Author: Aqsa Younas Rana

‎اسپین کی فٹبال لیگ لالیگا کے صدر خاویر تیباس نے فیفا کے صدر جیانی انفینٹینو سے فوری استعفے کا مطالبہ کرتے ہوئے الزام عائد کیا ہے کہ ان کی پالیسیاں عالمی فٹبال اور اس سے وابستہ صنعت کو نقصان پہنچا رہی ہیں۔
‎فیفا ورلڈ کپ کے دوران سامنے آنے والی مختلف تنازعات اور بے ضابطگیوں کے بعد جیانی انفینٹینو پہلے ہی تنقید کی زد میں تھے۔ ان پر یہ الزام بھی عائد کیا گیا کہ امریکی صدر ڈونلڈ ٹرمپ کی سفارش پر ایک امریکی کھلاڑی کی سزا ختم کی گئی، جس کے بعد ان کے فیصلوں پر مزید سوالات اٹھائے گئے۔
‎اب ورلڈ کپ 2026 کے اختتام کے بعد اطالوی اخبار کو دیے گئے انٹرویو میں لالیگا کے صدر خاویر تیباس نے کہا کہ انفینٹینو بین الاقوامی مقابلوں میں مسلسل اضافہ کر کے فٹبال کے مجموعی نظام کو نقصان پہنچا رہے ہیں۔ ان کے مطابق عالمی مقابلوں کی تعداد میں غیر ضروری توسیع قومی لیگز، کلبوں اور کھلاڑیوں پر اضافی دباؤ ڈال رہی ہے۔
‎تیباس نے خاص طور پر 2030 کے فیفا ورلڈ کپ میں ٹیموں کی تعداد 48 سے بڑھا کر 64 کرنے کی تجویز کو بے معنی قرار دیتے ہوئے کہا کہ اگرچہ ورلڈ کپ فٹبال کا سب سے بڑا ایونٹ ہے، لیکن پوری فٹبال دنیا صرف اسی ایک ٹورنامنٹ کے گرد نہیں گھوم سکتی۔
‎انہوں نے مزید کہا کہ قومی لیگز ہی عالمی فٹبال کی اصل بنیاد ہیں، مگر فیفا صرف چند ہفتوں کے عالمی ٹورنامنٹ کو ترجیح دے کر ایسی پالیسیاں بنا رہا ہے جو ہزاروں ملازمتوں اور اربوں ڈالر کی فٹبال صنعت کو متاثر کر سکتی ہیں۔
‎لالیگا کے صدر نے دعویٰ کیا کہ فٹبال کی دنیا میں بہت سے لوگ جیانی انفینٹینو کی پالیسیوں سے اختلاف رکھتے ہیں، لیکن فیفا کے نظام اور رکن فیڈریشنز کی حمایت کے باعث ان کے خلاف کھل کر آواز نہیں اٹھاتے۔
‎دوسری جانب جنوبی امریکی فٹبال تنظیم نے بھی 2030 کے ورلڈ کپ میں 64 ٹیموں کی شمولیت کی باضابطہ تجویز پیش کر رکھی ہے، جبکہ یہ میگا ایونٹ پہلے ہی 6 میزبان ممالک اور 3 برِاعظموں میں منعقد ہونے والا ہے۔

‎الیکٹرک گاڑیوں کی معروف کمپنی ٹیسلا نے اپنی مصنوعات کی فہرست میں ایک اور منفرد اضافہ کرتے ہوئے 2 سے 5 سال کی عمر کے بچوں کے لیے نئی بیلنس بائیک متعارف کرا دی ہے۔ جدید ڈیزائن اور ہلکے وزن کی حامل اس بائیک نے فروخت کے آغاز کے ساتھ ہی صارفین کی بھرپور توجہ حاصل کر لی، یہاں تک کہ محدود دستیاب اسٹاک چند ہی لمحوں میں ختم ہو گیا۔
‎کمپنی کے مطابق نئی بیلنس بائیک کو خاص طور پر چھوٹے بچوں کی ضروریات کو مدنظر رکھتے ہوئے تیار کیا گیا ہے۔ اس میں ہلکے وزن کا میگنیشیم فریم استعمال کیا گیا ہے، جس سے بچوں کے لیے اسے سنبھالنا اور چلانا آسان ہو جاتا ہے۔ اس کے علاوہ بائیک میں ایڈجسٹ ہونے والی نشست دی گئی ہے تاکہ بچے اپنی قد کے مطابق اسے آرام سے استعمال کر سکیں۔
‎بائیک کے دونوں اطراف ٹیسلا کا نمایاں لفظی نشان جبکہ سامنے کمپنی کا معروف T لوگو نصب کیا گیا ہے، جس سے اسے منفرد اور جدید انداز دیا گیا ہے۔ کمپنی کا کہنا ہے کہ یہ بائیک 2 سے 5 سال کی عمر کے بچوں کے لیے موزوں ہے اور انہیں سائیکل چلانے کی ابتدائی تربیت دینے میں مدد فراہم کرے گی۔
‎ٹیسلا نے اس بیلنس بائیک کی قیمت 225 امریکی ڈالر مقرر کی ہے، جو مارکیٹ میں دستیاب عام بیلنس بائیکس کے مقابلے میں دگنی سے بھی زیادہ ہے۔ عام طور پر اسی نوعیت کی بائیکس تقریباً 100 ڈالر میں فروخت ہوتی ہیں، تاہم ٹیسلا کے برانڈ اور منفرد ڈیزائن کی وجہ سے صارفین نے مہنگی قیمت کے باوجود اس میں غیر معمولی دلچسپی ظاہر کی۔
‎یہ بیلنس بائیک بغیر پیڈل، موٹر اور بریک کے تیار کی گئی ہے۔ بچے اسے اپنے پیروں کی مدد سے آگے بڑھاتے ہیں، جس سے ان کا توازن، جسمانی ہم آہنگی اور سائیکل چلانے کی بنیادی مہارت بہتر ہوتی ہے۔ یہی وجہ ہے کہ دنیا بھر میں بیلنس بائیکس کو چھوٹے بچوں کی ابتدائی تربیت کے لیے مؤثر سمجھا جاتا ہے۔
‎کمپنی نے بتایا ہے کہ پہلی کھیپ مکمل طور پر فروخت ہونے کے بعد اب نئی کھیپ کے لیے 31 جولائی سے پری آرڈر شروع کیے جائیں گے۔ بائیک استعمال کرنے کے لیے بچے کی ٹانگ کی کم از کم لمبائی 13.7 انچ یعنی 35 سینٹی میٹر ہونی چاہیے۔ اس کے لیے تجویز کردہ زیادہ سے زیادہ وزن 30 کلوگرام جبکہ زیادہ سے زیادہ قابل برداشت وزن 35 کلوگرام مقرر کیا گیا ہے۔