Category: کراچی

‎امریکا اور ایران کے درمیان مذاکرات کے دوسرے دور کے لیے ایرانی وفد کی پاکستان آمد کی خبر نے پاکستان اسٹاک ایکسچینج میں زبردست بہتری پیدا کر دی ہے۔ منفی رجحان کے بعد مارکیٹ میں اچانک تیزی دیکھی گئی اور ہنڈریڈ انڈیکس نمایاں اضافے کے ساتھ بند ہوا۔
‎تفصیلات کے مطابق پاکستان اسٹاک ایکسچینج کا 100 انڈیکس 1 ہزار 498 پوائنٹس کے اضافے کے بعد ایک لاکھ 70 ہزار 672 پوائنٹس پر بند ہوا۔ اس سے قبل پہلے سیشن میں صورتحال مختلف تھی جہاں انڈیکس 2 ہزار 165 پوائنٹس کی کمی کے ساتھ ایک لاکھ 67 ہزار 7 پوائنٹس تک گر گیا تھا، تاہم سفارتی پیش رفت کی خبر سامنے آتے ہی سرمایہ کاروں کا اعتماد بحال ہوا اور مارکیٹ مثبت زون میں آ گئی۔
‎ماہرین کا کہنا ہے کہ عالمی اور علاقائی سطح پر کشیدگی میں کمی کی امید سرمایہ کاروں کے لیے مثبت اشارہ ہوتی ہے، جس کے باعث مارکیٹ میں خریداری کا رجحان بڑھ جاتا ہے۔ ایران اور امریکا کے درمیان ممکنہ مذاکرات کو خطے میں استحکام کی جانب اہم قدم قرار دیا جا رہا ہے۔
‎دوسری جانب عالمی منڈی میں خام تیل کی قیمتوں میں بھی کمی ریکارڈ کی گئی ہے۔ برینٹ خام تیل کی قیمت 107 ڈالر سے کم ہو کر 104 ڈالر فی بیرل تک آ گئی، جبکہ ویسٹ ٹیکساس انٹرمیڈیٹ کی قیمت میں بھی 2 ڈالر کمی دیکھی گئی اور یہ 95 ڈالر فی بیرل پر ٹریڈ ہوتا رہا۔
‎تجزیہ کاروں کے مطابق تیل کی قیمتوں میں کمی اور سفارتی پیش رفت دونوں عوامل نے مارکیٹ کے اعتماد کو مضبوط کیا ہے۔ سرمایہ کاروں کو توقع ہے کہ اگر مذاکرات کامیاب ہوتے ہیں تو نہ صرف خطے میں امن کی فضا قائم ہوگی بلکہ معاشی سرگرمیوں میں بھی بہتری آئے گی۔

وزیراعلیٰ سندھ مراد علی شاہ کا کہنا ہے کہ سانحہ گل پلازہ سے متعلق جوڈیشل کمیشن کی رپورٹ موصول ہوگئی، جو بھی ذمہ دار ہوگا اس کیخلاف کارروائی کریں گے، شاہراہ بھٹو کا اگلے ماہ افتتاح کریں گے، یونیورسٹی روڈ بھی جلد مکمل ہوگا۔

وزیراعلیٰ سندھ مراد علی شاہ نے کراچی میں تقریب سے خطاب کرتے ہوئے کہا کہ سانحہ گل پلازہ افسوسناک تھا، قیمتی جانیں ضائع ہوئیں، لوگوں کی ساری زندگی کی کمائی ختم ہوگئی، لواحقین کیلئے ایک کروڑ روپے امداد کا اعلان کیا، 63 کیسز میں ادائیگی ہوچکی ہے، ہر دکاندار کو فوری 5 لاکھ روپے دینے کا اعلان کیا متاثرین کیلئے 7 ارب رکھے گئے تھے۔ان کا کہنا ہے کہ متاثرین سانحہ گل پلازہ کا نقصان پورا کیا جائے گا، 200 متاثرین میں 511.7 ملین روپے تقسیم کیے گئے، کے سی سی آئی کے مطابق 1209 دکانیں تھیں، سانحہ گل پلازہ پر کسی کو ناجائز فائدہ اٹھانے نہیں دیں گے، گل پلازہ کی عمارت کو دوبارہ بنایا جائے گا۔وزیراعلیٰ سندھ نے کہا کہ جوڈیشل کمیشن کی رپورٹ کابینہ میں پیش ہوئی، ایک کمیٹی بنائی ہے وہ رپورٹ پر سفارشات پیش کرے گی، رپورٹ میں جس کی غلطی ہوگی اس کیخلاف کارروائی ہوگی۔مراد علی شاہ کا کہنا ہے کہ شاہراہ بھٹو کا اگلے مہینے افتتاح کریں گے، لوگ پوچھتے ہیں یونیورسٹی روڈ کب بنے گی؟، یونیورسٹی روڈ کو جلد مکمل کریں گے۔

کنزیومر پروٹیکشن کورٹ کراچی ،بارہ سالہ وارنٹی میں خریدا گیا ریفریجریٹر تین سال بھی نا چلا ،کنزیومر پروٹیکشن کورٹ نے شہری کے حق میں فیصلہ سنادیا ،عدالت نے نجی کمپنی (ڈاولینس) کو شہری کو نیا ریفریجریٹر کا حکم دے دیا،عدالت نے نجی کمپنی پر مجموعی طور پر 40 ہزار روپے جرمانہ بھی عائد کردیا

عدالتی فیصلے عمل درآمد نا کرنے پر پر نجی کمپنی کے چیف ایگزیکٹو آفیسر عمر احسن کے قابل ضمانت وارنٹ گرفتاری جاری کردئیے ،عدالت نے نجی کمپنی کے سی ای او کے دس ہزار روپے مالیت کے وارنٹ گرفتاری جاری کیے ہیں ، ایس ایچ او تھانہ سول لائن کو 7 مئی تک وارنٹ کی تعمیل کی ہدایت کردی،عدالت نے نجی کمپنی کے سی ای او عمر احسن کو شوکاز نوٹس بھی جاری کردیا ،عدالت نے دو فروری 2026 کو شہری کے حق میں فیصلہ دیا تھا

درخواست گزار نے کہا کہ نجی کمپنی کی جانب سے تاحال عدالتی فیصلے پر عملدرآمد نہیں کیا ہے ،تین دسمبر 2021 کو مقامی دوکان دار سے ریفریجریٹر خریدا تھا دوکان دار نے ریفریجریٹر کی 12 سال کی وارنٹی دی تھی ،تاہم ریفریجریٹر 8 جنوری 2024 کو ریفریجریٹر نے کام کرنا چھوڑ دیا،ریفریجریٹر کے خراب ہونے کی شکایت درج کرائی کمپنی کے نمائندے نے کہا کہ ریفریجریٹر کی وارنٹی ایک سال تھی ،اب مرمت کے 9 ہزار 9 سو روپے ادا کرنے پڑیں گے

‎کراچی کے علاقے داؤد چورنگی میں پیش آنے والے افسوسناک ٹریفک حادثے میں 6 سالہ بچہ طلحہٰ جان کی بازی ہار گیا۔ واقعہ گزشتہ روز پیش آیا جس کی سی سی ٹی وی فوٹیج بھی سامنے آ گئی ہے، جس میں ایک تیز رفتار ٹریلر کو موٹر سائیکل سے ٹکراتے دیکھا جا سکتا ہے۔
‎رپورٹس کے مطابق بچہ اپنے ماموں کے ساتھ موٹر سائیکل پر سوار تھا کہ اچانک ٹریلر نے انہیں ٹکر مار دی، جس کے نتیجے میں بچہ موقع پر ہی جاں بحق ہو گیا۔ حادثے کے بعد علاقے میں شدید غم و غصہ دیکھنے میں آیا اور شہریوں نے ٹریفک قوانین پر عملدرآمد نہ ہونے پر تشویش کا اظہار کیا۔
‎پولیس حکام کا کہنا ہے کہ واقعے کے فوراً بعد ٹریلر ڈرائیور کو گرفتار کر لیا گیا اور گاڑی کو بھی تحویل میں لے لیا گیا ہے۔ حکام کے مطابق مزید تحقیقات جاری ہیں اور ایک اور سی سی ٹی وی فوٹیج کی مدد سے یہ تعین کیا جائے گا کہ حادثہ کس کی غفلت کے باعث پیش آیا، آیا موٹر سائیکل سوار اوورٹیک کر رہا تھا یا ٹریلر تیز رفتاری سے چل رہا تھا۔
‎متوفی بچے کے ماموں کا کہنا ہے کہ سڑک پر جگہ جگہ گڑھے ہونے کی وجہ سے حادثہ پیش آیا، جو شہر میں انفراسٹرکچر کی خراب حالت کی نشاندہی کرتا ہے۔ شہریوں کا کہنا ہے کہ کراچی میں بھاری گاڑیوں کی بے قابو رفتار اور ٹریفک قوانین کی خلاف ورزیاں آئے روز قیمتی جانیں لے رہی ہیں۔
‎واضح رہے کہ چند روز قبل ملیر کے علاقے میں بھی ایک ٹریلر کی ٹکر سے نوجوان جاں بحق جبکہ ایک شخص زخمی ہوا تھا، جس کے بعد ٹریفک انتظامات پر سوالات مزید بڑھ گئے ہیں۔
‎شہریوں نے حکام سے مطالبہ کیا ہے کہ بھاری گاڑیوں کی نگرانی سخت کی جائے اور سڑکوں کی حالت بہتر بنائی جائے تاکہ مستقبل میں ایسے افسوسناک واقعات سے بچا جا سکے۔

‎کراچی میں کانگو ہیمرجک فیور کا ایک اور افسوسناک کیس سامنے آیا ہے جہاں 17 سالہ نوجوان جان کی بازی ہار گیا۔ محکمہ صحت کے مطابق متاثرہ نوجوان میں گزشتہ روز ہی اس مہلک وائرس کی تصدیق ہوئی تھی، جس کے بعد اسے فوری طور پر سندھ انفیکشن ڈیزیز اسپتال منتقل کیا گیا، تاہم وہ دورانِ علاج دم توڑ گیا۔
‎اسپتال ذرائع کا کہنا ہے کہ نوجوان مویشیوں کی دیکھ بھال سے وابستہ تھا اور خدشہ ظاہر کیا جا رہا ہے کہ اسے یہ وائرس جانوروں سے منتقل ہوا۔ طبی ماہرین کے مطابق کانگو وائرس عام طور پر چیچڑی کے کاٹنے یا متاثرہ جانور کے خون کے ذریعے انسانوں میں منتقل ہوتا ہے، جو بعد ازاں خطرناک شکل اختیار کر سکتا ہے۔
‎ماہرینِ صحت نے خبردار کیا ہے کہ عیدِ قربان کے قریب آتے ہی اس وائرس کے پھیلاؤ کا خطرہ بڑھ جاتا ہے کیونکہ اس دوران بڑی تعداد میں لوگ مویشیوں کے قریب آتے ہیں۔ اسی پیش نظر شہریوں کے لیے احتیاطی تدابیر بھی جاری کی گئی ہیں۔
‎ایڈوائزری کے مطابق مویشیوں کو ہاتھ لگاتے وقت دستانوں کا استعمال کیا جائے اور جانوروں کی دیکھ بھال کے دوران مکمل احتیاط برتی جائے۔ اس کے علاوہ مویشی منڈی جاتے وقت ہلکے رنگ کے اور پوری آستینوں والے کپڑے پہننے کی ہدایت کی گئی ہے تاکہ چیچڑی یا دیگر حشرات کو آسانی سے دیکھا جا سکے۔
‎طبی ماہرین کا کہنا ہے کہ کانگو وائرس کی علامات میں تیز بخار، شدید جسم درد، پٹھوں میں تکلیف اور جسم کے مختلف حصوں سے خون بہنا شامل ہیں۔ ایسی علامات ظاہر ہونے کی صورت میں فوری طور پر قریبی اسپتال سے رجوع کرنا ضروری ہے تاکہ بروقت علاج ممکن بنایا جا سکے۔

کراچی: کاؤنٹر ٹیررازم ڈیپارٹمنٹ (سی ٹی ڈی) کراچی نے ایک اہم اور کامیاب کارروائی کے دوران کالعدم تنظیم تحریک طالبان پاکستان سے تعلق رکھنے والے ایک انتہائی مطلوب دہشت گرد کو اس کے ساتھی سمیت گرفتار کر لیا۔

سی ٹی ڈی کے ترجمان کے مطابق کارروائی خفیہ اطلاع پر حب ریور روڈ، نزد نیول کالونی کراچی میں کی گئی، جہاں ملزمان کو ٹریس کر کے حراست میں لیا گیا۔ گرفتار مرکزی ملزم اسماعیل سواتی سی ٹی ڈی کی ریڈ بک کے سیریل نمبر 87 پر مطلوب تھا۔گرفتار ملزمان میں‌اسماعیل سواتی ولد طوطی خان،زاہد اللہ ولد گل اعظم شامل ہیں ترجمان کے مطابق اسماعیل سواتی کالعدم ٹی ٹی پی کے لیے فنڈ ریزنگ میں سرگرم رہا ہے اور سنگین جرائم میں ملوث ہے۔سال 2023 میں پیر آباد کے علاقے میں عبدالقیوم قصائی سے بھتہ طلب کیا، انکار پر اسے ساتھی عبدالغنی کے ساتھ مل کر قتل کر دیا۔شریک ملزم عبدالغنی گزشتہ سال پولیس مقابلے میں مارا جا چکا ہے جبکہ اسماعیل سواتی اس مقدمے میں اشتہاری تھا۔ملزم تھانہ پریڈی اور گلشنِ معمار کے علاقوں میں بھتہ خوری کے متعدد مقدمات میں بھی مطلوب تھا۔وہ تحریک طالبان سوات کے گرفتار دہشت گرد کمال خان کا قریبی ساتھی بھی رہا ہے۔وارداتوں کے بعد ملزم کراچی سے فرار ہو کر خیبر پختونخوا منتقل ہو گیا تھا۔

کارروائی کے دوران ملزمان کے قبضے سے 2 پستول،10 گولیاں برآمد کر لی گئیں۔ملزمان کے خلاف درج ذیل مقدمات درج کر لیے گئے ہیں،مقدمہ نمبر 38/2026، دفعہ 23(1) سندھ آرمز ایکٹ 2013،مقدمہ نمبر 39/2026، دفعہ 23(1) سندھ آرمز ایکٹ 2013 درج کیا گیا ہے،سی ٹی ڈی کے مطابق گرفتار ملزمان سے تفتیش جاری ہے اور اہم انکشافات کی توقع ہے۔ ملزمان کے سہولت کاروں اور دیگر ساتھیوں کی گرفتاری کے لیے خصوصی ٹیمیں تشکیل دے دی گئی ہیں جو مختلف مقامات پر چھاپے مار رہی ہیں۔ترجمان سی ٹی ڈی سندھ کا کہنا ہے کہ دہشت گردی اور جرائم کے خاتمے کے لیے کارروائیاں بلا تعطل جاری رہیں گی۔

سی ٹی ڈی کراچی کے پولیس اہلکار سے مبینہ فراڈ کے الزام میں معروف ٹک ٹاکر کاشف ضمیر کے خلاف مقدمہ درج کرلیا گیا۔

سی ٹی ڈی کراچی کے اہلکار کی طرف سے درج کروائی گئی ایف آئی آر میں کہا گیا ہےکہ ٹک ٹاکر کاشف ضمیر سے 2 سال قبل ٹک ٹاک پر دوستی ہوئی تھی،سی ٹی ڈی اہلکار کے مطابق ایک سال پہلےکاشف ضمیر نے یورپ بھجوانےکے عوض 20 لاکھ روپے وصول کیے، رقم وصول کرنےکے بعد ملزم نے اس کا فون اٹھانا بندکردیا،پولیس حکام کے مطابق ملزم کی گرفتاری کے لیے چھاپے مارے جا رہے ہیں، جلد ملزم پولیس کی گرفت میں ہوگا۔