لودھراں: بیوٹی پارلر میں قتل ہونے والی لڑکی سپردِ خاک، مقدمہ درج

لودھراں میں گزشتہ روز بیوٹی پارلر میں فائرنگ سے جاں بحق ہونے والی لڑکی کی نمازِ جنازہ ادا کر دی گئی، جس کے بعد اسے آہوں اور سسکیوں میں سپردِ خاک کر دیا گیا۔

پولیس کے مطابق افسوسناک واقعہ اُس وقت پیش آیا جب لڑکی اپنی شادی کی تیاریوں کے سلسلے میں بیوٹی پارلر میں موجود تھی۔ بتایا گیا ہے کہ شادی سے صرف ایک گھنٹہ قبل اس کے کزن نے پارلر میں داخل ہو کر فائرنگ کر دی، جس کے نتیجے میں لڑکی موقع پر ہی دم توڑ گئی۔پولیس کا کہنا ہے کہ ملزم نے واردات کے فوراً بعد خود پر بھی چھری سے وار کیے، جس سے وہ شدید زخمی ہو گیا۔ ملزم کو فوری طور پر اسپتال منتقل کیا گیا جہاں وہ زیرِ علاج ہے، تاہم اس کی حالت تشویش ناک بتائی جا رہی ہے۔

واقعے کے بعد علاقے میں شدید غم و غصہ پایا جا رہا ہے جبکہ اہلِ خانہ پر کہرام مچا ہوا ہے۔ پولیس نے مقدمہ درج کرتے ہوئے ملزم، اس کے والد سمیت 4 افراد کو نامزد کر لیا ہے۔پولیس حکام کے مطابق واقعے کی مختلف پہلوؤں سے تفتیش جاری ہے اور ملوث افراد کو قانون کے مطابق سخت سزا دلائی جائے گی۔