بھارتی اندرونی اختلافات،کسی بھی وقت ٹوٹ کر چھوٹی ریاستوں میں‌ تقسیم ہو سکتا،سیکیورٹی ذرائع کی بریفنگ

راولپنڈی میں سیکیورٹی سے متعلق ایک اہم بریفنگ کا انعقاد کیا گیا، جس میں ملک بھر سے سینئر صحافیوں اور ڈیجیٹل میڈیا سے وابستہ افراد اور دفاعی امور سے وابستہ بڑے پلیٹ فارمز کے نمائندوں نے شرکت کی۔بریفنگ کا موضوع معمول کے طے شدہ ایجنڈوں سے مختلف تھا۔ بریفنگ میں داخلی سلامتی، سیاسی و سفارتی معاملات یا ادارہ جاتی امور پر گفتگو نہیں کی گئی، بلکہ پوری بریفنگ کا مرکز بھارت اور خطے میں اس کے بالادستی قائم کرنے کے مبینہ عزائم تھے۔

بریفنگ میں یہ کہا گیا کہ بھارت ایک ناکام اور ناقابلِ عمل ریاست ہے، جو اپنی بنیادی سماجی ساخت، آبادی، آئینی تشکیل اور دفاعی اداروں میں بڑھتی ہوئی ہندو قوم پرستی کا فروغ سوچ کے باعث ناقابلِ مصالحت اختلافات کا شکار ہے، اور کسی بھی وقت چھوٹی ریاستوں میں تقسیم ہونے کی جانب بڑھ سکتا ہے۔بریفنگ میں یہ بھی مؤقف اختیار کیا گیا کہ پاکستان خطے کے دیگر ممالک کے ساتھ مل کر بھارت کے مبینہ بالادستانہ عزائم اور توسیع پسندانہ سوچ کا مقابلہ کرنے میں قائدانہ کردار ادا کرے گا۔جہاں پاکستان ایک پراعتماد اور ابھرتی ہوئی ریاست کے طور پر آگے بڑھ رہا ہے، وہیں بھارت بتدریج زوال اور انتشار کے راستے پر گامزن دکھائی دیتا ہے،مذہبی تقسیم، ذات پات، شناختی سیاست اور علاقائی تنازعات بھارت کے قومی اتحاد کو مسلسل کمزور کر رہے ہیں پاکستان کے عالمی کردار میں بہتری کے مقابلے میں بھارت کو اپنے داخلی تضادات چھپانا مشکل ہو گیا ہے۔

یہ نہایت مضحکہ خیز ہے کہ بھارت، جس کا اپنا ریکارڈ مذہبی اقلیتوں، مسلمانوں، مسیحیوں، سکھوں، دلتوں اور دیگر طبقات کے خلاف امتیازی سلوک اور ریاستی سرپرستی میں مظالم سے بھرا ہوا ہے، پاکستان کو نصیحت کر رہا ہے۔بھارت کو دوسروں پر انگلی اٹھانے کے بجائے اپنے اندرونی حالات کا سامنا کرنا چاہیے، جہاں بی جے پی حکومت کے تحت مسلمانوں اور دیگر مذہبی برادریوں کو تشدد، عبادت گاہوں پر حملوں، امتیازی قوانین، ماورائے عدالت مسماریوں، نفرت انگیز تقاریر اور ریاستی اداروں کے غلط استعمال کا سامنا ہے۔

پاکستان میں پیش آنے والا واقعہ انتظامی نوعیت کا تھا، نہ کوئی ہجوم گردوارہ مسمار کر رہا تھا اور نہ اسے حکومت کی سرپرستی حاصل تھی۔ چند افراد کے انفرادی عمل پر قانون اپنا راستہ اختیار کر رہا ہے۔بھارت کو چاہیے کہ مسلمانوں، مسیحیوں، دلتوں، سکھوں، آدیواسیوں اور دیگر اقلیتوں کے بنیادی حقوق کے تحفظ کیلئے فوری، قابلِ اعتماد اور قابلِ تصدیق اقدامات کرے۔نئی دہلی اپنی اندرونی کمزوریوں کو دور کرنے کے بجائے مسلسل پاکستان کے خلاف محاذ آرائی میں مصروف رہتا ہے تاکہ عوام کی توجہ داخلی مسائل سے ہٹائی جا سکے، بھارت اس وقت اندرونی طور پر شدید کھوکھلا ہو چکا ہے اور وہ ایک ناکام ریاست بننے کے دہانے پر ہے۔بھارت کے موجودہ اندرونی تضادات اور بحران اس نہج پر پہنچ چکے ہیں کہ وہ کسی بھی وقت ٹوٹ کر چھوٹی چھوٹی ریاستوں میں تقسیم ہو سکتا ہے۔