Author: ممتاز حیدر

یہودو ہنود کے گٹھ جوڑ اور ناپاک کردار پر بھارتی سیاستدانوں نے مودی کو آڑھے ہاتھوں لے لیا

بھارتی سیاستدان آنند بھدوریا نے خطے کے امن کو خراب کرنے پر مودی کے مکروہ کردار کو بے نقاب کر دیا،بھارتی سیاستدان آنند بھدوریا نے مودی پر تنقید کرتے ہوئے کہا کہ بی جے پی بتائے جب اسرائیل غزہ میں نسل کشی کر رہا تھا تو مودی کے بغیر کسی اور نے اسرائیل کا دورہ کیا۔۔۔؟مودی نے نسل کشی کرنے والے اور جنگ کے دہانے پر کھڑے ملک کا دورہ کس کے مشورے پر کیا ، ایرانی سپریم لیڈر کو سلام پیش کرتے ہیں جنہوں نے شہادت حاصل کی مگر مودی کی طرح امریکا کے سامنے گھٹنے نہیں ٹیکے، مودی نے بھارت کو امریکا کے سامنے جھکانے کا کام کیا ہے جس کو ہرگز برداشت نہیں کر سکتے ،

ماہرین کا کہنا ہے کہ مسلمانوں کی نسل کشی پر کاربند مودی اور نیتن یاہو کے گٹھ جوڑ پر بھارت کے اندر سے بھی کڑی تنقید ہو رہی ہے،نام نہاد خود مختاری کے دعویدار بھارت نے امریکا کے سامنے گھٹنے ٹیکتے ہوئے چاہ بہار سے راہ فرار اختیار کی تھی ، مودی نے اسرائیل کا دورہ اور پھر ایرانی جہاز پر حملے کیلئے خفیہ اطلاعات دے کر بھی ایران کی پیٹھ میں چھرا گھونپا ہے ، مودی کی دوغلی خارجہ پالیسی اور منافقانہ کردار پر بھارت کے اندر سے سخت سوالات اٹھ رہےہیں ،

ایرانی شاہد-136 ڈرونز نے بحرین میں امریکی پانچویں بیڑے کے ہیڈکوارٹر کو نشانہ بنایا ہے۔ واقعہ نیول سپورٹ ایکٹیویٹی بحرین، منامہ،جفیئر میں پیش آیا۔

ابتدائی رپورٹس کے مطابق کم از کم دو ڈرونز نے بیس کے اندرونی حصوں کو نشانہ بنایا، جس کے نتیجے میں دھواں اور آگ دیکھنے میں آئی۔ ابھی تک ہلاکتوں یا زخمیوں کے بارے میں سرکاری طور پر کوئی معلومات موصول نہیں ہوئی ہیں۔ایرانی ذرائع نے دعویٰ کیا ہے کہ حملے میں امریکی فوج کو بھاری نقصان پہنچا اور 21 امریکی اہلکار ہلاک ہوئے، تاہم یہ اعداد و شمار امریکی یا بحرینی حکام نے تصدیق نہیں کیے۔

گذشتہ چند گھنٹوں میں امریکی اڈے اور اثاثے متحدہ عرب امارات، کویت، بحرین، عراق اور سعودی عرب میں بھی نشانہ بنائے گئے۔ دبئی میں ایرانی ڈرون حملے کے باعث دھماکے اور دھوئیں کے ستون دیکھے گئے۔ حملہ دبئی انٹرنیشنل فنانشل سینٹر کے قریب ہوا۔ ڈرون یا اس کے ٹکڑے عمارت پر گرنے سے عمارت کی بیرونی دیوار کو معمولی نقصان پہنچا، لیکن کوئی جانی نقصان رپورٹ نہیں ہوا۔

ایرانی رہنما آیت اللہ مجتبیٰ خامنہ ای نے کہا کہ وہ حالیہ امریکی اور اسرائیلی حملوں میں ہلاک ہونے والے ایرانیوں کا بدلہ لیں گے اور خلیج کے عرب ممالک پر زور دیا کہ وہ اپنی سرزمین پر امریکی اڈے بند کریں۔

سعودی عرب کی فضائی دفاعی نظام نے اطلاع دی کہ ایرانی ڈرونز کو متعدد لہروں میں مار گرایا گیا۔ عمان میں دو افراد ہلاک ہوئے جب ڈرون صنعتی علاقے میں گر گئے۔

مشرقِ وسطیٰ میں بڑھتی ہوئی کشیدگی کے دوران امریکا نے برطانیہ کے اہم فوجی اڈے فیئر فورڈ ایئر بیس پر اپنے مزید اسٹریٹجک بمبار طیارے تعینات کر دیے ہیں، جس کے بعد ایران کے خلاف بڑے فضائی حملوں کے خدشات بڑھ گئے ہیں۔امریکی وزیر دفاع کی جانب سے آج رات ایران کے خلاف بڑی کاروائی کے بیان سے واضح ہوتا ہے کہ آج امریکہ کی جانب سے ان طیاروں سے حملہ کیا جائے گا

اطلاعات کے مطابق آج مزید 3 امریکی B-52 اسٹریٹجک بمبار اس اڈے پر پہنچے ہیں۔ اس وقت اس بیس پر مجموعی طور پر 6 B-52 Stratofortress اور 12 B-1B Lancer بمبار موجود ہیں، جو طویل فاصلے تک بھاری ہتھیار لے جانے کی صلاحیت رکھتے ہیں اور بڑے پیمانے پر فضائی حملوں کے لیے استعمال ہوتے ہیں۔دفاعی تجزیہ کاروں کا کہنا ہے کہ یہ تعیناتی ایسے وقت میں کی گئی ہے جب امریکا اور اسرائیل کی جانب سے ایران کے خلاف جاری فضائی کارروائیاں شدت اختیار کر رہی ہیں۔ حالیہ دنوں میں امریکی حکام نے ایران کے اندر حملوں کو “جنگ کا سب سے شدید مرحلہ” قرار دیا ہے۔

واضح رہے کہ 
امریکی وزیر دفاع پیٹ ہیگسیتھ نے میڈیا بریفنگ میں کہا ہے کہ ایران کے فضائی دفاعی نظام کو شدید نقصان پہنچ چکا ہے اور جنگ کے دوران مزید سخت حملے کیے جائیں گے۔انہوں نے کہا کہ امریکا اپنی کارروائیاں روکنے کا ارادہ نہیں رکھتا اور آج ایران پر حملوں کا سب سے سخت دن ہو سکتا ہے۔ ان کے مطابق ایرانی حکومت کے اہم رہنما زیر زمین پناہ گاہوں میں چلے گئے ہیں۔‎اس موقع پر امریکی چیئرمین جوائنٹ چیفس آف اسٹاف نے کہا کہ ایران پر فوجی کارروائیوں کو آج چودہ دن مکمل ہو گئے ہیں اور آج کے حملے شدت کے اعتبار سے اب تک کے سب سے بڑے حملے ہوں گے۔‎انہوں نے مزید بتایا کہ دو ہفتوں سے بھی کم عرصے میں امریکی کارروائیوں کے نتیجے میں ایرانی بحریہ کو بڑی حد تک غیر فعال کر دیا گیا ہے۔ تاہم ان کا کہنا تھا کہ ایران کے پاس اب بھی اتنی صلاحیت موجود ہے کہ وہ خطے میں موجود اتحادی افواج اور تجارتی جہازوں کو نقصان پہنچا سکتا ہے۔

امریکی فضائیہ کے KC‑135 ٹینکرز اسرائیل کے شہر تل ابیب اور سعودی عرب کے پرنس سلطان ایئر بیس میں لڑاکا اور نگرانی کرنے والے طیاروں کو فضا میں ایندھن فراہم کر رہے ہیں۔

فضائی ٹریکنگ ڈیٹا کے مطابق یہ ٹینکر طیارے امریکی فضائی مشنز کی مدد کر رہے ہیں تاکہ جنگی طیارے اور جاسوس طیارے طویل وقت تک ایران کے قریب فضائی گشت اور آپریشن جاری رکھ سکیں۔ ماہرین کے مطابق فضائی ری فیولنگ کسی بھی جدید فضائی جنگ میں بنیادی کردار ادا کرتی ہے کیونکہ اس کے ذریعے طیاروں کو زمین پر واپس آئے بغیر دوبارہ ایندھن فراہم کیا جا سکتا ہے۔فوجی تجزیہ کاروں کے مطابق KC-135 طیارے بنیادی طور پر لڑاکا طیاروں، ڈرونز اور نگرانی کرنے والے طیاروں کو فضا میں ایندھن فراہم کرتے ہیں۔ اس سے نہ صرف طیاروں کی پرواز کا دورانیہ کئی گنا بڑھ جاتا ہے بلکہ وہ زیادہ فاصلے تک حملے یا نگرانی کے مشن بھی انجام دے سکتے ہیں۔

تجزیہ کاروں کا کہنا ہے کہ سعودی عرب کے شہزاد ہ سلطان ایئر بیس پر امریکی فضائیہ کی سرگرمیوں میں حالیہ ہفتوں میں واضح اضافہ ہوا ہے۔ اس اڈے کو مشرقِ وسطیٰ میں امریکی فضائی آپریشنز کے اہم مراکز میں شمار کیا جاتا ہے، جہاں سے مختلف جنگی اور معاون طیارے خطے میں تعینات کیے جاتے ہیں۔

مشرقِ وسطیٰ میں بڑھتی ہوئی کشیدگی کے باعث دبئی کی رئیل اسٹیٹ مارکیٹ کو شدید دھچکا لگنے کا خدشہ ظاہر کیا جا رہا ہے۔ تازہ معاشی تجزیوں کے مطابق اگر خطے میں جاری تنازعات طویل ہو گئے تو 2026 کے آخر تک دبئی میں جائیدادوں کی قیمتیں 60 سے 70 فیصد تک گر سکتی ہیں۔

رپورٹس کے مطابق رئیل اسٹیٹ مارکیٹ انڈیکس پہلے ہی تقریباً 20 فیصد تک گر چکا ہے جس کے نتیجے میں 2025 کے دوران ہونے والا تقریباً تمام قیمتوں کا اضافہ ختم ہو گیا ہے۔ ماہرین کا کہنا ہے کہ موجودہ غیر یقینی صورتحال کے باعث ممکنہ خریدار ایسی جائیدادوں میں سرمایہ کاری سے گریز کر رہے ہیں جن کی قیمت آنے والے مہینوں میں مزید 30 سے 50 فیصد تک کم ہو سکتی ہے۔تجزیہ کاروں کے مطابق اگر مشرقِ وسطیٰ میں جنگ یا کشیدگی طویل عرصے تک جاری رہی تو موسمِ گرما 2026 تک دبئی میں پراپرٹی کی قیمتیں کم از کم 50 فیصد تک گر سکتی ہیں جبکہ طویل جنگ کی صورت میں یہ کمی 60 سے 70 فیصد تک پہنچنے کا امکان ہے۔

رپورٹ میں یہ بھی دعویٰ کیا گیا ہے کہ دبئی سے بڑی تعداد میں سرمایہ کار اپنا سرمایہ دوسرے ممالک منتقل کر رہے ہیں۔ مشرقی ایشیا کے سرمایہ کاروں نے سرمایہ کاری کا رخ سنگا پور اور ہانگ کانگ کی جانب موڑ دیا ہے جبکہ یورپی اور روسی سرمایہ کار تھائی لینڈ،ترکی میں متبادل مواقع تلاش کر رہے ہیں۔ماہرین کے مطابق دبئی کی لگژری رئیل اسٹیٹ مارکیٹ، جو ماضی میں غیر ملکی سرمایہ کاروں، سیاحوں اور ہائی اینڈ خدمات کی طلب پر انحصار کرتی تھی، اب شدید دباؤ کا شکار ہے۔ کئی سرمایہ کار تیزی سے اپنی جائیدادیں کم قیمت پر فروخت کر کے مارکیٹ سے نکلنے کی کوشش کر رہے ہیں۔

جیوپولیٹیکل خطرات، میزائل حملوں کے خدشات اور خلیجی خطے میں اہم بحری گزرگاہ آبنائے ہرمز کی ممکنہ بندش نے سرمایہ کاروں کے اعتماد کو شدید متاثر کیا ہے۔ تجزیہ کاروں کا کہنا ہے کہ ان عوامل کے باعث دبئی کو اب ایک نسبتاً پرخطر سرمایہ کاری کے علاقے کے طور پر دیکھا جا رہا ہے۔معاشی ماہرین کے مطابق اگرچہ جنگ جلد ختم بھی ہو جائے تو بھی دبئی کی رئیل اسٹیٹ مارکیٹ کو سابقہ سطح پر واپس آنے میں طویل وقت لگ سکتا ہے۔ ایران اور سعودی عرب کے قریب جغرافیائی محلِ وقوع کے باعث اس شہر کی سلامتی اور معاشی استحکام کے بارے میں خدشات مزید بڑھ گئے ہیں۔

ایران کے کلسٹر بموں نے صیہونی دارالحکومت کو آگ کے گولوں میں بدل دیا،ایرانی کلسٹر میزائل نے تل ابیب میں متعدد مقامات کو نشانہ بنایا ہے، ایرانی حملوں سے تل ابیب میں متعدد مقامات پر آگ بھڑک اٹھی،ہر طرف چیخیں، خوف کی فضا،گاڑیاں جل رہی، آگ کے شعلے آسمان تک بلند ہوتے دکھائی دیئے

اسرائیلی حکام کے مطابق ایرانی ہتھیاروں کے گرنے والے ملبے کے باعث تل ابیب کے دو نواحی علاقوں میں آگ لگ گئی، جس کے بعد فائر بریگیڈ اور ریسکیو ٹیموں کو فوری طور پر موقع پر روانہ کیا گیا،میڈیا رپورٹس کے مطابق سوشل میڈیا پر سامنے آنے والی ویڈیوز اور جغرافیائی تصدیق سے معلوم ہوا ہے کہ تل ابیب کے مغرب میں واقع شہر شوام میں ایک بڑی آگ بھڑک اٹھی۔ ویڈیو میں دیکھا جا سکتا ہے کہ آگ کے شعلے بلند ہو رہے ہیں اور ریسکیو اہلکار آگ پر قابو پانے کی کوشش کر رہے ہیں۔اسی طرح تل ابیب کے جنوب میں واقع نواحی علاقے رشون لیزیون میں بھی کئی گاڑیوں کو آگ لگنے کی اطلاعات ملی ہیں۔ ایک ویڈیو میں سڑک کے کنارے کھڑی متعدد گاڑیوں کو جلتے ہوئے دیکھا گیا، جس کے بارے میں اسرائیلی حکام کا کہنا ہے کہ یہ آگ میزائل روکنے کے بعد گرنے والے ملبے کی وجہ سے لگی۔

اسرائیلی پولیس کے ترجمان کے مطابق فائر فائٹرز اور ریسکیو ٹیمیں شوہم میں جائے وقوعہ پر پہنچ کر آگ بجھانے اور ممکنہ طور پر ملبے تلے پھنسے افراد کی تلاش میں مصروف ہیں۔ اسی طرح ریشون لی زیون میں بھی فائر بریگیڈ کی ٹیمیں گاڑیوں میں لگی آگ پر قابو پانے کی کوشش کر رہی ہیں۔پولیس کے ایک اور ترجمان کا کہنا ہے کہ اسرائیل کے وسطی علاقوں میں کئی مقامات پر میزائلوں کے ملبے گرنے کی اطلاعات کے بعد بم ڈسپوزل یونٹس اور فائر فائٹرز کو تعینات کر دیا گیا ہے۔

اس سے قبل سوشل میڈیا پر جاری ویڈیوز میں رات کے وقت اسرائیلی فضاء میں متعدد روشن نارنجی چنگاریاں دیکھی گئیں، جن کے بارے میں خیال ظاہر کیا جا رہا ہے کہ یہ کلسٹر میونیشن سے لیس میزائلوں کے ذیلی حصے تھے۔ ماہرین کے مطابق ایران حالیہ حملوں میں کلسٹر ہتھیاروں کا استعمال کر کے اسرائیل کے جدید فضائی دفاعی نظام کو چکمہ دینے کی کوشش کر رہا ہے۔

واشنگٹن: امریکی محکمہ دفاع (پینٹاگون) نے مشرقِ وسطیٰ میں ایک میرین ایکسپیڈیشنری یونٹ تعینات کرنے کا فیصلہ کیا ہے۔ اس پیش رفت سے باخبر تین امریکی حکام نے امریکی نشریاتی ادارے کو بتایا کہ یہ یونٹ ہنگامی حالات میں فوری ردِعمل دینے والی فورس ہوتی ہے۔

حکام کے مطابق میرین ایکسپیڈیشنری یونٹ عام طور پر تقریباً 2500 میرینز اور بحریہ کے اہلکاروں پر مشتمل ہوتی ہے، جو سمندر اور خشکی دونوں محاذوں پر کارروائی کی صلاحیت رکھتے ہیں۔ تاہم ابھی تک یہ واضح نہیں کیا گیا کہ اس یونٹ کو کس مقصد کے لیے استعمال کیا جائے گا یا اسے خطے میں کس مقام پر تعینات کیا جائے گا۔فوجی ماہرین کے مطابق ایسے یونٹس ماضی میں بڑے پیمانے پر انخلا کی کارروائیوں، سمندر سے خشکی تک فوجی آپریشنز، چھاپہ مار کارروائیوں اور حملوں کے لیے استعمال ہوتے رہے ہیں۔ اس کے علاوہ ان یونٹس میں زمینی اور فضائی جنگی دستے بھی شامل ہوتے ہیں، جبکہ بعض دستوں کو خصوصی آپریشنز کے لیے بھی تربیت دی جاتی ہے۔ذرائع کا کہنا ہے کہ اس یونٹ کی تعیناتی سے امریکی فوجی کمانڈرز کو خطے میں پیدا ہونے والی مختلف ہنگامی صورتحال سے نمٹنے کے لیے مزید آپشنز دستیاب ہو جائیں گے۔

دوسری جانب امریکی صدر ٹرمپ کی انتظامیہ کے حکام اس سے پہلے یہ کہہ چکے ہیں کہ فی الحال متعلقہ ملک میں امریکی زمینی فوج بھیجنے کا کوئی منصوبہ نہیں، تاہم انہوں نے اس امکان کو مکمل طور پر مسترد بھی نہیں کیا۔امریکی اخبار دی وال سٹریٹ جرنل نے سب سے پہلے اس تعیناتی کی خبر رپورٹ کی تھی، جس کے بعد خطے میں جاری کشیدگی کے تناظر میں اس فیصلے کو اہم قرار دیا جا رہا ہے۔