Category: کراچی

‎ملک بھر میں حضرت امام حسینؓ اور شہدائے کربلا کی عظیم قربانی کی یاد میں یومِ عاشور کے جلوس اور مجالس عقیدت و احترام کے ساتھ جاری ہیں۔ کراچی، راولپنڈی، کوئٹہ، پشاور، حیدرآباد، شیخوپورہ، ایبٹ آباد، لودھراں، پاکپتن، قصور اور دیگر شہروں میں مرکزی جلوس اپنے روایتی راستوں پر رواں دواں ہیں، جبکہ سیکیورٹی کے غیر معمولی انتظامات کیے گئے ہیں۔
‎کراچی میں مرکزی جلوس نشتر پارک میں مجلسِ عزا کے اختتام کے بعد برآمد ہوا۔ جلوس کی سیکیورٹی کے لیے پولیس کے پانچ ہزار سے زائد اہلکار اور رینجرز کے جوان تعینات ہیں۔ جلوس کے راستوں اور اطراف میں موبائل فون سروس جزوی طور پر معطل رکھی گئی ہے، ایم اے جناح روڈ کو ٹریفک کے لیے بند کر کے متبادل راستے فراہم کیے گئے ہیں، جبکہ اطراف کی گلیوں، بازاروں اور دکانوں کو کنٹینرز لگا کر سیل کر دیا گیا ہے۔
‎راولپنڈی میں مرکزی جلوس امام بارگاہ عاشق حسین تیلی محلہ سے برآمد ہوا، جہاں آٹھ ہزار سے زائد پولیس اہلکار سیکیورٹی کے فرائض انجام دے رہے ہیں۔ کوئٹہ میں شہداء چوک سے مرکزی جلوس برآمد ہوا، جس کے روٹس مکمل طور پر سیل کر دیے گئے ہیں۔ شہر میں ایف سی، پولیس اور بلوچستان کانسٹیبلری کے تقریباً 17 ہزار اہلکار تعینات ہیں، جبکہ جلوس کے ساتھ 1200 رضاکار اور 30 طبی کیمپ بھی خدمات انجام دے رہے ہیں۔
‎پشاور، حیدرآباد، شیخوپورہ، ایبٹ آباد، لودھراں، پاکپتن، قصور اور دیگر شہروں میں بھی شبیہِ علم، ذوالجناح اور تعزیوں کے جلوس روایتی راستوں پر جاری ہیں۔ متعلقہ اضلاع میں سیکیورٹی کو یقینی بنانے کے لیے اضافی نفری تعینات کی گئی ہے اور نگرانی کے خصوصی انتظامات کیے گئے ہیں۔
‎ملک بھر میں یومِ عاشور کے موقع پر امن و امان برقرار رکھنے کے لیے قانون نافذ کرنے والے ادارے الرٹ ہیں، جبکہ ضلعی انتظامیہ اور ریسکیو ادارے بھی کسی بھی ہنگامی صورتحال سے نمٹنے کے لیے مکمل طور پر تیار ہیں۔

پاکستان پیپلز پارٹی سندھ کے جنرل سیکرٹری سینیٹر وقار مہدی نےمسلم لیگ ن کے رہنما خواجہ سعد رفیق کے ٹویٹ پر ردعمل میں کہا ہے کہ پیپلزپارٹی کے چیئرمین بلاول بھٹو زداری کے بلدیاتی الیکشن کے مطالبے سے ن لیگ خوفزدہ ہے۔

سینیٹر وقار مہدی کا کہنا تھا کہ پیپلزپارٹی کی صوبائی حکومت نے اپنے دور حکومت میں دو بار بلدیاتی الیکشن کرواچکی ہے۔2027 میں انشاءاللہ تیسری بار سندھ میں بلدیاتی الیکشن منعقد ہوں گے۔پیپلزپارٹی کے سندھ میں بلدیاتی قانون اور نظام کا اگر مخالفین معائنہ کرلیں تو وہ شرمندگی سے بچ جائیں گے۔پیپلزپارٹی نے تو پنجاب اور اسلام آباد بلدیاتی الیکشن کرانے کا مطالبہ کیا تھا۔۔ آپ تو رونے لگے۔ ڈریں نہیں بلدیاتی الیکشن کرائیں جو عوام میں مقبول ہوگا وہ کامیاب ہوگا۔سندھ میں بلدیاتی نظام بہترین و موثر انداز سے ڈلیور کر رہا ہے جس کی عوامی پزیرائی ہے۔ آپ پیپلزپارٹی سے بہتر بلدیاتی قانون لے آئیں اگر ہم سے بہتر ہوا تو عوام خود تعریف کریں گے۔

پیپلز پارٹی کی رہنما شرمیلا فاروقی نے کراچی میں شہری مسائل کے حوالے سے اظہارِ خیال کرتے ہوئے کہا ہے کہ دنیا کے بڑے اور ترقی یافتہ شہروں کو بھی مختلف چیلنجز کا سامنا رہتا ہے، اس لیے صرف کراچی کو تنقید کا نشانہ بنانا مناسب نہیں۔

شرمیلا فاروقی کا کہنا تھا کہ اس وقت فرانس شدید گرمی کی لپیٹ میں ہے، جہاں گرمی کے باعث متعدد افراد نہانے کے لیے پانی میں گئے اور مختلف حادثات میں تقریباً 40 افراد جان کی بازی ہار گئے۔ انہوں نے کہا کہ اگر خدا نہ کرے ایسا ہی کوئی افسوسناک واقعہ کراچی میں پیش آتا تو فوراً وزیراعلیٰ سندھ کے استعفے کا مطالبہ شروع کر دیا جاتا۔شرمیلا فاروقی نے مزید کہا کہ گزشتہ سال وہ نیویارک میں موجود تھیں، جہاں شدید بارشوں کے باعث انہیں دو روز تک ہوٹل سے باہر نکلنے کا موقع نہیں ملا۔ ان کے بقول نیویارک جیسے ترقی یافتہ شہر میں بھی، جہاں نکاسیٔ آب کا منظم نظام موجود ہے، موسمی حالات کے باعث شہریوں کو مشکلات کا سامنا کرنا پڑا۔انہوں نے کہا کہ دنیا کے ہر بڑے شہر میں مختلف نوعیت کے مسائل پیش آتے ہیں، اس لیے ضروری ہے کہ ہم اپنے مسائل کا حقیقت پسندانہ انداز میں جائزہ لیں، ان کا اعتراف کریں اور ان کے حل کے لیے سنجیدہ اقدامات کریں۔ ان کا کہنا تھا کہ یہ تسلیم کرنا ہوگا کہ ہمارے نظام میں خامیاں موجود ہیں، جنہیں دور کرنے کی ضرورت ہے۔

پیپلز پارٹی کی رہنما نے اس بات پر زور دیا کہ شہری مسائل کو سیاسی پوائنٹ اسکورنگ کے بجائے عملی اقدامات کے ذریعے حل کیا جانا چاہیے تاکہ عوام کو بہتر سہولیات فراہم کی جا سکیں۔

واضح رہے کہ چند ماہ قبل شرمیلا فاروقی نے ایک نجی ٹی وی پروگرام میں کراچی کا موازنہ پیرس سے کرتے ہوئے کہا تھا کہ "کراچی میں رہنا ایسا ہے جیسے پیرس میں رہ رہے ہوں”، جس پر انہیں سوشل میڈیا اور مختلف عوامی حلقوں کی جانب سے شدید تنقید کا سامنا کرنا پڑا تھا۔

‎کراچی: محکمہ موسمیات نے پیش گوئی کی ہے کہ آئندہ تین روز کے دوران کراچی میں مطلع جزوی ابر آلود رہے گا جبکہ موسم گرم اور مرطوب رہنے کا امکان ہے۔
‎محکمہ موسمیات کے مطابق اس دوران شہر میں تیز ہوائیں بھی چل سکتی ہیں، جبکہ رات اور صبح کے اوقات میں مختلف علاقوں میں ہلکی بوندا باندی ہونے کا امکان ہے، جس سے موسم میں معمولی بہتری آ سکتی ہے۔
‎محکمہ موسمیات کا کہنا ہے کہ کراچی میں زیادہ سے زیادہ درجہ حرارت 34 سے 36 ڈگری سینٹی گریڈ کے درمیان رہنے کی توقع ہے، جبکہ سندھ کی ساحلی پٹی پر بھی جزوی ابر آلود موسم، تیز ہوائیں اور کہیں کہیں ہلکی بوندا باندی متوقع ہے۔
‎دوسری جانب صوبہ سندھ کے بیشتر اضلاع میں موسم گرم اور خشک رہنے کا امکان ظاہر کیا گیا ہے۔ تاہم جیکب آباد، دادو، قمبر شہدادکوٹ اور لاڑکانہ میں گرد آلود ہواؤں کے ساتھ ہلکی بارش بھی ہو سکتی ہے۔
‎محکمہ موسمیات نے شہریوں کو ہدایت کی ہے کہ گرمی اور حبس کے پیش نظر احتیاطی تدابیر اختیار کریں، دھوپ میں غیر ضروری باہر نکلنے سے گریز کریں اور پانی کا زیادہ استعمال کریں۔

کراچی: نواسۂ رسول حضرت امام حسینؓ اور شہدائے کربلا کی عظیم قربانی کی یاد میں ملک بھر میں 9 محرم الحرام کے ماتمی جلوس اور مجالسِ عزا عقیدت و احترام کے ساتھ منعقد کیے جا رہے ہیں، جبکہ امن و امان برقرار رکھنے کے لیے سیکیورٹی کے سخت انتظامات کیے گئے ہیں۔
‎کراچی میں 9 محرم الحرام کا مرکزی جلوس نشتر پارک سے برآمد ہوا اور اپنے روایتی راستوں پر گامزن ہے۔ جلوس کے باعث ایم اے جناح روڈ کو ٹریفک کے لیے بند کر دیا گیا ہے جبکہ ٹریفک پولیس نے شہریوں کے لیے متبادل راستے مختص کیے ہیں۔
‎لاہور میں امام بارگاہ قصرِ بتول شادمان سے شبیہہ ذوالجناح کا مرکزی جلوس روایتی راستوں پر رواں دواں ہے۔ جلوس میں عزاداروں کی بڑی تعداد شریک ہے اور سیکیورٹی کے لیے پولیس سمیت دیگر قانون نافذ کرنے والے ادارے تعینات ہیں۔
‎اسلام آباد میں 9 محرم کے مرکزی جلوس کے لیے غیر معمولی حفاظتی انتظامات کیے گئے ہیں۔ آئی جی اسلام آباد سید علی ناصر رضوی نے بتایا کہ جلوس کی حفاظت کے لیے تقریباً 16 ہزار اہلکار تعینات کیے گئے ہیں، جبکہ پولیس، رینجرز اور پاک فوج کے دستے بھی سیکیورٹی فرائض انجام دے رہے ہیں۔ انہوں نے کہا کہ پانچ سطحی سیکیورٹی حصار قائم کیا گیا ہے، جلوس کے راستوں پر کنٹینرز نصب کیے گئے ہیں اور نگرانی کے لیے خصوصی کنٹرول روم بھی قائم کیے گئے ہیں۔
‎پشاور میں مختلف امام بارگاہوں میں مجالسِ عزا کا سلسلہ جاری ہے۔ شہر میں سیکیورٹی انتہائی سخت کر دی گئی ہے اور اندرون شہر کے حساس علاقوں کو مکمل طور پر سیل کر دیا گیا ہے تاکہ عزاداروں کو محفوظ ماحول فراہم کیا جا سکے۔
‎ادھر کوئٹہ میں میکانگی روڈ پر امام بارگاہ ناصر العزا سے برآمد ہونے والا نویں محرم الحرام کا جلوس اپنے اختتام کو پہنچ گیا۔ جلوس کے دوران تمام داخلی راستے بند رکھے گئے جبکہ دکانیں اور کاروباری مراکز بھی حفاظتی اقدامات کے تحت بند رہے۔
‎ملک بھر میں قانون نافذ کرنے والے ادارے جلوسوں اور مجالس کی مسلسل نگرانی کر رہے ہیں تاکہ محرم الحرام کے اجتماعات پُرامن ماحول میں اختتام پذیر ہوں۔

‎کراچی: کراچی کے علاقے جوہر آباد میں کیش وین سے 30 کروڑ روپے کی ڈکیتی کے مرکزی ملزم اور بین الصوبائی گروہ کے سرغنہ محمد علی عرف علی لنگڑا کو پولیس نے گرفتار کر لیا ہے، جبکہ اس کے قبضے سے 20 کروڑ روپے نقد رقم اور واردات میں استعمال ہونے والی گاڑیاں بھی برآمد کر لی گئی ہیں۔
‎پولیس کے مطابق گرفتار ملزم کراچی میں سرگرم بین الصوبائی ڈکیت گروہ کا سربراہ ہے، جبکہ اس کے دیگر ساتھی ملک کے مختلف شہروں میں کارروائیاں کرتے رہے ہیں۔ ملزم کا تعلق ضلع سوات سے ہے، تاہم وہ طویل عرصے سے کراچی میں مقیم تھا۔
‎تفتیشی حکام کے مطابق محمد علی عرف علی لنگڑا ماضی میں بھی بینک ڈکیتیوں، لاکر توڑنے اور طلائی زیورات و غیر ملکی کرنسی لوٹنے کے متعدد مقدمات میں گرفتار ہو چکا ہے۔ اس کے خلاف راولپنڈی کے تھانہ رتہ امرال سمیت کراچی کے گلشن اقبال، تیموریہ، سولجر بازار اور ڈیفنس تھانوں میں بھی ڈکیتی کے مقدمات درج ہیں۔
‎پولیس کا کہنا ہے کہ 12 جون کو جوہر آباد میں پیش آنے والی کیش وین ڈکیتی کے بعد ڈی آئی جی ویسٹ کی ہدایت پر ایس ایس پی سینٹرل کی سربراہی میں خصوصی تحقیقاتی ٹیم تشکیل دی گئی تھی۔ دورانِ تفتیش یہ بھی انکشاف ہوا کہ سیکیورٹی کمپنی کی کیش وین کا چیف کریو واجد بھی واردات میں ملوث تھا۔
‎تحقیقات کے مطابق مرکزی ملزم نے پوری واردات کی منصوبہ بندی کی اور لوٹی گئی رقم دو مختلف گھروں میں چھپا رکھی تھی، جہاں سے پولیس نے بڑی رقم برآمد کی۔
‎پولیس کے مطابق یہ بین الصوبائی گروہ درجن سے زائد افراد پر مشتمل ہے اور کراچی، اسلام آباد، راولپنڈی، کوئٹہ اور ملتان سمیت مختلف شہروں میں بینک ڈکیتیوں میں ملوث رہا ہے۔
‎تفتیشی حکام نے بتایا کہ واردات میں شامل دیگر ملزمان کا تعلق پاراچنار سے ہے، جو لوٹی گئی باقی رقم کے ساتھ فرار ہیں۔ ان کی گرفتاری اور باقی ماندہ رقم کی برآمدگی کے لیے خصوصی ٹیمیں مختلف علاقوں میں کارروائیاں کر رہی ہیں۔