غفلت کے الزامات پر ایم ایس ٹی ایچ کیو گوجرخان کا فوری ایکشن، متعلقہ ڈاکٹر اور نرسنگ اسٹاف کو شوکاز نوٹس جاری وضاحت طلب
گاڑی میں ڈلیوری کے واقعہ پر محکمہ صحت متحرک سی ای او ہیلتھ راولپنڈی نے حقائق جاننے کیلئے انکوائری کمیٹی قائم کر دی، رپورٹ طلب
گوجرخان (قمرشہزاد) ٹی ایچ کیو ہسپتال گوجرخان سے ریفر کی جانے والی زچہ کی روات کے قریب جی ٹی روڈ پر ایک کیری بولان میں ڈلیوری کے واقعہ کے بعد محکمہ صحت متحرک ہوگیا۔ میڈیکل سپرنٹنڈنٹ ٹی ایچ کیو ہسپتال گوجرخان ڈاکٹر عمر فاروق مرزا نے فوری کارروائی کرتے ہوئے ڈیوٹی پر موجود ویمن میڈیکل آفیسر ڈاکٹر سارونہ اسحاق اور چارج نرس حفضہ رسول کو مبینہ غفلت، ناقص مریض نگہداشت اور گائنی یونٹ سے غیر ضروری ریفرل کے الزام میں شوکاز نوٹس جاری کر دیا ہے۔ جاری نوٹس کے مطابق خاتون کو تشویشناک حالت میں مناسب طبی اور انتظامی پروٹوکول کے بغیر ریفر کیا گیا، جس کے نتیجے میں مریضہ نے راولپنڈی جاتے ہوئے نجی گاڑی میں بچے کو جنم دیا۔ نوٹس میں اس واقعہ کو غیر پیشہ ورانہ قرار دیتے ہوئے کہا گیا ہے کہ اس سے ماں اور نومولود کی جان خطرے میں پڑی جبکہ ہسپتال کی ساکھ بھی متاثر ہوئی۔ متعلقہ ڈاکٹر اور نرس کو تین روز کے اندر تحریری وضاحت جمع کرانے کی ہدایت کی گئی ہے، بصورت دیگر پیڈا رولز کے تحت مزید محکمانہ کارروائی عمل میں لائی جائے گی۔
دوسری جانب چیف ایگزیکٹو آفیسر ڈسٹرکٹ ہیلتھ اتھارٹی راولپنڈی ڈاکٹر احسان غنی نے بھی واقعہ کا نوٹس لیتے ہوئے تین رکنی انکوائری کمیٹی تشکیل دے دی ہے۔ کمیٹی میں ڈسٹرکٹ ہیلتھ آفیسر (میڈیکل سروسز) راولپنڈی کو کنوینر جبکہ ڈپٹی ڈسٹرکٹ ہیلتھ آفیسر گوجرخان اور ٹی ایچ کیو ہسپتال کلر سیداں کی کنسلٹنٹ گائناکالوجسٹ ڈاکٹر عاصمہ صدف کو بطور اراکین شامل کیا گیا ہے۔ کمیٹی کو شکایت، متعلقہ ریکارڈ، ڈیوٹی روسٹر، مریضہ کے اندراجات، ریفرل دستاویزات اور دستیاب سی سی ٹی وی فوٹیج سمیت تمام شواہد کا جائزہ لے کر واقعہ کے حقائق معلوم کرنے، ذمہ داریوں کا تعین کرنے اور تین روز کے اندر اپنی سفارشات پیش کرنے کی ہدایت کی گئی ہے۔ انکوائری رپورٹ کی روشنی میں غفلت، بدانتظامی یا فرائض میں کوتاہی ثابت ہونے کی صورت میں متعلقہ ڈاکٹر نرسسز سٹاف کے خلاف قواعد و ضوابط کے مطابق محکمانہ کارروائی کی جائے گی۔