنی دکانیں اور کاروبار معمول کے مطابق کھلے رکھے، جس سے یہ واضح پیغام گیا کہ کاروباری برادری کسی بھی قسم کے دباؤ یا خوف کو قبول نہیں کرتی۔تاجر رہنماؤں کے مطابق بعض عناصر نے نوجوانوں کے ذہنوں میں خوف و ہراس پیدا کرنے اور امن و امان کی صورتحال کو متاثر کرنے کی کوشش کی، لیکن عوام اور تاجروں کے اتحاد نے ان تمام کوششوں کو ناکام بنا دیا۔
انہوں نے اس عزم کا اظہار کیا کہ آزاد کشمیر کے غیور عوام اور تاجر برادری آئندہ بھی امن، استحکام اور ریاستی اداروں کے ساتھ تعاون کو ترجیح دیتے ہوئے ہر قسم کی انتشار انگیز سرگرمی کا مقابلہ کریں گے۔