اسرائیل نے امریکا سے تل ابیب کے مرکزی بن گورین ائیرپورٹ پر موجود فوجی اور ایندھن بردار طیاروں کی تعداد کم کرنے کی درخواست کر دی ہے۔
اسرائیلی میڈیا رپورٹس کے مطابق اسرائیلی حکام نے واشنگٹن سے مطالبہ کیا ہے کہ بن گورین ائیرپورٹ سے مزید امریکی ایندھن بردار اور فوجی طیارے منتقل کیے جائیں تاکہ شہری پروازوں کی روانی متاثر نہ ہو۔رپورٹس کے مطابق امریکا پہلے ہی بن گورین ائیرپورٹ سے 28 ایندھن بردار طیارے دوسری جگہ منتقل کر چکا ہے، تاہم اسرائیل نے مزید 20 فوجی طیارے بھی ہٹانے کی درخواست کی ہے۔اسرائیلی میڈیا کا کہنا ہے کہ اسرائیل نے امریکی حکام کو آگاہ کیا ہے کہ موسمِ گرما کے دوران مسافر پروازوں میں اضافے کے باعث ائیرپورٹ پر دباؤ بڑھ رہا ہے اور امریکی فوجی طیاروں کی موجودگی شہری فضائی آپریشنز میں رکاوٹ بن سکتی ہے۔
اسرائیل نے بن گورین ائیرپورٹ پر تعینات امریکی فوجی طیاروں کی تعداد میں کمی کا مطالبہ کرتے ہوئے مؤقف اختیار کیا ہے کہ مسافر پروازوں کی آمد و رفت کو ترجیح دینا ضروری ہے۔میڈیا رپورٹس کے مطابق اس معاملے پر اسرائیلی اور امریکی حکام کے درمیان سفارتی رابطے اور مشاورت جاری ہے، جبکہ طیاروں کی ممکنہ منتقلی کے حوالے سے مختلف آپشنز پر غور کیا جا رہا ہے۔