Blog

تہران: ترجمان ایرانی وزارت خارجہ اسماعیل بقائی نے کہا ہے کہ ایران امریکی تجاویزپرغور کر رہا ہے جب کسی حتمی نتیجے پر پہنچیں گے تو اس کا اعلان کریں گے۔

ایک بیان میں اسماعیل بقائی نے کہا کہ دشمن کی جمعرات کی رات کی کارروائی بین الاقوامی قوانین اور جنگ بندی کی کھلی خلاف ورزی تھی، ایرانی افواج اپنی تمام تر صلاحیتوں کے ساتھ مکمل طور پرتیار ہیں اور صورتحال پر قریبی نظررکھے ہوئے ہیں۔انہوں نے مزید کہا کہ ایران امریکی تجاویزپرغور کر رہا ہے جب کسی حتمی نتیجے پر پہنچیں گے تو اس کا اعلان کریں گے، ہم اپنا کام کر رہے ہیں اور کسی ڈیڈ لائن پر کوئی توجہ نہیں دیتے۔

دوسری جانب ا یران کے جزیرہ خارگ سے تیل کے اخراج کی اطلاع، امریکی اخبار نیو یارک ٹائمز نے سیٹلائٹ تصاویر کے حوالے سے رپورٹ جاری کردی،امریکی اخبار کا کہنا ہے کہ ایران کے تیل کی برآمد کے اہم ٹرمینل سے جزیرہ خارگ کے ساحل پر تیل پھیل رہا ہے،فوری طور پر تیل کے اخراج کی وجہ معلوم نہیں ہوسکی،تیل کے اخراج پر نظر رکھنے والے Orbital EOS کے مطابق، تیل 52 مربع کلومیٹر سعودی عرب کے پانیوں کی طرف پھیلتا ہوا دکھائی دے رہا ہے،جزیرہ خارگ میں ایران کا سب سے بڑا آئل ٹرمینل، آئل پائپ لائنز، اسٹوریج ٹینک اور متعلقہ انفرااسٹرکچر قائم ہے۔

سفارت خانہ پاکستان میں معرکۂ حق کی تاریخی فتح کا ایک سال مکمل ہونے پر ایک پروقار اور شاندار تقریب کا انعقاد کیا گیا، جس میں پاکستانی کمیونٹی نے بھرپور جوش و جذبے کے ساتھ شرکت کی۔

تقریب کے دوران “پاکستان ہمیشہ زندہ باد” کے فلک شگاف نعروں اور ملی نغموں نے شرکاء کے جذبات کو گرما دیا جبکہ بنیان مرصوص کے جذبے کی یاد تازہ ہوگئی۔ شرکاء نے وطن عزیز کے تحفظ، سالمیت اور قومی وقار کے لیے کسی بھی قربانی سے دریغ نہ کرنے کے عزم کا اعادہ کیا۔اس موقع پر امریکا میں پاکستان کے سفیر رضوان سعید شیخ نے خطاب کرتے ہوئے کہا کہ قائداعظم محمد علی جناحؒ کی دوراندیش قیادت نے پاکستان کے عالمی اہمیت کے حامل ملک بننے کی پیش گوئی بہت پہلے کردی تھی۔ انہوں نے کہا کہ تاریخ نے ثابت کیا ہے کہ پاکستان کی سلامتی دراصل دنیا کے امن و سلامتی سے جڑی ہوئی ہے۔

تقریب میں مختلف شعبہ ہائے زندگی سے تعلق رکھنے والے پاکستانیوں نے شرکت کی اور قومی یکجہتی، استحکام اور ترقی کے لیے اپنی حمایت کا اظہار کیا۔ شرکاء کا کہنا تھا کہ بیرون ملک مقیم پاکستانی ہمیشہ اپنے وطن کے دفاع اور وقار کے لیے متحد رہیں گے۔

برطانیہ کی حکمران جماعت لیبر پارٹی کو حالیہ بلدیاتی انتخابات میں خراب کارکردگی کے بعد شدید سیاسی بحران کا سامنا ہے، جبکہ وزیرِ اعظم کیئر اسٹارمر پر مستعفی ہونے کے مطالبات میں اضافہ ہو رہا ہے۔

بلدیاتی انتخابات کے نتائج میں لیبر پارٹی کو کئی اہم علاقوں میں غیر متوقع نقصان اٹھانا پڑا، خاص طور پر ان حلقوں میں جو طویل عرصے سے پارٹی کے مضبوط گڑھ سمجھے جاتے تھے۔ انگلینڈ کے بلدیاتی انتخابات میں حکمراں لیبر پارٹی کو بھاری نقصان، ریفارم 1350 سے زائد سیٹیں حاصل کر کے پہلے نمبر پر ہے،انتخابی نتائج کے مطابق لیبر پارٹی انگلینڈ میں 868 سیٹوں کے سا تھ دوسرے نمبر ہے، جبکہ ریفارم یوکے نے شمالی انگلینڈ میں بڑی کامیابیاں حاصل کی ہیں،ہارٹل پول میں ریفارم یوکے نے تمام 12 نشستیں جیت لیں، میڈیا رپورٹ کے مطابق کیئر اسٹارمر کی قیادت پر مزید سوال اٹھ گئے ہیں،لیبر کے کئی مضبوط گڑھ ریفارم یوکے کے ہاتھوں سے نکل گئے، جوناتھن بریش نے کیئر اسٹارمر سے استعفے کا مطالبہ کردیا،ہیلٹن میں ریفارم یوکے نے 15 نشستیں اپنے نام کرلیں، Wigan میں لیبر کو بیس نشستوں کا نقصان ہوا، جبکہ ریفارم کو 23 نشستیں مل گئیں۔

بلدیاتی انتخابات کے بعد ریفارم یوکے نے نمایاں کامیابیاں حاصل کر کے سیاسی منظرنامے کو ہلا کر رکھ دیا ہے۔میڈیا رپورٹس کے مطابق لیبر پارٹی کے متعدد ارکانِ پارلیمنٹ، ٹریڈ یونین رہنما اور سینئر شخصیات پارٹی قیادت میں تبدیلی پر کھل کر بحث کر رہے ہیں۔ پارٹی کے اندر بڑھتی بے چینی نے وزیرِ اعظم کیئر اسٹارمر کی سیاسی پوزیشن کو مزید کمزور کر دیا ہے۔ادھر ڈاؤننگ اسٹریٹ نے واضح کیا ہے کہ کیئر اسٹارمر بدستور وزیرِ اعظم رہیں گے اور قیادت کی تبدیلی سے متعلق قیاس آرائیوں کو مسترد کر دیا ہے۔ حکومتی ترجمان کے مطابق حکومت عوامی مسائل کے حل اور معاشی استحکام پر توجہ مرکوز کیے ہوئے ہے۔

چین نے ایک ایسا اسٹیلتھ فائٹر تیار کیا ہے جو صرف اپنی افواج کے لیے نہیں بلکہ ان غیر ملکی خریداروں کے لیے بھی ہے جو مغربی جنگی طیاروں کے مقابلے میں سستا متبادل چاہتے ہیں۔ یہ طیارہ پانچویں نسل کے J-35 ملٹی رول اسٹیلتھ فائٹر کا ایک برآمدی (ایکسپورٹ) ورژن ہے، جسے اب امریکی ساختہ F-35 لائٹننگ II کے براہِ راست حریف کے طور پر پیش کیا جا رہا ہے۔ پاکستان اس کا پہلا ممکنہ خریدار بن سکتا ہے۔

یہ پیش رفت ایک اہم وقت پر سامنے آئی ہے، تقریباً ایک سال بعد جب آپریشن سندور کے بعد بھارت اور پاکستان کے درمیان شدید فضائی جھڑپیں دیکھنے میں آئی تھیں۔اس سے پہلے J-35A کی جھلک صرف پیرس ایئر شو میں ایک ماڈل کی صورت میں دیکھی گئی تھی، لیکن نئی تصاویر سے ظاہر ہوتا ہے کہ چین اب پروٹوٹائپ مرحلے سے آگے بڑھ چکا ہے۔ چینی سرکاری ٹی وی چینل نے حال ہی میں ایک مکمل تیار شدہ طیارے (سیریل نمبر 001) کی ویڈیو نشر کی، جو “2026 یومِ مزدور خصوصی پروگرام” کے دوران ہینگر سے باہر آتا دکھایا گیا۔

اس طیارے پر چینی فضائیہ کے نشانات کے بجائے ایوی ایشن انڈسٹری کارپوریشن آف چائنا کی برانڈنگ موجود تھی، جو اس کے برآمدی کردار کی نشاندہی کرتی ہے۔ ساؤتھ چائنا مارننگ پوسٹ کے مطابق یہ پہلا موقع ہے جب مکمل جنگی صلاحیت رکھنے والا برآمدی ورژن، جسے J-35AE کہا جا رہا ہے، عوام کے سامنے مکمل شکل میں پیش کیا گیا ہے۔J-35 پروگرام چین کی جانب سے J-20 کے بعد پانچویں نسل کا دوسرا اسٹیلتھ فائٹر متعارف کرانے کی کوشش ہے۔ اسے شینیانگ ایئرکرافٹ کارپوریشن نے تیار کیا ہے، جس میں دو انجن، اندرونی ہتھیار رکھنے کی صلاحیت، اور جدید ریڈار و انفراریڈ سسٹمز شامل ہیں۔

زمین سے آپریٹ ہونے والا J-35A پہلی بار نومبر 2024 میں ژوہائی ایئر شو میں پیش کیا گیا تھا، جو پیپلز لبریشن آرمی ایئر فورس کے لیے ڈیزائن کیا گیا ہے، جبکہ بنیادی J-35 ورژن بحریہ کے لیے طیارہ بردار جہازوں پر استعمال کے لیے تیار کیا گیا ہے۔ چینی سرکاری میڈیا کا دعویٰ ہے کہ فوج پہلے ہی J-35 فیملی کے 57 طیارے استعمال کر رہی ہے۔برآمدی ورژن J-35AE کی کارکردگی مقامی ورژن جیسی ہونے کی توقع ہے، اگرچہ چین نے اس کی مکمل تکنیکی تفصیلات جاری نہیں کیں۔ رپورٹس کے مطابق اس کی زیادہ سے زیادہ رفتار تقریباً Mach 1.8 ہے اور یہ AESA ریڈار سے لیس ہے جو بیک وقت کئی اہداف کو نشانہ بنا سکتا ہے۔

اسلحے کے لحاظ سے یہ طیارہ اندرونی خانوں میں PL-15 جیسے ایئر ٹو ایئر میزائل لے جا سکتا ہے تاکہ اسٹیلتھ صلاحیت برقرار رہے، جبکہ ضرورت پڑنے پر بیرونی ہتھیار بھی نصب کیے جا سکتے ہیں۔ اس میں جدید ٹارگٹنگ ٹیکنالوجی، بشمول الیکٹرو آپٹیکل سسٹم، بھی شامل ہے جو لڑائی میں درستگی اور بقا کی صلاحیت کو بہتر بناتا ہے۔

چین کئی برسوں سے J-35 کو F-35 کے سستے متبادل کے طور پر پیش کر رہا ہے، جس کی قیمت 35 سے 80 ملین ڈالر فی طیارہ بتائی جاتی ہے۔ پیداوار کے حوالے سے بھی بڑے دعوے کیے گئے ہیں، جن کے مطابق ہر 72 گھنٹوں میں ایک نیا طیارہ تیار کیا جا سکتا ہے۔اگرچہ چین کا دعویٰ ہے کہ کئی ممالک اس طیارے میں دلچسپی رکھتے ہیں، لیکن ابھی تک کسی ملک نے باضابطہ معاہدہ نہیں کیا۔ تاہم J-35AE کی نمائش کے بعد صورتحال بدل سکتی ہے، اور رپورٹس کے مطابق پاکستان اس کا سب سے مضبوط امیدوار ہے۔اسلام آباد کی جانب سے اشارے ملے جلے مگر مسلسل رہے ہیں۔ 2024 کے اوائل میں پاک فضائیہ کے سربراہ ظہیر صدیقو نے اس طیارے میں دلچسپی ظاہر کی تھی، جبکہ سال کے آخر تک 40 طیاروں کی خریداری کی منظوری کی خبریں بھی سامنے آئیں۔ 2025 میں پاکستانی پائلٹس کی چین میں تربیت کی رپورٹس بھی آئیں، اور بعد ازاں اعلان کیا گیا کہ آئندہ دو سال میں J-35A کو فضائیہ میں شامل کیا جا سکتا ہے۔

چین کی جانب سے مکمل برآمدی ماڈل کی نمائش اور تربیت کے عمل کے آغاز کے بعد پاکستان اب بھی سب سے آگے نظر آتا ہے۔ اگر معاہدہ طے پا گیا تو اس میں 40 تک طیارے اور اضافی اثاثے، جیسے KJ-500 ائیر بورن ارلی وارننگ اینڈ کنٹرول طیارے، شامل ہو سکتے ہیں، جبکہ ترسیل کا آغاز 2026 کے آخر یا 2027 میں متوقع ہے.

امریکا کے صدارتی دفتر وائٹ ہاؤس میں قیمتی کٹلری اور کھانے کے برتنوں کی مسلسل گمشدگی نے انتظامیہ کو تشویش میں مبتلا کر دیا۔ وائٹ ہاؤس کے چیف بٹلر ایڈون پی مارکھم کی جانب سے جاری کیے گئے ایک داخلی میمو میں انکشاف کیا گیا ہے کہ بڑی تعداد میں چمچ، کانٹے، چھریاں اور دیگر اشیا لاپتا ہو چکی ہیں۔

یکم مئی 2026 کو جاری کیے گئے میمو کے مطابق 29 اپریل کو ہونے والی انوینٹری میں معلوم ہوا کہ تقریباً 10 فیصد مجاز اشیا اپنی جگہ سے غائب ہیں اور ان کا سراغ نہیں مل سکا۔میمو میں بتایا گیا کہ 148 ڈنر فورکس، 96 سلاد فورکس، 119 چائے کے چمچ، 84 ڈنر نائف، 63 بٹر نائف اور متعدد قیمتی سلور سرونگ آئٹمز لاپتا ہیں۔ اس کے علاوہ کافی کپ، ساسرز، وائن گوبلٹس اور شیمپین فلُوٹس بھی غائب پائے گئے۔انتظامیہ کے مطابق سب سے زیادہ تشویشناک صورتحال سلاد فورکس کی ہے، جو دو مرتبہ مکمل طور پر ختم ہو گئے۔ ایک موقع پر متبادل ایئر فورس ون سے سلاد فورکس منگوانے پڑے جبکہ دوسری بار مقامی اسٹور سے پلاسٹک فورکس خرید کر کام چلایا گیا۔

میمو میں طنزیہ انداز میں کہا گیا کہ یہ واضح نہیں کہ اشیا کو یادگار کے طور پر جیب میں ڈالا جا رہا ہے، غلطی سے ذاتی درازوں میں منتقل کیا جا رہا ہے یا کچھ افراد نے “عوامی خدمت” کو “مفت گھریلو سامان” سمجھ لیا ہے۔وائٹ ہاؤس انتظامیہ نے تمام عملے کو ہدایت کی ہے کہ فوری طور پر کسی بھی غیر واضح کمی کی رپورٹ کریں، برتنوں کو منظور شدہ مقامات سے باہر نہ لے جائیں اور اگر کسی کے پاس وائٹ ہاؤس کی کوئی چیز موجود ہے تو اسے واپس کر دیا جائے۔میمو کے اختتام پر سخت الفاظ میں کہا گیا کہ “یہ سب اب فوری طور پر بند ہونا چاہیے۔”