لاہور: لاہور کی مقامی عدالت نے دو غیر ملکی خواتین کو مبینہ طور پر تاوان کے لیے اغوا کرنے اور ان سے زیادتی کے مقدمے میں گرفتار چار ملزمان کا پانچ روزہ جسمانی ریمانڈ منظور کرتے ہوئے انہیں مزید تفتیش کے لیے پولیس کے حوالے کر دیا۔
پولیس نے مقدمے میں گرفتار ملزمان رضا ڈار، حسن رضا، سکندر خان اور ساجد علی کو کینٹ کچہری میں جوڈیشل مجسٹریٹ اظہر محمود کی عدالت میں پیش کیا، جہاں کیس کی سماعت ہوئی۔سماعت کے دوران فاضل جج نے ملزمان کے چہروں سے ماسک اتروا کر ان کی حاضری مکمل کروائی۔ پراسیکیوشن نے عدالت کو بتایا کہ متاثرہ خواتین غیر ملکی شہری ہیں اور انہوں نے مرکزی ملزم رضا ڈار کو نامزد کیا ہے۔پراسیکیوٹر نے مؤقف اختیار کیا کہ واقعے سے ملک کی ساکھ متاثر ہوئی ہے اور ملزمان سے مزید تفتیش ناگزیر ہے، لہٰذا ان کا 14 روزہ جسمانی ریمانڈ دیا جائے۔فریقین کے دلائل سننے کے بعد عدالت نے فیصلہ محفوظ کیا، جسے بعد ازاں سناتے ہوئے چاروں ملزمان کا پانچ روزہ جسمانی ریمانڈ منظور کر لیا۔عدالت نے پولیس کو ہدایت کی کہ ملزمان کو 8 جولائی کو دوبارہ عدالت میں پیش کیا جائے تاکہ تفتیشی پیش رفت سے آگاہ کیا جا سکے۔