پیٹرولیم مصنوعات کی قیمتیں 170 روپے سے 200 روپے فی لیٹر تک ہونی چاہئیں۔ لاہور ہائیکورٹ میں پیٹرولیم مصنوعات کی قیمتیں کم نہ کرنے کیخلاف درخواست دائر کردی گئی۔
درخواست جوڈیشل ایکٹوزم پینل کے سربراہ محمد اظہر صدیق ایڈووکیٹ نے دائر کی، جس میں مؤقف اختیار کیا گیا کہ عالمی منڈی میں تیل سستا جبکہ پاکستان میں پیٹرول تقریباً 300 روپے فی لیٹر ہے، خام تیل 70 ڈالر فی بیرل ہے، پاکستان میں پیٹرول کی قیمت عالمی معیار سے بہت زیادہ ہے۔انہوں نے مطالبہ کیا کہ پیٹرول کی قیمت 170 سے 190 روپے اور ڈیزل کی 180 سے 200 روپے فی لیٹر ہونی چاہئے، پیٹرولیم ڈیویلپمنٹ لیوی کا نفاذ عوامی استحصال ہے۔استدعا کی گئی کہ قیمتوں کا تعین شفاف، قانونی اور آئینی اصولوں کے مطابق کیا جائے، آئل مارکیٹنگ کمپنیوں کے دباؤ پر عوام کو عالمی قیمتوں میں کمی کے فائدے سے نہیں روکا جاسکتا۔
دنیا بھر میں پیٹرول سستا، پاکستان میں قیمتیں برقرار رکھی گئیں، ریلیف کے منتظر عوام حیران و پریشان ہیں، حکومت کا اپنی جیب بھرنے کا رویہ برقرار ہے، عوام کو 40 روپے فی لیٹر تک ریلیف سے محروم کردیا گیا۔عالمی منڈی میں خام تیل مزید ساڑھے 4 فیصد سستا ہوا لیکن مہنگائی کے بوجھ تلے دبے پاکستانی عوام کو کوئی فائدہ نہیں پہنچا۔کیا حکومت پر آئل کمپنیوں کا دباؤ کام کرگیا؟، کیا آئل کمپنیوں کو دیئے گئے ریلیف کا بوجھ عوام پر ڈال دیا گیا ہے؟یاد رہے کہ تیل کمپنیوں نے گزشتہ قیمتوں میں کمی پر بھی اعتراض کیا تھا اور وزیر پیٹرولیم کو خط لکھ کر 104 ارب روپے نقصان کا دعویٰ کیا تھا۔
علاوہ ازیں وفاقی وزیر پیٹرولیم علی پرویز ملک نے عالمی مارکیٹ میں پیٹرولیم مصنوعات کی نئی قیمتیں شیئر کردیں۔سماجی رابطے کی ویب سائٹ ایکس پر جاری بیان میں کہا کسی شعبے کو ترجیح دے رہے ہیں نہ کسی پر غیر ضروری بوجھ ڈال رہے ہیں، حکومت عالمی ذمہ داریوں کے دائرے میں رہتے ہوئے عوام کو فائدہ پہنچانے کیلئے پُرعزم ہے۔علی پرویز ملک نے کہا کہ ہائی اسپیڈ ڈیزل اب تک 200 روپے اور پیٹرول 155 روپے فی لیٹر سستا کرچکے ہیں۔اس ہفتے عالمی منڈی میں پیٹرول کی پلیٹس قیمت 98 سے 91 ڈالر فی بیرل کے درمیان رہی جبکہ ہائی اسپیڈ ڈیزل کی پلیٹس قیمت 109 سے 104 ڈالر فی بیرل کے درمیان رہی۔
