قصور،رپورٹ،طارق نوید سندھو،بیوروچیف باغی ٹی وی قصور
ماموں کے 2 لاکھ 50 ہزار روپے آن لائن جوئے کی ایپ میں ہارنے کے بعد معاملہ چھپانے کے لیے 15 پر ڈکیتی کی جھوٹی کال کرنے والے نوجوان کو پولیس نے گرفتار کرلیا، مقدمہ درج کرکے حوالات میں بند کردیا گیا۔
پولیس کے مطابق تھانہ صدر پتوکی کے ایس ایچ او عامر اسلم کی سربراہی میں پولیس نے بروقت کارروائی کرتے ہوئے شیرگڑھ بازار حبیب آباد کے رہائشی میسم تیمار کو گرفتار کیا۔ملزم نے حبیب آباد بائی پاس کے قریب اپنے بھائی کے موبائل فون سے پولیس ایمرجنسی 15 پر کال کرکے اطلاع دی کہ نامعلوم افراد اس سے 2 لاکھ 50 ہزار روپے اور موبائل فون چھین کر فرار ہوگئے ہیں۔پولیس ٹیم فوری طور پر موقع پر پہنچی اور کالر سمیت اردگرد موجود افراد سے پوچھ گچھ کی۔ دوران تفتیش میسم تیمار پر شک گزرا، جس پر پولیس نے جدید ٹیکنالوجی کی مدد سے مزید تحقیقات کیں۔
پولیس کے مطابق تفتیش کے دوران ملزم نے اعتراف کیا کہ اس کے پاس ماموں کی وصولی کی رقم موجود تھی، جو اس نے آن لائن جوئے کی ایپ میں ہار دی۔ رقم ہارنے کے بعد معاملہ چھپانے کے لیے اس نے اپنا موبائل فون دوست کے گھر پہنچا دیا اور اپنے بھائی کو ساتھ لے کر جائے وقوعہ پر پہنچا، جہاں بھائی کے موبائل فون سے رابری کی جھوٹی کال کی۔پولیس نے ملزم کی نشاندہی پر اس کا موبائل فون بھی اس کے دوست کے گھر سے برآمد کرلیا۔پولیس نے میسم تیمار کے خلاف ٹیلی گراف ایکٹ کی دفعات کے تحت مقدمہ درج کرکے اسے حوالات میں بند کردیا ہے