پنجاب میں سیلاب، کشمیر میں انتخابی وعدے؛ ن لیگ عوام کو جواب دے، پلوشہ خان

پاکستان پیپلزپارٹی کی مرکزی رہنما سینیٹر پلوشہ خان نے مسلم لیگ (ن) کو شدید تنقید کا نشانہ بناتے ہوئے کہا ہے کہ پنجاب کے عوام سیلاب کی تباہ کاریوں کا سامنا کر رہے ہیں، جبکہ ن لیگ کو اس وقت کشمیر میں انتخابی وعدے یاد آ رہے ہیں۔

اپنے بیان میں پلوشہ خان کا کہنا تھا کہ تین بار وزیراعظم رہنے والوں کو آج بھی سڑکیں، اسپتال اور موٹرویز بنانے کے وعدے ہی یاد آ رہے ہیں۔ انہوں نے سوال اٹھایا کہ عوام یہ جاننا چاہتے ہیں کہ جو کام اقتدار میں رہ کر مکمل نہ ہو سکے، وہ اب محض وعدوں کے ذریعے کیسے کیے جائیں گے؟انہوں نے کہا کہ کشمیر کے عوام کو خالی وعدوں کی نہیں بلکہ عملی کارکردگی اور حقیقی ترقی کی ضرورت ہے۔ ان کے بقول الیکشن کا وقت آتے ہی ن لیگ کو کشمیر کی ترقی یاد آ جاتی ہے، جبکہ باقی عرصے میں عوام کو نظر انداز کر دیا جاتا ہے۔

سینیٹر پلوشہ خان نے مزید کہا کہ پنجاب کی ٹوٹ پھوٹ کا شکار سڑکیں اور سیلاب سے متاثرہ علاقے ن لیگ کی حکمرانی کی حقیقی تصویر پیش کر رہے ہیں۔ انہوں نے کہا کہ عوام اب صرف نعروں اور دعوؤں پر یقین نہیں رکھتے بلکہ عملی اقدامات اور نتائج چاہتے ہیں۔انہوں نے پاکستان پیپلزپارٹی کے چیئرمین بلاول بھٹو زرداری کو نوجوان نسل کی امید اور پاکستان میں جدید سیاست کی علامت قرار دیتے ہوئے کہا کہ بلاول بھٹو عوامی مسائل کے حل اور ترقیاتی وژن کے ساتھ آگے بڑھ رہے ہیں۔ جو جماعت برسوں اقتدار میں رہ چکی ہو، اسے آج بھی عوام سے نئے وعدے کرنے کی ضرورت کیوں پیش آ رہی ہے، اس سوال کا جواب ن لیگ کو قوم کے سامنے دینا چاہیے۔